PRANWAN LADAW (4) LABAN SHANI NA MUNGGA

Mungkan ntsa hta masha hkum shagu gaw myit masin a ngwi pyaw simsa ai hpe ra sharawng nga ai. Rai tim mung ngwi pyaw ai hpe tam ai shaloi njaw ai ladat hte nteng ai shara ni hta tam la nmai nga ai. Ngwi pyaw simsa ai lam gaw shinggan kaw nga ai arung arai ni hta nmu la mai nga ai. Ngang grin ai ngwi pyaw simsa ai lam gaw anhte a myit masin hta Karai Kasang hpe hkap la nna sak hkrung ai rai yang she mu tam lu na re. 

Lusu matsan rai tim, ngwi pyaw ru yak hkrum ai aten ahkying hta raitim Karai Kasang hpe kamhpa manoi manat ai wa gaw yakhkak ai ten hta myit daw hten ai nnga ai zawn, lu lawm ai aten hte arawng aya rawt ai aten ni hta mung gum rawng ai lam nnga na re. Hpa majaw nga yang Karai Kasang gaw yawng hta na grau kaja ai majaw re. 

Dai ni na mung ga hte maren Karai Kasang hpe kamhpa manoi manat nna kaning re ai masa lam, kaja ai hte nkaja ai aten ni hta Karai Kasang a shaman chyeju a jaw e myit masin a ngwi pyaw simsa ai hpe lu la u ga. Karai Kasang hte manoi manat nna lu la ai ndai ngwi pyaw sim sa ai lam gaw anhte a yak hkak ai lam ni hpe lai di lu na n-gun atsam tai ai hta n-ga ngamu ngamai ai hte arawng aya tsaw ai aten hta mung gumrawng gumtawng ai lam nnga ai sha teng man ding hpring ai lam hta anhte hpe matsun madun ya lu u ga.

Karai Kasang sha anhte a myit mada kam hpa shara rai nga ai.

MANU DAN AI SAK HKRUNG HKAWM SA LAM

Dai ni na kabu gara shiga hta, Karai Kasang myit ra ai hte manu shadan ai hpe lu la na matu Madu Yesu gaw anhte yawng hpe sharin ya nga ai. 

Wenyi hta matsan mayan rai nga ai ni a lam Madu Yesu tsun ai. Shanhte kabu myit pyaw lu na matu mungkan ga a arung arai ni hpe n ra sharawng ai ni rai nga ai. Shanhte gaw Karai Kasang kaw na lu la ai shaman chyeju ni a majaw kabu myit pyaw nga ai hte Karai Kasang hta sha kam shamyet nna sumnum ai hte nga nga ai ni rai ma ai. 

Yawn hkyen hkrum ai ni gaw A lu ma ai ngu nna Madu Yesu tsun ai. Sung htung ai tsawra myit hpe chye na ai salum gaw marai rai a yawn hkyen hkrum sha ai hpe mung hkam sha chye ya nga ai lam Madu Yesu chye nga ai. Yawn hkyen hkrum nga ai ni hpe Madu Yesu gaw shalan shabran ya nga ai. Hta n-ga, shanhte a tsawra matsan dum chye ai masin salum hpe mung shagrau ya na rai nga ai. 

Gumrawng gum tawng ai hte ting kyeng myit hpe koi yen nna masha ni hte hku hkau chye ai, myit sum num ai ni hpe Madu Yesu shaman ya nga ai. shanhte gaw masha kaga ni hpe hkungga la ra ai hte hkap la chye nga ai. Kade daram n hkum tsup ai rai tim, masha shagu gaw Karai Kasang a tsawra hkrum lu na re ai hpe chye na ai majaw re. 

Dinghpring ai hte Tara rap ra lam hpe kawsi hpang gara nga ai ni gaw Madu Yesu a shakawn ai hpe hkam sha na ma ai. Dip sha hkrum ai ni a matu Tara rap ra lam hpe shanhte tam nga ai rai nna masha yawng a matu kaja dik ai hpe shanhte sharawng nga ai. 

Mara hkyem sa raw dat ya chye nna matsan dum lama chye ai ni hpe Madu Yesu shaman ya nga ai. Karai Kasang kaw nna shanhte lu la ai matsan dum lama ai chyeju hpe masha ni hpe gam garan ya ai ni rai nga ai. 

Laja lana rai nna mang hkang hpran chye ai ni hpe ning hkap ai, ngwi pyaw simsa lam tam ai ni hpe Madu Yesu shaman ya nga ai. Karai Kasang sharawng awng ai, mungkan ga a ngwi pyaw simsa lam hpe shanhte tam shakut nga ai ni rai ma ai. 

Hpang jahtum, makam masham hte tengman ai lam a majaw zingri zingrat hkrum sha ai ni hpe Madu Yesu shaman let shakawn shagrau nga ai. Shanhte a makam masham ja la ai hte jet ai lam madun nga ma ai. Hkye hkrang la ai lam a kabu gara shiga hpe mungkan ga de la sa ai Hkristu a nni nkri hkam sha ai hpe shanhte garan la nga ma ai. Hkristu a bai hkrung rawt ai hta shanhte teng sha wa lawm lu na lam Madu Yesu ga sadi jaw sai. 

Madu Yesu shaman ya let shakawn ai A lu ai ni byin tai wa lu na matu Karai Kasang a shaman chyeju hpe anhte mung hpyi ga! Karai Kasang a shaman chyeju hte sha n rai yang anhte hpa n-galaw lu ai hpe dum chye ga ai. Raitim, Karai Kasang a shaman chyeju hte yawng hpe galaw lu ai lam kabu gara shiga hta anhte chye nna kam lu saga ai. 

Sawn sumru mai ai lam; dai ni na prat, mungkan ga a tang pyaw lam ni hte ngai myit lawm, hkum lawm nga sai. "A lu ai" lam ni hte n htan shai ai lam ni rai nga ai. Dai ni na kabu gara shiga e sharin ya ai hte maren teng sha wa ngai sak hkrung hkawm sa lu na kun?

PRANWAN LADAW (4) LABAN SHANI NA CHYUM LAIKA

PRAN WAN LADAW HTA LABAN 4

29th January 2017

CHYUM MUNGGA DAW  1

Zehpani  2: 3, 3: 12-13.

Ya hti na gaw myihtoi Zehpani a laika hta na rai nga ai.

Ndai mungkan ga na myit grit nem ai ni hte, Madu a tara hkan shatup ai ni yawng  hte e, Madu hpe hkan tam mu: ding hpring ai hte sumnung ai lam hpe tam manu; shing rai Madu a masin pawt ai nhtoi hta, nanhte shingbyi shara mu lu na nhten.

Myit grit nem ai hte matsan mayan amyu  hpe ngai jahti da nna, Israela mung hta naw ngam ai masha ni Madu a amying hta shingbyi shara tam nga na mara ai. Shanhte gaw n hkru n kaja ai amu galaw na n rai; masu ga mung tsun na n rai; shanhte a n-gup hta e hkalem ai shinglet tu lu na n rai; shanhte gaw jahkrit shama ai lam n hkrum ai sha lu sha nna, ngwi pyaw ai hte hpum nga na mara ai.

Ya hti gaw Karai Kasang a mungga rai nga ai.

CHYUM MUNGGA DAW  2

1Korinhtu  1: 26-31.

Ya hti na gaw Korinhtu masha ni hpang de San Pawlu shangun dat ai laika hta na rai nga ai.

Nye a hpu nau ni e, Karai Kasang e shaga la hkrum ai ni nanhte gaw, kaning re ai masha rai nga myit dai hpe aru yu mu: ndai mungkan madang hku sawn yu jang, hpaji byeng-ya rawng ai ni law law wa nanhte hta n lawm nga ai; ahkaw ahkang lu ai ni hte du amyu hta na, law law wa n lawm nga ai. Rai timung, Karai Kasang a man e shinggyim masha gumrawng gumtawng shara n nga u ga, hpaji rawng ai ni hpe kaya kahpa jahkrum na matu, mungkan ga angawk angak re  ai hpe Karai Kasang lata la wu ai; n-gun lagaw rawng ai ni hpe kaya kahpa jahkrum na matu, mungkan ga na n-gun n ja ai ni hpe Karai Kasang lata la wu ai. 

Rai la dum ai masha kaba ni hpe shagrit kau na matu, mungkan ga a arawng n lu ai, hti n mai ai, yu maya masha ni hpe Karai Kasang lata la wu ai; shing rai, Karai Kasang a man e shinggyim masha shakawng shara n nga ai. Karai Kasang gaw nanhte hpe Hkristu Yesu a adaw ashan shatai da wu ai; Karai Kasang myit ra ai majaw, dai Hkristu gaw anhte a hpaji byeng-ya hte ding hpring ai lam, shachyoi shapra ai hte htingrai htingrat ai lam tai wa sai. Dai re ai majaw, Chyum Laika hta ka da ai hte maren, arawng la mayu ai wa gaw Madu hta arawng la u ga.

Ya hti ai gaw Karai Kasang a mungga rai nga ai.

KABU GARA SHIGA

Mahte  5: 1-12.

Ya hti na gaw Mahte a laika hta na Kabu Gara Shiga rai nga ai.

Yesu gaw masha unawng uwa hpe mu jang, bum ntsa de lung wa ai; dai yang e, Shi dung nga yang, sape ni shi makau de sit sa wa ma ai. Shaloi Yesu shanhte hpe sharin shaga let, tsun wu ai gaw: Myit masin hta matsan mayan ai ni gaw ‘a’ lu ma ai; lamu mungdan gaw shanhte a mungdan rai nga ma lu ai. Myit sumnung ai ni gaw ‘a’ lu ma ai, shanhte mungkan ga hpe madu lu na mara ai. Yawn hkyen hkrum ai ni gaw ‘a’ lu ma ai; shanhte shalan shabran ai hkrum na mara ai. Dinghpring ai hte krawsi hpang gara ai ni gaw, ‘a’  lu ma ai; shanhte hkru kat wa na mara ai. Matsan dum chye ai ni gaw ‘a’ lu ma ai; shanhte matsan dum la ai hkrum na mara ai. Myit san seng ai ni gaw ‘a’ lu ma ai; shanhte gaw Karai Kasang hpe mu lu na mara ai. 

Ngwi pyaw simsa ai hpe shabyin ai ni gaw ’a’ lu ma ai; shanhte hpe Karai Kasang a kasha ni shamying na mara ai. Dingman ai lam a majaw, zingri zingrat hkrum ai ni gaw ‘a’ lu ma ai; lamu mungdan gaw shanhte a mungdan  rai nga malu ai. Nye a amying majaw masha ni nanhte hpe asawng asang zingri zingrat di ai hte, n teng n man ai hku mara amyu myu shagun da ai shaloi, nanhte ngwi pyaw nga myit dai; lamu mungdan hta e nanhte a shabrai kumhpa kaba nga malit dai majaw, kabu gara nna ngwi pyaw nga mu.

Ya hti ai gaw Madu a Kabu Gara shiga rai nga ai.

PRANWAN LADAW (3) LABAN SHANI NA MUNGGA

“Karai Kasang a mung dan du magang ra ai, myit malai lu mu.”

Anhte shinggyim masha ni a ngasat ngasa lam hta n-gup ga hte ntsun tim kuptsup ai masha ni zawn nga chye nga ai. Yawng kaja ai, yawng kuptsup ai ngu ai gaw mara a mayam rai nga ai shinggyim masha ni hta nmai byin nga ai. Hpa majaw nga yang Karai Kasang langai sha kuptsup ai hku kaja ai rai nga ai. Karai Kasang hpan da hkrum ai ni gaw ra rawng ai lam ni nga na gaw teng sha rai nga ai majaw teng sha galai sha ra na re.

Nhkum ntsup ai shinggyim masha ni a asak aprat hta galai shai ai lam nga yang she hkum tsup ai ngu ai pandung de lagaw lahkam htawt lu na re. Hpaji chye ai ni tsun tawn da ai hta, “galai shai ai ngu ai gaw rawt jat galu kaba ai lam a npawt nhpang rai nga ai” ngu ai ga hte maren shani shana galai shai ai lam ni nga yang she galu kaba wa na rai nga ai.

“Myit malai lu mu” ngu ai Madu Yesu a ga hpe madat nna nhkum ntsup ai shinggyim masha ni re ai hpe dum shai let mai kaja ai de galai shai wa ai hpe shani shana na nga sa ai lam hta sakse madun lu u ga.

MADU MYIT RA AI HTA

Jau aya hkam la ngut ai hpang nau nna yang, ngai a kana shawng kaw wa lam ai. shi gaw Pennsylvania mungdaw, Stroudsburg kaw nga ai. Ngai shi kaw naw nga taw ai ten, shi amu galaw ai tsi rung kaw nna wa ai lani mi hta, brother James S.V.D gaw salum ana lu ai hte tsirung kaw tsi tsi lajang nga ai lam tsun dan ai.

Ngai mung brother James hpe sa gawan yu nna Nanman chya Sakramentu jaw ya sai. Akyu hpyi ngut ai hpang shi ngai hpe tsun ai gaw, "lama na karai Kasang ya jang ngai hpe woi la na nga tim hkrak sha rai sai! Madu myit ra ai hta ngai hkawm sa na jin jin rai sali ai" nga ai.

Laban bat mi na ai hpang ah shawng ngai hpe tsun dan ai gaw brother James n nga mat sai da! Shi gaw asak 45 ning sha naw rai nga ai. 

Dai ten hta, ngai gaw jau tai ai pyi n na shi ai, sak naw kaji ai ten rai nga ai. Tim, brother James tsun ai ga, ‘lama na Karai Kasang ya jang ngai hpe woi la na nga tim, hkrak sha rai sai! Madu myit ra ai hta ngai hkawm sa na jin jin rai sali ai’ ngu ai ga hpe adum nga nngai.

Dai ni na kabu gara shiga hta mung, yawng a shawng na sape ni hpe shaga la ai lam, kasa Mahte ka da ai hpe na lu sai. Dai hta, sape ni a myit mang ai lam dam lada ai hpe, kumla ni hte madun sai. Sumgawn hte shanhte rim la lu ai "nga" gaw mungkan ga na agung alau/arung arai ni hpe madun ai rai sai. Shanhte a hkali chyawm , shanhte a mungkan ga na myit yaw shada ai, yup mang shingran ni rai nga ai. Shanhte a kawa Zebedi chyawm gaw, kun dinghku a makyit sumri ni hpe kumla shapraw ai rai sai.

Hpa majaw dai yawng hpe tawn kau da ai rai sata? Shanhte ni chye pyi n chye lu ai prat de hkan nang na matu ya na zawn tawn kau da ai gaw loi la nga ai n rai. Brother James a mabyin gaw anhte hpe garum ya na nhten. Shi zawn sha, Sape ni mung Madu Yesu hpe 'Karai Kasang hta tsep kawp ap tawn da ai wa, myit masin tup hte tsawra ai wa, ngu mu mada ai majaw rai na re. Dai majaw, arai yawng mayawng hpe tawn kau da nna Madu a hpang hkan nang ai rai nga ai. Shi Madu hta hkan nang na myit hkut da sai hte tinang myit ra ai hta n rai, Madu hta sha yawng ap nawng da let hkawm sa lai wa sai. Anhte mung dai hte maren hkawm sa lu na atsam hpyi la ga!

PRANWAN LADAW (3) LABAN SHANI NA CHYUM LAIKA

PRAN WAN LADAW HTA LABAN 3

22nd  January 2017

CHYUM MUNGGA DAW  1                    

Esaia  8:  23 - 9: 1-3.

Ya hti na gaw myihtoi Esaia a laika hta na rai nga ai.

Moi shawng de Madu Karai Kasang gaw Zebulun hte Na-hta li mung hpe shagrit kau timung, htawm hpang e, panglai lam makau e, Yawdan hka wora hkran na, amyu kaga ni nga ai Galile mung hpe arawng sadang hte hpring shangun na ra ai. Nsin hta hkawm nga ai amyu gaw nhtoi kaba hpe mu lu ma ai; si hkrung si htan mungdan a shingnip kata e shanu nga ai ni a ntsa e nhtoi dawng pru sai. Nang gaw shanhte a ngwi pyaw ai lam hpe shalaw nna, shanhte a kabu gara ai hpe jat ya mu ai: nmut ta e masha ni kabu gara ai hte, lanep garan ai ni mung kabu jahtau ai zawn, shanhte  na a man e kabu gara nga ma ai. Kaning rai nme law, shanhte hpe shaba ai lit hte, kahpa ntsa e mara ai kandang hpe mung, hpareng wa a ri hpe mung, Midian a lakhtak e byin ai zawn nang agrawp kau nu ai.

Ya hti ai gaw Karai Kasang ai mungga rai nga ai.

CHYUM MUNGGA DAW  2

1 Korinhtu 1: 10-13,17.

Ya hti na gaw Korinhtu masha ni hpang de San Pawlu shagun dat ai laika langai hta na rai nga ai.

Hpu nau ni e, nanhte yawng hte gaw myit hkrum nga mu, nga nna anhte a Madu Yesu Hkristu a amying hte ngai nanhte hpe aja awa hpyi nem nga nngai. Nanhte hta e hka wa bra wa na lam n nga ai sha, makam masham lam hta langai sha rai nga mu. Kaning rai nme law, ngai hpu ngai nau ni e, nanhte ga li ga law rai nga myit dai hpe, Hklo-e nta na ni ngai hpe sa shana mi ai. Ngai tsun mayu ai gaw: ngai gaw Pawlu hte seng ai; ngai mahtang Apollo kaw hkan nang ai; ngai gaw Kehpa a sape; ngai gaw Hkristu hte seng, nga nna nanhte langai hte langai tsun hkat shajang nga myit dai hpe ngai na la se ai. Hkristu hpe garan nna, daw langai hte langai nanhte hpe jaw ya sa ni? Pawlu gaw nanhte a matu Wudang hta jen da hkam sa ni? Pawlu a amying hta kashin kamun hkam manit ni? Kashin kamun jaw na matu n rai, dai kabu gara shiga hkaw dan na matu she, Hkristu gaw ngai hpe shangun dat sai: rai timung, Hkristu a Udang gaw kaman lila n rai u ga, mungkan hpaji ga hte ngai hkaw tsun dan nngai n rai.

Ya hti ai gaw Karai Kasang  a mungga rai nga ai.

KABU GARA SHIGA

Mahte  4: 12-23.

Ya hti na gaw Mahte a laika hta na Kabu Gara Shiga rai nga ai.

Yawhan hpe rim la ai hpe Yesu na la jang, shi Galile mung de htawt sa wa ai. Bai, Nazaret mare de nna htawt mat wa yang, Zebulun hte Naphtali mung a lamu ga jarit hkan na, hka nawng makau e nga ai, Kapernaum mare de shi sa du nna dai hta nga nga ai. Shing rai myihtoi Esaia tsun ai ga dik wa sai. Dai gaw Zebulun hte Naphtali a mung, nawng makau e, Yawdan hka wora hkran na, amyu kaga ni a Galile mung e, nsin kata e dung nga ai amyu gaw, nhtoi kaba mu lu ai rai nna, si ai mung hte de a shingnip kata hta dung nga ai ni kaw, nhtoi dawng pru wa sai, nga nna ka da nga ai. Dai aten kaw nna Yesu gaw, sumsing lamu a mungdan du magang ra ai rai nna, myit malai lu mu, nga nna hkaw tsun hpang nga ai.

Ya, Galile nawng makau e garet hkawm wa yang, shan nau rai nga ai, Petru ngu ai Simun hte shi a kanau Andaru yan gaw, shan a sumgawn hpe nawng hta e kabai bang nga ai hpe Yesu mu hkrup wu ai: shan lahkawng nga hkan ai masha rai nga ai. Shaloi Yesu gaw, Ngai kaw hkan marit; masha hpe hkan hkwi na masha ngai nan hpe shatai na made ai, ngu nna shan hpe tsun mu ai. Shaloi jang shan gaw sumgawn hpe kau da nna, Yesu kaw hkan nang ma ai.

Bai, dai kaw nna naw hkawm sa wa yang, kaga shan nau, Zebedi a kasha Yaku hte shi a kanau Yawhan hpe Yesu mu hkrup wu ai; dai yan mung shan a kawa Zebedi hte rau li hta dung nga let, shanhte a sumgawn hpe kapa nga ma ai rai nna, shan hpe shaga la mu ai. Shaloi jang shan gaw, dai li hte shan a kawa hpe rap di kau da nna, shi kaw hkan nang ma ai. Bai, Yesu gaw Galile mung ting hta kawan hkawm let, shanhte a tara jawng ni hta sharin shaga nna, lamu mungdan a kabu gara shiga hkaw dan ai hte, machyi ai ni hte ana ahkya lu ai ni mahkra hpe shamai shatsai ya wu ai.

Ya hti ai gaw Madu a Kabu Gara shiga rai nga ai.

PRANWAN LADAW (2) LABAN SHANI NA MUNGGA

Anhte shinggyim masha ni a prat hta kabu pyaw hpa lam ni, yakhkak ai lam ni hte laklai ai lam ni nnga ai yumaya aten ni nga nga ai. Nawku daw jau ai lamang ni hta kabu pyaw hpa lam ni hte hpring tsup ai Hkrismat aten hte kaga poi kaba ni hpe galaw lai wa nna dai ni na aten hta pranwan ladaw laban lahkawng (2) de du shang wa sai. Kade nna yang Madu Yesu nni nhkri yu bak hkam la nna bai hkrung rawt ai Lusha gam ladaw hte Paska ladaw de du shang wa na re.

Anhte a asak aprat hta kaning re ai ru tsang lam hpe hkum hkra tim myit daw hten ai lam nnga na matu Karai Kasang hpe kam hpa ai hte myit mada shara lam ni hpe mu chye nna lai di lu na matu ahkyak nga ai. Kabu gara ai aten ni hta mung Karai Kasang hpe shingdu ntawn da kau ai sha sak hkrung nga sa ra na re.

Dai ni na Kabu Gara ai shiga hta lawm nga ai Yahan Baptister hte Madu Yesu hpe kasi la let Karai Kasang hpe aten ahkying shagu hta manoi manat sak hkrung nga sa lu na matu hte Shan lahkawng a prat hta manang ni a matu mai kaja ai amu bungli law law galaw lai wa lu sai zawn Madu Yesu a hpang hkan nang ai anhte ni mung makam masham ngang kang let manang ni a matu akyu shapraw ya ai Madu Yesu a jet ai ali ama ni tai wa lu u ga.

KARAI KASANG HPE CHYE CHYANG AI

Tsun na chyawm gaw yak ai rai tim, Yawdan hka hta amu bungli galaw lai wa ai, Yawhan Baptista a bungli lamang gaw ndai zawn rai nhten;

Shawng nnan, masha ni hpe kashin kamun jaw hpang ai. Dai hpang lani mi na ten, Karai Kasang shi hpe tsun ai, "wenyi gaw Sumsing lamu de na hkrudu zawn yu hkrat wa nna dai wa a ntsa e nga nga ai wa chyawm gaw wenyi hte kashin kamun jaw ya na wa rai nga ai" ngu ai hpe na da sai. Dai hpang nau nna ai ten hta, Madu Yesu mung kashin kamun hkam la na nga Yawdan hka kaw du sa nu ai. Dai hpe shi mu yang, "yu mu, Karai Kasang a sagu kasha, mungkan ga na shut hpyit mara hpe la kau ya na wa rai nga ai," ngu wu ai. Dai hpang, Madu Yesu hpe kashin kamun jaw wu ai; dai ten hta, wenyi gaw sumsing lamu de nna Uhkrudu zawn yu hkrat wa nna Madu Yesu a ntsa hkring nga ai.

Karai Kasang gaw aten hte aten Madu Yesu kadai re ai hpe Yawhan hpe hpaw tsun dan sai hpe anhte mu lu ga ai. Mai byin ai gaw, Yawdan hka de Madu Yesu mung du yu na sai, rai tim, Hkyela Madu re ai hpe gaw Yawhan mung n chye lu ai. Karai Kasang shi a salum hta shim ai hte tsun dan ai hpe dum sawn lu ai shaloi she chye lu ai. Kashin kamun hkam la ngut ai hpang, uhkru du paw pru wa ai rai tim, dai chyawm gaw, Madu Yesu; Hkyela Madu teng teng re ai hpe bai kahtap shagrin ya ai lam sha rai nga ai.

Ahkyak ai lam gaw, Karai Kasang shi hpe hpaw shaleng dan ai shaloi chyu sha, Madu Yesu gaw Hkyela Madu re ai hpe Yawhan dum chye lu ai re.

Kolose hpung masha ni hpang de kasa Pawlu gaw, "wenyi hte seng ai hpaji byeng ya hte nyan marai amyu myu hta shi a myit mang ai a chye chyang ai lam hte, nanhte hpring chyat lu mu ga, akyu hpyi ya nga ai" nga ai. Ndai ga ahkyak ai gaw tsun pyi n ra sai. Kasa Pawlu tsun ai gaw, Karai Kasang a myit mang ai hpe chye ya lu na gaw, wenyi hte seng ai hpaji byeng ya hte nyan amyu myu hta chyu mai byin ai nga ai. Rai yang, dai 'wenyi hte seng ai hpaji byeng ya hpe anhte kaning rai lu la na rai? Karai Kasang kaw na chyu sha rai nga ai. Mai kaja ai sak prat hta anhte hkawm sa ai rai yang Karai kasang shaman ya na re. dai shaloi she, Karai kasang a myit ra ai lam hpe shani shagu na anhte a prat hta sawn sumru lu la na re.

Nu Maria gaw dai lam a matu hkum tsup dik sai sakse rai sai. Nu Maria gaw mai kaja dik ai majaw, Karai Kasang gaw shi hkum shi shadan shaleng dan sai. San Yawsep kaw mung dai hte maren rai sai. Dai mabyin gaw Yawhan Baptista kaw mung du sai. Yawhan, shi a atsam hte sha gaw Madu Yesu hpe "Messiah" re ngu n chye lu ai. Karai Kasang shi hpe hpaw shaleng dan ai shaloi chyu sha she, Yawhan chye lu sai.

Shanhte kasa ni, sanpra ai ni, hta jaw teng ai lam gaw anhte kaw mung jaw na sha rai nga ai. Karai Kasang anhte a shakut shaja ai hpe mu yu ai shaloi, anhte shinggyim myit hte n dang myit sawn lu ai hpe Madu Karai shaleng shadan ya na re. Nu Maria, San Yawsep, Yawhan Baptista ni hpe Karai kasang galaw lai wa sai zawn, sanpra ai ni yawng hta mung galaw sai. Anhte ni hta mung shanhte zawn Karai Kasang a myit hpe chye na ya lu ai gam maka nga nga mai ai.

PRANWAN LADAW (2) LABAN SHANI NA CHYUM LAIKA

PRAN WAN LADAW HTA LABAN 2

15th January 2017

CHYUM MUNGGA DAW  1

Esaia 49:3, 5-6.

Ya hti na gaw myihtoi Esaia a laika hta na rai nga ai

Madu Karai Kasang gaw, Israela e, nang gaw nye a shangun ma rai nga ndai; na a marang e nye a hpung shingkang madun dan nga nngai, nga nna ngai Esaia hpe Madu tsun wu ai. Shingrai ngai gaw, Madu a man e arawng sadang lu ai hte, nye a Karai Kasang gaw nye a n-gun tai wa nu ai. Yaku a amyu hpe shi Madu hpang de bai wa shangun na hte, Israela masha ni hpe shi kaw bai jahpawng shinggyin na Madu gaw, ya ning nga ai: Yaku a amyu ni hpe bai sharawt nna, naw ngam nga ai Israela masha ni hpe bai woi wa na matu, nang nye a shangun ma tai ai gaw, na a matu amu kaji naw rai nga ai. Maigan amyu ni a nhtoi tai na hte, lamu ga htum hkra nye a hkye hkrang la ai lam tai na matu, ngai nang hpe naw san da na nngai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 Korinhtu 1:1-3.

Ya hti na gaw Korinhtu masha ni hpang de San Pawlu shagun dat ai laika langai hta na rai nga ai.

Tsawra la ai hpu nau ni e, Karai Kasang myit ra ai hte maren, Yesu Hkristu a kasa tai na shaga la hkrum ai ngai Pawlu hte, anhte a hpu nau wa Sosteni gaw, Korinhtu mare na Karai Kasang a amyu masha ni hpe ga shana dat ga ai. Nanhte gaw Hkristu hta e shachyoi shapra ai hkrum nna, shara magup e anhte a Madu Yesu Hkristu kaw akyu hpyi ai ni yawng hte rau, Karai Kasang a chyoi pra ai amyu masha ni tai na matu, shaga la hkrum ai ni rai nga myit dai; hpa majaw nga yang, dai Yesu Hkristu gaw nanhte a Madu rai nga ai hte maren, shanhte a Madu mung rai nga malu ai. 

Anhte a Wa Karai Kasang hte Madu Yesu Hkristu kaw na, chyeju hte ngwi pyaw ai gaw, nanhte hta e nga nga malit ga law.

Ya hti ai gaw Karai Kasang a mungga rai nga ai.

KABU GARA SHIGA

Yawhan 1:29-34.

Ya hti na gaw Yawhan a laika hta na Kabu Gara Shiga rai nga ai.

Yawhan gaw shi hpang de Yesu sa wa ai hpe hkap mu yang, shawa masha ni hpe tsun mu ai gaw: wora de mada yu mu; dai wa gaw mungkan mara la kau ya ai. Karai a Sagu Kasha rai nga ai. Ngai hta grau galu kaba ai wa langai mi, nye a hpang e du na ra ai; kaning rai nme nga yang, ngai garai n shangai yang shi nga nga sai, ngu nna ngai tsun ai wa gaw, ndai wa rai nga ai. Ngai gaw shi kadai re ai mung n chye nngai; rai timung, Israela masha ni a man e shi hpe madun dan na matu ngai sa du nna, hka hte kashin kamun jaw nga ai, ngu nna Yawhan tsun wu ai.

Dai hta kaga Yawhan gaw, dai Wenyi gaw  uhkru du zawn sumsing lamu de nna yu hkrat wa ai hpe ngai mu se ai: dai Wenyi mung shi a ntsa e dung nga ai. Ngai gaw shi kadai re ai hpe n chye nngai; rai timung, ngai hpe, hka hta kashin kamun jaw shangun dat ai wa ngai hpe tsun ai gaw: kadai a ntsa de dai Wenyi yu hkrat wa nna a nga nga ai hpe nang mu jang, dai wa gaw Chyoi pra ai Wenyi hte kashin kamun jaw ai wa rai nga ai. Dai hte maren ngai mu se ai rai nna, ndai wa gaw Karai Kasang lata san da ai wa rai nga ai, nga nna sakse hkam wa ai, ngu nna Yawhan gaw shawa masha ni hpe tsun shadum wu ai.

Ya hti ai gaw Madu a Kabu Gara shiga rai nga ai.

HKAWHKAM MASUM POI SHANI NA MUNGGA

Madu Yesu Hkristu gaw Yuda masha ni a matu sha nre ai sha mungkan ting na masha ni yawng a matu re ai hpe dai ni na poi gaw sak se hkam ya nga ai. Sinpraw hkran na hkaw hkam masum (hpaji rawng ai masha masum ngu mung tsun ma ai) gaw Madu Yesu hpe shangai ai hte rau sa nawku lu na matu ahkaw ahkang lu la sai re.

Ndai poi nhtoi shadum jahprang ya ai hta Madu Yesu hpe hkap la lu na matu, nawku lu na matu gaw shagrit shanem ai myit rawng ra na rai nga ai. Tinang a chye dum ai, lu dum ai hte byin dum ai myit masa lam ni hpe lai di nna nhkum ntsup shi ai ngu ai hpe dum hprang lu nna n-gun atsam dat yang she Karai Kasang hpe hkap tau la lu na re.

Madu Yesu gaw mungkan masha yawng a matu shangai wa sai re ngu nna dum shai ai hte, yawng a matu ngu ai hta tinang mung lawm ai hpe shadan shaleng lu na matu shagrit shanem ai myit ajet hte Madu Yesu hpe anhte a prat hta kaja wa sha mu tam lu na matu shakut shaja lu u ga.

HKAWHKAM MASUM POI SHANI NA CHYUM LAIKA

8th January 2017

CHYUM MUNGGA DAW  1

Esaia  60: 1- 6.

Ya hti na gaw Myihtoi Esaia a laika hta na rai nga ai.

Rawt u, htoi tu; na a nhtoi du ra ai; Karai Kasang a hpung shingkang na ntsa e dan hkung nga ai. Kaning rai nme law, yu u, nsin gaw ginding aga hpe, htat ai nsin gaw amyu baw ni hpe, kaup na ra ai; rai ti mung, na a ntsa e Karai Kasang paw pru nna, shi a hpung shingkang na a ntsa e dan hkung na ra ai. Maigan amyu ni gaw na a nhtoi de, hkawhkam ni gaw na a dan hkung kabrim ai de, du na ma ra ai. Grup yin mada yu u; shanhte yawng zup hpawng nna, nang hpang de wa ma ra ai; na a shadang sha ni gaw sumtsan mung de na wa nna, na a shayi sha ni gaw ba kaye ai hkrum na ma ra ai. Shaloi nang mu mada yang, nang htoi kabrim na rin dai; na a myit masin gaw kabu gara ai hte, kaba wa na ra ai; kaning rai nme law, nammukdara a sut gan gaw, nang hpang de kayin wa nna, maigan amyu ni a arung arai nang hpang de du na ra ai. Gawla-uk wunawng ni, Midian hte Ehpa mung na gawla-uk hkalung ni gaw, nang hpe kaup na ma ra ai; Sheba mung na ni yawng du na ma ra ai: shanhte gaw aja hte lawban lang nna, Karai Kasang hpe shakawn kungdawn na lam kajai gumhkawng na ma ra ai.

Ya hti ai gaw Karai Kasang a mungga rai nga ai.

CHYUM MUNGGA DAW  2

Ehpesu 3:2-3, 5-6.

Ya hti na gaw Ehpesu ni hpang de shagun dat ai laika hta na rai nga ai.

Shawng e nanhte hpe loi mi ka dat ni ai hte maren, dai sung htum ai lam, shingran ga hte ngai hpe shana dat nngai gaw, Karai Kasang kaw na pru nna, nanhte a matu mara ngai hpe jaw da ai chyeju aya a lam, nanhte naw na yu taw gaw, dai lam chyawm gaw, dai kabu gara shi ga a marang e, Hkristu Yesu hta e, maigan amyu ni gaw Yuda ni hte rau, ga ndat a sali wunli hkam la lu nna, shanhte hte rau hkum hkrang langai sha hte, ga ndat ni hpe jawm lu jawm la ai ni rai nga ma ai hpe, ndai aprat e shi a chyoi pra ai kasa ni hte myihtoi ni kaw Wenyi e shadan dan ai hte maren, moi shawng na aprat ni hta e shinggyim masha ni kaw n shana ya mu ai, rai nga ai. 

Ya hti ai gaw Karai Kasang a mungga rai nga ai.

KABU GARA SHIGA

Mahte  2: 1-12.

Ya hti na gaw Mahte a laika hta na Kabu Gara Shiga rai nga ai

Ya, Herod hkawhkam a lakhtak e, Yuda mung na Betlehem mare hta Yesu shangai wa ngut jang, yu mu, hpaji rawng ai masha sinpraw mung na Yerusalem de sa du ma ai rai nna, Shangai wa sai Yuda hkawhkam wa gaw, kanang rai nga a ta? shi a shagan hpe sinpraw mung hta e anhte mulu sa gaw ai rai nna, shi hpe naw ku na sa du ra ga ai, nga nna san ma ai. Herod hkawhkam dai ga hpe na jang, shi hte Yerusalem na yawng hte hte rau myit kahpra nga ma ai rai nna, dai amyu a hkinjawng agyi ni hte laika ka ai sara ni nlang hte hpe jahpawng da nhtawm, Hkristu hpe kanang shangai dat na ma ru ta, nga nna shanhte hpe jasan mu ai. Shanhte gaw, Yuda mung na Betlehem mare hta e shangai wa na ra ai: kaning rai nme law, myihtoi a lata hte ning nga nna ka da nga ai, Yuda mung na,nang Betlehem e,Yuda agyi ni hta, kaji htum nga ndai n rai; Nye a amyu Israela hpe woi rem nga na Du gaw, Nang kaw nna pru wa na ra ai, nga ai, ngu nna shi hpe tsun dan mu ai. Shaloi Herod gaw, hpaji rawng ai ni hpe lagyim shaga la nna, dai shagan dan pru ai ladaw hpe shanhte kaw azin ayang san achyin la nhtawm, Betlehem de shanhte hpe shangun dat yang, Nanhte sa nna, dai ma kaji a lam azin ayang hkan tam ai hte, shi hpe mu hkrup lu jang, ngai mung shi hpe sa naw ku lu n ga, ngai hpe wa shana ya mi, ngu nna tsun dat mu ai. Dai hkawhkam a ga na la ngut jang, shanhte pru mat wa ma ai rai nna, yu mu,sinpraw mung e mada mu ai shagan gaw, ma kaji nga ai shara a ntsa e ang ang di rai kap mat hkra, shanhte a shawng e a sa wa nga ai. Dai shagan hpe mu mu ai shaloi, shanhte nachying kabu gara nga ma ai. Dai nta hta e shang bang wa ma yang, dai ma kaji hte shi a kanu Mari hpe, shanhte mu mu ai rai nna, lahput hput di let shi hpe naw ku mu ai: tinang a sut sumpu hpaw nhtawm, shi hpe aja, lawban hte mura ngu ai kumhpa hpe sak mu ai. Herod hpang hku bai n hprang wa mu ga, yup mang hta shanhte hpe madun dan mu ai majaw, shanhte gaw tinang a mung de, lam kaga hku wa mat ma ai.

Ya hti ai gaw Madu a Kabu Gara shiga rai nga ai.