PASKA LADAW LABAN (6) NA MUNGGA

Anhte singgyim masha ni a myit hta myit ru tsampu ai lam ni nga chye nga ai. Hpamajaw nga yang tinang a n-gun atsam hte yawng hpe nlu galaw ai majaw rai nga ai. Hkrit ai, myit ru tsang ai lam ni gaw anhte hta galoi mung nga na re. Madu Yesu hte rau nga ai sape ni hpe Shi Madu hkum nan htet da ai hta Chyoi Pra ai Wengyi du sa nna shanhte hpe garum shingtau ya na re ai hte Shi hpe tsaw ra ai ni gaw Shi Madu a ga ni hpe hkan shatup na ra ai. Madu Yesu, Shi hkum nan nnga tim Chyoi Pra ai Wenyi gaw shanhte hpe n-gun jaw lam madun ya na re.

Kashin Kamun, n-gun shaja sacramentu hpe hkam la sai anhte ni gaw Chyoi Pra ai Wenyi hpe hkam la lu sai re. Lam shagu hta Karai Kasang gaw anhte hpe matsun madun ya nga ai. Karai Kasang matsun madun ya ai hpe madat chye ai, Chyoi Pra ai Wenyi hpe manoi manat kam hpa ai hte Karai Kasang a matsun madun ya ai hpe tatut galaw sa lu nna, yak hkak ai lam shagu hpe lai di lu nna myit ru tsang pu ai lam ni hte hkrit tsang ai lam ni hpe hkam jan lu u ga.

MADU JAW YA AI NGWI PYAW SIMSA LAM

Tsum tsaw sumra gaw, si hkrung si htan hte maren ja nga ai” (shaw 8:6) 

Dai tsawra myit gaw yawng mayawng hta lai jan ai hpe nang chye nga ai kun? Hpang jahtum shana shat sha poi hta, Kawa Karai hte sape ni a ntsa tawn da ai shi a tsawra myit hpe Madu Yesu tsun hpaw dan lai wa sai. Kawa Karai hpang de bai nhtang wa mat ai rai tim, Shi Madu a mungga hpe madat mara ai lam hte, Shi Madu hpe tsawra ai lam sakse madun na, htet da sai. Chyoipra ai Wenyi a garum ya let lam madun ya na hpe mung Shi Madu gasadi jaw da sai. Karai Kasang a tsawra myit chyu sha tengman ai hte chyam yu mai ai. Karai Kasang gaw anhte hpe tsawra ai majaw shi hte rau tsawra kanawn mazum nga na matu hpan da sai. Rai yang, Karai Kasang anhte hpe tsawra nga ai ngu ai hpe anhte kaning rai chye lu na rai ta? Chyoipra ai wenyi a marang e anhte chye chyang lu na rai nga ai (Rom 8:35- 39). Karai Kasang a mungga hpe na la na hte chye na na matu mung, chyoipra ai wenyi anhte a na hpe hpaw ya sai. Dai majaw, na a masin salum hpe Karai Kasang a tsawra myit hte mungga hte hpawn jahpring ya u ga, chyoipra ai wenyi kaw akyu hpyi ga!

Chye chyang ai nyan yawng hta grau lai ai ngwi pyaw simsa lam hpe nang chye ai kun? Madu yesu gaw ngwi pyaw simsa ai hpe sape ni hpe jaw da sai. Kaning re ai ngwi pyaw simsa lam hpe shi jaw da sai kun?

Hkristu a ngwi pyaw simsa lam gaw, mang hkang n nga ai hta grau nga ai. Yawng mayawng lawm ai rai nna anhte a matu mai kaja dik ai hpe galaw ya nga ai. Mungkan ga chye madat ai ngwi pyaw simsa lam gaw mang hkang ni hpe koi yen ai lam, n kaja ai galaw na ning dang kau ai lam, rai nga ai. Madu Yesu jaw ya ai ngwi pyaw simsa lam gaw, anhte a hkrit hpa lam, myit ru tsam pu lam ni hpe dang manga kau ai lam rai nga ai. Yesu Hkristu a ngwi pyaw simsa lam dai hpe anhte kaw nna, kadai mung la kau ya lu na n rai. Myit ru yawn hkyen lam, hkrit tsang shara, hkam sha yak ai lam ni, mung dai ngwi pyaw simsa lam hpe shayawm kau ya lu na n rai.

Mungkan ga na satan a atsam yawng hkra hpe dang manga kau lu na hte Shi Madu a ban dung hpe mung tsun shapraw dan sai. Mungkan myi hte yu yang, wundang hta jen noi si hkrum ai gaw, gaya kahpa, jahpoi asawng hkrum ai, hte hkrat sum mat ai lam rai nga ai. Tim, dai wudang gaw, shut hpyit mara hte satan hpe dang manga kau nna Awng dang lam de du pru shangun na hpe chye let Madu Yesu gaw Kalwari kawng de hkawm lung wa sai. Kawa Karai a hpung shingkang de du shang na mung Madu Yesu chye da nu ai. Wudang gaw, Madu Yesu hte Kawa Karai hpang de hpung shingkang du shangun ai zawn, dai hpung shingkang de du lu na, anhte a ‘lam’mung rai nga ai. Hkristu a wudang hta jet ai ngwi pyaw simsa lam hpe, Kawa Karai hte mahku mara lam hpe anhte lu la na re. Madu Yesu Hkristu a ngwi pyaw simsa lam hta nang hkawm sa nga ai kun?

"Madu Yesu e, tsawra ai hta Nang, ngai hpe hpan da nna, Nang Madu hte ani sha nga shangun sai. Madu hte galoi mung n tsan gang mat na hte, Madu a agrin nga ai Tsawra ai hte sadi dung nga ai lam hpe adum nga na nngai. Nang Madu a mungga hta shani shagu sakhkrung hkawm sa nga nna ngai a myit masin salum kaw nna chyeju dum nngai law. Madu e, Nang gaw ngai a yawng mayawng rai nga ai."

PASKA LADAW HTA LABAN (6) NA CHYUM LAIKA

1st May 2016

CHYUM MUNGGA DAW 1 

KASA 15: 1-2. 22-29.

‘Ndai ahkyak ai lam ni hta jan nna, grau ai lit kaga nanhte hpe n shagun na nga nna Chyoi Pra ai Wenyi hte anhte myit hkrum ga ai.’

Ya hti na gaw, Kasa Laika hta na rai nga ai.

Dai nhtoi hte hta e, Yuda mung na ni nkau mi sa du nna, hpu nau ni hpe sharin shaga let, Nanhte Mawshe a htung hte maren, matu gadoi lam n hkan yang gaw, hkye hkrang la ai kaw n du lu na myit dai, nga ma ai. De a majaw, bra na lam pru nna, Pawlu yan Barnaba dai ni hte grai ndang kalang hkat ma ai. Shing rai dai lam hpe jahkrup yu na matu hpu nau ni gaw Pawlu yan Barnaba hte shanhte hta na nkau mi hpe, Yerusalem mare de nga ai kasa ni hte salang ni hpang de shangun dat na san da ma ai. 

Kasa ni hte salang ni gaw, hpung masha nlang hte bawng nna, shanhte hta na masha lata la nhtawm Pawlu yan Barnaba hte rau Antiok de shangun dat na lam myit hkrum ma ai. Dai hte maren hpu nau ni hta na myit su ai salang Banaba ngu ai Yuda hte Sila hpe lata la nna, shan a lata hta ka ya dat mu ai ga gaw: 

Anhte Kasa ni, Salang ni, Hpu nau ni gaw, Antiok mare hte Suri mung, Kiliki mung hkan e nga nga ai, maigan amyu hpu nau ni hpang de ngwi pyaw ga shana dat ga ai. 

Anhte kaw na pru wa ai ni nku mi gaw nanhte hpe ga hte shatsang nna myit gale galau di ya ai hpe anhte na lu saga ai. Dai masha ni anhte kaw na hpa amying ahkang n lu ma ai. Dai majaw anhte nlang bawng nna, malai ni hpe lata la nhtawm anhte a madu Yesu Hkristu a mying ningsang a majaw tinang asak pyi n lahpawt ai, anhte a tsaw ra ai Barnaba yan Pawlu hte rau, dai malai yan hpe nanhte hpang de shangun dat na, myit hkrum ga ai. 

Dai re ai majaw Yuda yan Sila hpe anhte shangun dat ga ai rai nna, shan a n-gup ga hte nan, laika hta rawng ai lam hte maren tsun dan na mara ai. 

Nanhte a matu gaw, hpara sumla ni hpe nawng ya ai shahpa hpe mung, asai rawng ai hte, du manat sat ai shan hpe mung, n se n sa ai amu hpe mung, nanhte koi gam lu na rai myit dai. Ndai ahkyak ai lam ni hta jan nna, grau ai lit kaga nanhte hpe n shangun na, nga nna Chyoi Pra ai Wenyi hte anhte myit hkrum ga ai. Dai hte hpe nanhte koi gam nga yang, mai kaja na rai malit dai. Hkam kaja nga myit ga law.

Ya hti ai gaw Karai Kasang a mungga rai nga ai.

CHYUM MUNGGA DAW 2 

SHINGRAN 21; 10-14. 22-23

‘Sumsing lamu de na yu hkrat wa ai, Chyoi pra ai mare, ngai hpe madun dan nngai.’

Ya hti na gaw, Yawhan a Shingran Laika hta na rai nga ai.

Lamu kasa ngai hpe wenyi hta woi nawng mat wa ai hte, galu kaba, tsaw la ai bum ntsa de, woi du nna Karai Kasang kaw nna Sumsing lamu de na yu hkrat wa ai Chyoi Pra ai Yerusalem Mare ngai hpe madun dan nngai. Dai mare hta Karai Kasang a hpung shingkang dan hkung ai hte de a htoi tu ala ai gaw pat zawn san seng nna hpu la ai lung seng hte bung nga ai. De a bunghku gaw galu kaba ai hte tsaw la nga ai: mare chyinghka shi lahkawng hpaw nga ai rai nna, chyinghka shagu hpe lamu kasa langai mi sin nga ai. Sinpraw maga de mare chyinghka masum, dingdung maga de chyinghka masum, dingda maga de chyinghka masum, sinna maga de chyinghka masum hpaw nga ai. Dai mare a bunghku gaw npawt nlung shi lahkawng hta na langai mi a amying shingteng kap da nga ai. 

Dai mare kata e Nawku Htingnu hpe ngai n mu nngai; kaning rai nme law, chyahtum chyalai n-gun rawng ai Madu Karai Kasang hte Sagu Kasha gaw, dai mare a Nawku Htingnu rai nga ma ai. Dai mare hpe jahtoi ya na matu ajan mung, shata mung n ra nga ai. Karai Kasang a hpung shingkang dai mare hpe jahtoi ya nna,Sagu Kasha gaw de a pyeng ding rai nga ai.

Ya hti ai gaw Karai Kasang a mungga rai nga ai.

KABU GARA SHIGA 

YAWHAN 14: 23-29.

‘Chyoi Pra ai Wenyi gaw nanhte hpe lam magup sharin ya nna, ngai nanhte hpe tsun dan ai ga yawng mayawng, nanhte hpe shadum jahprang ya na ra ai.’

Ya hti na gaw, Yawhan a Laika hta na Kabu Gara Shiga rai nga ai.

Dai aten hta Yesu Shi a sape ni hpe tsun ai gaw: Ngai hpe tsaw ra ai wa nye a ga matsun hkan shatup na ra ai: nye Wa mung dai wa hpe tsaw ra na wu ai rai nna an lahkawng gaw dai wa kaw sa nna shi hte rau hpawng de nga na ga ai. 

Ngai hpe n tsaw n ra ai wa nye a ga n hkan shatup nga ai. Dai hta kaga, nanhte na la lu ai mungga gaw nye a ga n rai li ai: ngai hpe shangun dat ai nye Wa a mungga rai nga lu ai. 

Nanhte kaw ngwi pyaw ap da ya nngai; nanhte hpe nye a ngwi pyaw jaw ya made ai: mungkan ga na ni n lu jaw ai ngwi pyaw ai gaw nanhte hpe ngai jaw ai kumhpa rai nga ai. Nanhte myit hkum ru mu; hkrit mung hkum hkrit mu. Ngai wa nna nanhte kaw bai sa na ring ngai, nga nna ngai tsun ai ga hpe nanhte na la manit dai. Nanhte ngai hpe tsaw ra myit dai rai yang gaw, Wa hpang de ngai wa ai majaw, nanhte kabu na rai myit dai; kaning rai nme law, Wa gaw ngai hta grau kaba nga ai. Dai amu byin pru wa ai shaloi nanhte kam sham lu myit ga, ya garai n byin pru yang ngai nanhte hpe tsun da made ai.

Ya hti ai gaw Madu a Kabu Gara Shiga rai nga ai.

PASKA LADAW LABAN (5) NA MUNGGA

Shing gyim masha a asak aprat hpe yu dat ai shaloi tsaw ra myit ngu ai hta gaw gap tawn da ai hpe mu lu ga ai. Masha langai shangai wa ai shaloi bau maka ai ni a tsaw ra ai myit hta mahta na she sakhkrung nga mai nga ai. Tsaw ra ai myit nnga ai rai yang shangai wa ai ma chyangai sakhkrung na matu nmai byin nga ai.

Kaji nga ai ten hta tsaw ra myit hpe lu la nna bau maka ai hkrum yang she sakhkrung nga mai nga ai. Bau maka na, kawn lajang na ngu ai gaw tsaw ra myit nga yang she mai byin nga ai. Dai hte maren asak aprat kaba wa ai shaloi mung tsaw ra myit ngu ai hpe shada tawn da lu yang she kanawn mazum ai lam hta si mani na re.

Kaba sai masha langai hpe tsaw ra myit madun dan lu na matu gaw shi galaw sa ai hpe yu nna she jaw ya na nga yang gaw nmai byin na re. Hpa majaw nga yang nhkum ntsup ai masha ni rai ga ai majaw ndawng nyawt na lam gaw galoi mung nga na re. Shada da tsaw ra nga u ngu Madu Yesu tsun ai shaloi tsaw ra ging ai masha ni hpe sha nrai yawng mayawng hpe tsaw ra na matu shadum tawn da ai re. Kaja ai hte nkaja ai masha ni hpe maren mara tsaw ra na matu gaw tinang kaw nna dawdan nna she mai byin na re.

Tinang kaw nna masha yawng hpe tsaw ra na matu dawdan let kaja ai, nkaja ai masha yawng hpe tsaw ra myit madun dan let Karai Kasang a tsaw ra ai myit hpe masha hkum shagu hkam sha lu, mu lu u ga.

KABA HTUM AI HPUNG SHINGKANG

Karai Kasang, Shi a hpung shingkang hpe anhte kaning rai hpaw shaleng dan ai rai? 

Hpang jahtum shana shat sha poi hta, Madu Yesu gaw Shi a hpung shingkang hte Kawa Karai a hpung shingkang lam tsun dan lai wa sai. Dai hpung shingkang hpa rai ta?
 Madu Yesu tsun ai gaw, wudang lam rai nga ai.

Tinang a asak hpe manang wa na matu ap nawng kau ai hta lai jan ai gaw kaba dik ai hpung shingkang re ai hpe wudang ntsa hta Madu Yesu madun ya sai. Dai wudang hta, Shi Madu a tsawra myit kade daram dam lada ai hte shut hpyit mara kaw nna hkye hkrang la lu ai atsam hpe Karai Kasang hpaw shaleng ya sai. Wudang ntsa hta si hkam ai du hkra madat mara let, Kawa Karai a reng dik htum ai hpung shingkang hpe shagrau sha a sai. Mungga gaw masha tai wa ai lam hte Hkristu a wudang a marang e, kawa a hpung shingkang Kasha kaw mung du nga ai hpe Madu Yesu madi madun ya sai. Karai Kasang gaw shi a kasha shingtai hpe mungkan ga de shangun dat ya ai gaw, shut hpyit mara hte si ai kaw nna hkye mawai la na matu rai sai.

Hkristu a wudang hta lai nna, anhte a ntsa Karai Kasang a tsawra dik ai lam hpe madi madun na kaga n nga sai. Dai wudang hta, tsawra ai lam yan nnan hpe mu lu ai; tingkyeng myit n tam ai, manang wa hpe daw jau ai, mara raw ya ai, matsan dum myit kaba lawm ai, n chye na hkra tsawra ai lam rai sai. Shi Madu anhte hpe tsawra ai zawn, anhte shada da mung tsawra nga na, matsun jaw da sai. Rai yang, anhte a htingbu wa hpe, chye na yak na daram, anhte kaning rai tsaw ra lu na rai?

Madu Yesu bai hkrung rawt ai, wudang a awng padang a marang e, Karai Kasang a chyahtum chyalai re ai matsan dum myit, shaman chyeju, hte n-gun atsam hpe anhte lu la mai ai marang e, anhte hpe shut hpyit ai ni hpe pyi mara raw ya let tsawra lu na mai byin sai. Chyoipra ai wenyi a marang e, nhpaw n-ya ai prat nnan, anhte hpe jaw ya nna, kam sham, myit mada, tsawra ai kum hpa hte anhte a masin salum hpe jahpring ya sai. “anhte hpe jaw da sai Chyoipra ai wenyi e, Karai Kasang a tsawra ai myit, anhte a kraw lawang hta e ru bang ya ma ni ai” (Rom 5:5) nga nna kasa Pawlu anhte hpe shadum ya sai.

Karai Kasang hpang de kam sham ai hte madat mara let gayin wa ai marang e, Madu Karai gaw anhte a myit masin salum hpe san seng kau ya let galai shai ya n’htawm, anhte mung masha kaga hpe tsawra matsan dum chye wa na rai nga ai. ‘masha kaga ni hpe tsaw ra ai hte galaw daw jau ai marang e, Karai Kasang a hpung shingkang shadan shadawng na matu nang lam tam nga ai kun?

"Madu Yesu e, ngai hpe yawn hkyen, hkam sha shangun ai ni hpe rai tim, tsawra matsan dum lu na hte galaw daw jau lu na matu, Karai Kasang sharawng awng ai hpe mung hkan sa galaw lu na matu shaman ya rit law."

PASKA LADAW HTA LABAN (5) NA CHYUM LAIKA

PASKA LADAW HTA LABAN 5

24th April 2016

CHYUM MUNGGA DAW 1

KASA 14:21-27

‘Hpung masha ni hpe jahpawng tawn nna, Karai Kasang shan a lata hta galaw ai lam yawng mayang hkai dan mu ai.’ 

Ya hti na gaw, Kasa Laika hta na rai nga ai. 

Dai nhtoi hte hta e Pawlu yan Barnaba gaw Lustra hte Ikoni mare lam hku hkan nna, Anti-ok de bai wa ma ai. Shan bai wa nga yang, sape ni a myit shangang ya let, makam masham hpe kangka ai hte hkan shatup na matu shadum jahprang ya ma ai. Karai Kasang a mungdan hta garai n shang yang ru tsang ai lam law law hpe hkrum sha ra ga ai, ngu nna sharin da mu ai. Hpung shagu hta mung, hpung up salang lata la nhtawm, akyu hpyi ai hte lusha gam nna shanhte kam sham nga ai Madu a lata hta ap ya da mu ai.

Shan gaw Pedisi mung ga sa wa nna, Pamhpuli mung de du ma ai. Dai yang e Perga mare hta mungga tsun dan nhtawm Atali de yu wa ma ai. Ya shan gun hpai lai wa sai amu a matu Karai Kasang a chyeju hta shan hpe ap ya nna, shangun dat ai Anti-ok mare de, shan dai shara kaw na li jawn nhtawm, bai du wa ma ai.

Shan du wa jang, hpung masha ni hpe jahpawng tawn nna, Karai Kasang shan a lata hta galaw ai lam yawng mayawng hpe mung, maigan amyu ni hpe makam masham a chyinghka hpaw ya wu ai hpe mung, hkai dan ma ai.

Ya hti ai gaw Karai Kasang a mungga rai nga ai.

   

CHYUM MUNGGA DAW 2

SHINGRAN 21: 1-5

‘Shi gaw shanhte a myit hta na myi prwi pru mapru katsut kau ya na ra ai.

Ya hti na gaw, Yawhan a Shingran Laika hta na rai nga ai.

Ngai Yawhan gaw, sumsing lamu nna, ginding aga nnan hpe ngai mu nngai; shawng na lamu hte shawng na aga lai mat wa sai: nammukdara mung dai kaw e n nga sai. Shaloi Chyoi pra ai mare ngu ai Yerusalem nnan gaw, la nnan a matu mawn sumli ai num nnan zawn, Karai Kasang a man kaw nna Sumsing lamu de na yu hkrat wa ai hpe ngai mu nngai. 

Bai, dai tingnyang kata na nsen kaba gaw: ‘Yu mu, Karai Kasang a htingnu shinggyim masha ni hte rau nga nga nna, Shi shanhte kaw sa shanu na hte, shanhte gaw Shi a amyu ni tai na mara ai. Karai Kasang Shi hkum nan shanhte hte rau nga nga nna, shanhte a Karai Kasang tai na ra ai. 

Shi gaw shanhte a myi hta na myi prwi pru mapru katsut kau ya na ra ai; htawm hpang e si hkrung si htan n nga lu na sai; sharung shayawt ai hkrap ngu hkrap ngoi ai, hki si ba si ai mung n nga lu na sai: shawng na lam nga manga hte gaw, lai mat wa sai, nga nna tsun ai hpe ngai na nngai. 

Shaloi tingnyang hta dung nga ai Wa mung, yu u, yawng mayawng hte hpe, ngai ningnan bai gaw da nngai, nga nna tsun ai.

Ya hti ai gaw Karai Kasang a mungga rai nga ai.  

KABU GARA SHIGA

YAWHAN 13: 31-35

‘Ngai nanhte hpe tara jaw da made ai: Shada da tsaw ra nga mu.’

Ya hti na gaw, Yawhan a Laika hta na Kabu Gara Shiga rai nga ai.

Yuda Iskarut pru mat wa ai hpang, Yesu Shi a sape ni hpe tsun mu ai gaw: Masha Kasha gaw ya hpung shingkang dan hkung nga ai rai nna, Karai Kasang mung Masha Kasha hta hpung shingkang dan hkung nga ai. Karai Kasang Shi hkum nan Masha Kasha hpe shagrau ya na wu ai: rai sa, gade n na yang Shi hpe shagrau ya na ra ai. 

Ngai sha ni e, ngai nanhte hte hkring mi naw nga na nngai. Nanhte shada da tsaw ra nga mu, ngu nna tara nnan ngai nanhte hpe jaw da made ai: ngai nanhte hpe tsaw ra made ai zawn, nanhte mung shada da tsaw ra nga na rai myit dai. Shing rai nanhte shada da tsaw ra ai myit rawng nga yang gaw, nanhte nye a sape ni rai nga ai hpe masha yawng mayawng chye lu na mara ai.

Ya hti ai gaw Madu a Kabu Gara Shiga rai nga ai. 

PASKA LADAW LABAN 4 NA MUNGGA

Bu hkawm sa ai hkrun lam hta tinang du mayu ai shara, pandung hpe chye tawn da nna dai shara de du hkra gara hku hkawm sa na hpe chye yang she hkrun lam langai awng dang mai nga ai. Pandung chye tim hkrun lam hpe nchye yang awng dang lu na nrai.

Madu Yesu gaw, Shi a sagu ni Shi a nsen hpe madat ai. Sagu ni hpe Shi chye nna sagu ni gaw shi hpang hkan nang ai. Shanhte galoi mung nmat nna htani htana asak shanhte hpe jaw ya na re, ngu nna Kabu Gara shiga hta tsun tawn da nga ai.

Htani htana asak hpe lu la na matu gaw sagu rem wa kaja nga ra ai hte maren sagu ni mung dai sagu rem wa a nsen hpe madat nna shi a hpang hkan nang ra na re. Sagu rem wa kade kaja tim, sagu ni madat mara ai lam nnga yang gaw htani htana asak hpe lu la na nrai.

Anhte a sagu rem wa kaja rai nga ai Madu Yesu a nsen hpe galoi mung madat nna Shi Madu a hpang hkan nang ai a marang e hpang na prat hta htani htana asak hpe lu la mai ai sha n-ga ndai prat hta mung mai kaja ai lam hpe hkan shatup nga sa lu nna awng dang ai ngu ai arawng sadang hpe lu la u ga.

MADU GAW ANHTE A SAGUREM WA HTE MYIT MASIN A HPUNG UP RAI NGA AI

Sagu ni hpe rem sin nga ai sagurem wa a ngwi pyaw ai, shimlum ai hpe nang hkam sha chye ya ai kun? Karai Kasang gaw, Shi amyu masha; Israela a sagurem wa rai nga ai nga nna Ga shaka dingsa hta law law mu lu ga ai. “Madu gaw ngai a sagu rem wa rai nga ai, ngai hpa mung n ra nngai’ (Shk 23:1), ‘Madu gaw nanhte a sagurem wa hte myit masin a Hpung up wa rai nga ai’ (1 Pet 2:25). 

Shi a hpang hkan ai ni hpe ga sadi masum, Madu Yesu jaw da sai. Dai hta, htani htana asak lu la na lam gasadi jaw da sai. Madu hpe hkap la nna,hkan nang hkan sa ai rai yang, Karai Kasang hta asak lu la na rai nga ai. Htum ngu ai n nga ai prat hpe lu la na re nga nna ga sadi jaw da sai. Si mat ai ngu ai gaw jahtum n rai, n nan hpang ai she rai nga ai hte, hten za mat lam n nga ai prat hpe chye la lu na re. 

Shim lum ai prat hpe lu la na ngu Madu Yesu gasadi jaw da sai. Shi hkum nan htani htana Asak Madu re ai majaw, anhte yawng hte hpe kadai e mung, si hkrung si htan pyi, dang kau lu na n rai. Madu Yesu a lata hta anhte a prat gaw shim lum nga na re. Madu Yesu jaw ya na, dai shim lum ai lam gaw, ahkrung nga ai Karai Kasang hte mahku mara, gyit hkang da let, Karai a sagu hpung na malawm ni tai wa ai lam rai sai. Nat satan a agung alau hkrit hpa lam ni kaw nna mung anhte hpe magawp maga la nna ngwi pyaw simsa ai prat hpe jaw na lam gasadi jaw da sai. 

Madu Yesu gaw, anhte ni a mang hkang yawng hkra hpe la kau ya na n rai nga ai. Ndai mungkan prat hta, jam jau ai, hkam sha yak ai, machyi makaw hkrum ai, hte si hkrung si htan hpe anhte hkrum katut ra na re. Tim, ndai mayak jam jau ni hte chyu sha Madu gaw anhte hpe htani htana ngwi pyaw ai mungdan de woi wa na rai nga ai. Kade daram yak hkak, yawn hkyen ai hpe hkam sha ai rai tim, kadai mung n jaw lu ai sim sa ai lam hpe Karai Kasang chyu sha jaw lu ai. 

Dai majaw, Madu Yesu lam woi ning shawng ai hta, anhte a myit masin hkum hkrang yawng ap nawng da let, ding man ding hpring ai hte hkan nang hkan sa ga. Ngwi pyaw simsa lam hpe jaw ya lu ai Karai Kasang hta na a prat hpe ap da ai kun? Kaja dik ai sagurem wa rai nga ai Karai Kasang a nsen hpe atsawm sha madat let shi a mungga ni hpe hkan sa nga ai kun? 

Madu Yesu e, nang gaw kaja ai sagu rem wa rai nga ai. Nang Madu a lata hta ngai a myit masin, hkum hkrang yawng hpe ap tawn da nngai law. Nang Madu a nga nga ai lam hte Na a hkye hkrang la ai chyeju hpe grau nna kam hpa myit mada lu na, ngai a makam hpe n-gun jat ya rit law!!! 

PASKA LADAW HTA LABAN 4 NA CHYUM LAIKA

17th April. 2016

CHYUM MUNGGA DAW 1 

KASA 13:14. 43-52. 

Yu mu, maigan amyu ni hpang de, anhte kayin na saga ai.’

Pawlu yan Barnaba gaw Perga kaw nna rawt sa wa nna, Pesidi mung na Anti-ok mare de du ma ai. Ya, Laban nhtoi e, tara jawng hta shang dung nga ma ai. Tara jawng na bra mat wa jang, Yuda masha ni hte Yuda hpung de kayin wa ai maigan masha ni law law wa, Pawlu yan Barnaba kaw hkan nang ma ai. Shan lahkawng shanhte hpe sharin shaga nna, Karai Kasang shanhte hpe jaw ai chyeju hte maren, kangka rai hkan sa lu na matu shadum jahprang ya mu ai. 

Hpang na Laban Nhtoi hta, Karai Kasang a mungga na la na matu, mare ting, ganoi mahkra, wa zup hpawng nga ma ai. Yuda masha ni chyawm gaw, dai shawa hpawng hpe mu jang, manawn ai myit hte hpring chyat nga ma ai rai nna, Pawlu tsun ai lam hpe ndang hkat ai hte aroi ara ngu da mu ai. 

Pawlu yan Barnaba nden ja ai myit hte shanhte hpe htan ya nna, Karai Kasang a mungga nanhte hpe shawng tsun dan na ra ga ai; rai ti mung, nanhte dai hpe n hkap hta la ai majaw, n htum n wai asak hte n ging n dan ai hku, nanhte nan daw dan la manit dai. Dai rai nna, maigan amyu ni hpang de anhte myi man kayin na saga ai. Kaning rai nme law: 

Lamu ga htum hkra nye a hkye hkrang la ai lam dep lu hkra, Ngai nang hpe maigan amyu ni a matu nhtoi shatai sade ai, nga nna Madu anhte hpe hkang dat mani ai, ngu nna tsun mu ai. Maigan amyu ni dai na jang, kabu gara nga ai hte, Karai Kasang a mungga hpe shagrau sha-a ma ai, n htum n wai asak lu la na san da ai ni nlang hte mung, kam sham mat ma ai. Shing rai Karai Kasang a mungga gaw dai mung ting pri rai wa sai.
Yuda masha ni chyawm gaw, tara hkungga nna arawng lu ai num ni hte dai mare na agyi ni hpe shadut nna, Pawlu yan Barnaba hpe zingri zingrat di shangun ai hte, shanhte a lamu ga jarit na shaden kau mu ai. Shan gaw tinang a lagaw na nhpu shanhte hpang maga ahpu kau da nna, Ikoni mare de du ma ai; sape ni chyawm gaw kabu gara ai hte, Chyoi Pra ai Wenyi hte hpring nga ma ai.

CHYUM MUNGGA DAW 2 

SHINGRAN 7:9, 14-17.

‘Tingnyang a man e nga ai Sagu Kasha gaw sagu rem wa zawn shanhte hpe bau sin na rai nna, asak a hka hpawk du hkra shanhte hpe lam woi madun na ra ai.’

Ya hti na gaw, Yawhan a Shingran Laika hta na rai nga ai.

Ngai Yawhan gaw, masha mungdan shagu hta na mung, baw lakung shagu hta na mung, amyu baw shagu hta na mung, ga amyu shagu hta na mung, kadai n dang hti lu ai unawng uwa kaba hpe ngai mu nngai: dai ni gaw hpraw ai hpun palawng bu hpun nna, tinang a lata hta namhtan hpun lakung lang let, tingnyang a man e mung, Sagu Kasha a man e mung tsap nga ma ai. 

Shaloi salang langai mi ngai hpe tsun ai gaw: Ndai masha ni rutsang kaba kata na hkrang pru wa nna, tinang a hpun palawng hpe Sagu Kasha a asai hta hkrut jahpraw la ai ni rai nga ma ai. Dai re ai majaw shanhte gaw Karai Kasang a tingnyang man e ningngai nga lu ma ai hte, Shi a Nawku Htingnu hta shani shana Shi hpe daw jau nga ma ai: tiingnyang hta dung ai wa mung, shanhte hpe Shi a nta e nga shangun na ra ai. 

Shanhte gaw hpang de galoimung kawsi hpang gara n hkrum na masai; jan shingna mung, hpa kahtet ai mung shanhte hpe hkra lu na n rai: kaning rai nme law, tingnyang ka-ang e nga ai Sagu Kasha gaw sagu rem wa zawn shanhte hpe bau sin na ra ai rai nna, asak a hka hpawk du hkra shanhte hpe lam woi madum dan na ra ai: Karai Kasang mung shanhte a myi hta na myi prwi yawng hpe tsai hkra katsut kau ya na ra ai.

KABU GARA SHIGA 

YAWHAN 10: 27-30.

‘Ngai chye a sagu ni hpe n htum n wai asak jaw da we ai.’

Dai aten hta e, Yesu tsun ai gaw: Nye a sagu ni gaw Nye a nsen madat ma ai rai nna, Ngai shanhte hpe chye nngai; shanhte mung Nye a hpang hkan nang ma ai. Ngai shanhte hpe n htum n wai asak jaw da we ai rai nna, shanhte galoi mung hten bya ai hkrum na n rai; Nye a lata na shanhte hpe kadai mung kashun la ya lu na n rai. 

Shanhte hpe Nye a lata hta ap ya ai Nye a Wa gaw, yawng hta grau kaba nga ai rai nna, kadai mung Wa a lata na shanhte hpe kashun la ya lu na n rai. Ngai hte Nye Wa gaw langai sha rai nga ai. 

MADU A MUNGGA HPE KAM SHAM AI MYIT HTE HKAP LA NGA GA

Madu Yesu, Tiberi nawng makau e sape ni hpe shakram ai shaloi, hpa majaw, Sape ni kalang ta n chye lu ai rai? Dai hpe, Kasa Yawhan gaw loi mi tsun dan tawn ai. Kasa Petru gaw, Yerusalem mare kaw nna, nta buga re ai, Galilee de bai wa mat ai, nga tsun da ai. ‘nga’ bai wa hkwi sha mat na matu mai byin nga ai. Petru mung, Madu Yesu si hkam ai hpang, yawn hkyen ai hte hpa matut galaw na n chye nu ai. Dai majaw, lai wa sai aten na hte maren, ‘nga’ hkwi sha let wa nga mat na, buga de wa mat ai. Kaga sape ni mung shi kaw hkan nang ma ai.

Madu Yesu, Shi a sasana magam hpang sa wa na aten, Petru hkan nau ni a hkali de du sa let, sumgawn hpe jahkrat na tsun ai shaloi, ‘nga’ law law hkwi la lu ai gaw anhte chye ga ai. Dai hpang, ‘masha hpe hkan hkwi na masha’ shanhte hpe shatai na saw shaga sai. Ya mung, Madu Yesu gaw, bung pre ai lamik kumla bai madun sai. Madu Yesu hpe shawng nnan mu chye ai gaw, Yesu tsawra ai, kasa Yawhan rai nga ai. ‘Madu she rai nga ai’ nga nna Yawhan tsun ai hpe Petru na wu yang, li kaw nna nawng de gat shang wa ai. Myit npyaw lam ni, mayak mahkak ni hkrum sha ai ten, Madu Yesu hpang de, nang gat sa na kun? Madu Yesu gaw, anhte hpe myit mada shara nnan jaw ya na galoi mung jin jin rai nga ai. 

Madu Yesu a mungga hpe anhte a masin salum de hkap la ai ni, Madu a nsen hpe madat nga ai ni hkum hpra hpe, Shi hkum shadan dan na matu, Madu Yesu gaw jin jin rai nga ai. Madu Yesu, na a prat hta galoi mung anga nga ai hpe dum chye let Madu a mungga hpe kam sham ai myit hte kap la nga ai kun? 

Madu Yesu, hpa majaw, shi hpe tsawra ai lam, masum lang ting, kaga sape ni a man e Petru hpe san ai rai kun? Shawa man e, masum lang ting nyet kau ai Petru a hkam sha lam a majaw rai na re. Ya shaloi, Petru gaw myit hta asan sha rai mat nna, n-gun atsam nnan hte Madu Yesu shatsam ai lam ni hpe hkan galaw na jin jin rai sai. ‘ndai ni hta nang, Ngai hpe grau tsawra nni?’ nga Madu Yesu san ai shaloi; ‘hkali, sumgawn hte ‘nga’ ni hpe madi let tsun ai mung rain a sai. Nga hkan sha ai magam bungli hpe kabai kau nna, Karai Kasang a amyu masha ni hpe rem sin ai magam nnan jaw na matu saw shaga ai ma rai nga ai. “Nlang hte gaw na a lam myit kataw mat ti mung, ngai chyawm gaw galoi kataw lu na nrai” (Mt 26:33) nga nna kaga sape ni a man e Petru shakawng da ai ga hpe madi mayu ai mung rai na. Ya chyawm, kasa Petru gaw, shagrit shanem ai hte ‘Madu e, ngai, Nang hpe tsawra nga nngai law’ nga htan ya sai. 

Anhte hkum nan, kade n ging n dan, gawng kya ai rai tim, arai yawng mayawng hta, Shi Madu hpe tsawra nga ai lam sakse hkam na matu, saw shaga nga ai. Anhte a gumrawng gumtawng ai myit, bawja ai myit masa ni gaw Karai Kasang a tsawra ai kaw nna tsan gang shangun ai. Karai Kasang a tsawra myit gaw kumhpa kaba nan rai nna, anhte ging dan nna lu la ai gaw n rai nga ai. Karai Kasang a tsawra myit hpe anhte galoi mung shadawn shadang lu na n rai. Madu Karai anhte hpe shawng tsawra ai rai nna, Shi Madu hpe bai nhtang tsawra lu ai gaw, Madu a htum nnga ai tsawra matsan dum ai a majaw rai nga ai. Karai Kasang a tsawra myit hta na a masin salum hpe jasan jaseng ya na hte prat hpe galai shai kau lu na matu, nang ahkang jaw na kun? 

Madu Yesu e, ngai a masin salum kaw nna n kaja ai lam mahkra hpe jasan kau ya let Nang Madu a tsawra wan hte shagrung ya rit law!!! 

PASKA LADAW HTA LABAN 3 NA CHYUM LAIKA

10th April. 2016

CHYUM MUNGGA DAW 1 

KASA 5: 27-32. 40-41 

‘Anhte gaw ndai lam mahkra a sakse ni rai nga ga ai; Shi a mungga madat mara ai ni hpe Karai Kasang jaw ya ai Chyoi Pra ai Wenyi mung, dai hte sakse rai nga ai.’

Dai nhtoi hte hta e, hkinjawng agyi wa gaw kasa ni hpe san let, Nanhte hpe amying dai hte hpa mung hkum tsun mu, ngu nna anhte aja awa hkang da saga ai; nanhte mahtang Yerusalem mare ting e nanhte a sharin shaga lam pri di rai nna, dai wa a asai anhte a ntsa e mara ya na maw nga myit dai, ngu nna shanhte hpe tsun wu ai. 

Shaloi, Petru hte kasa ni htan mu ai gaw: Masha a ga madat na hta, Karai Kasang a ga mahtang grau madat na ga ai. Anhte a ji wa ni a Karai Kasang gaw nanhte wudang hta jen da sat kau ai Yesu hpe jahkrung sharawt dat nu ai. Israela amyu hpe myit malai lam hte mara raw ya ai lam hpaw ya na matu, Du Magam hte Hkye Hkrang la ai Madu shatai na nga, Karai Kasang gaw dai wa hpe Shi a hkra lata hte shagrau tawn nu ai. Anhte mung ndai lam mahkra a sakse ni rai nga ga ai; Shi a mungga madat mara ai ni hpe Karai Kasang jaw ya ai Chyoi Pra ai Wenyi mung, dai hte a sakse rai nga ai, ngu mu ai. 

Dai agyi salang hpawng gaw, kasa ni hpe kayet nna, Yesu a mying hte n sharin n shaga lu na lam hkang da nhtawm shanhte hpe dat dat ma ai. Shanhte chyawm gaw, Amying ningsang ndai a majaw, anhte kaya hkrum na ging nga ga ai, ngu nna myit la ma ai rai nna, kabu gara ai myit hte dai salang hpawng kaw na pru wa ma ai.

CHYUM MUNGGA DAW 2 

SHINGRAN 5:11-14

‘Sat kau hkrum ai Sagu Kasha gaw, hpung dagu, sutgan, hpung shingkang hte shakawn kungdawn ai hpe hkam la na ging dan nga ai law.

 Ngai Yawhan gaw shingran mu ai shaloi lamu kasa unawng kaba a nsen hpe ngai na la nngai; ndai ni mung, dusat amyu mali hte salang ni mung tinyang a grup yin e tsap nga ma ai. Dai ni gaw mun mi hta mun mi, hkying mi hta hkying mi lang law nga ma ai rai nna, shanhte gaw: 

‘Sat kau hkrum ai Sagu Kasha gaw, hpung dagu, sutgan, hpaji byeng-ya, n-gun lagaw, arawng sadang, hpung shingkang hte shakawn kungdawn ai hpe hkam la na, ging dan nga ai law, nga nna nsen kaba hte tsun shakawn ma ai. 

Dai hta n-ga, lamu lahta tang na mung, ginding aga ntsa na mung, aga lawu na mung, nammukdara kata na mung, hpan da hkrum ai hkrung mahkrung hte gaw,Tingnyang hta dung nga ai wa hte, dai Sagu Kasha gaw,htani htana prat dingsa, shakawn kungdawn ai, arawng sadang hpung shingkang hte daru magam anga nga u ga law, nga nna shanhte tsun ma ai hpe mung ngai na nngai. Shaloi dusat amyu mali gaw, Amen, nga ma ai; salang ni mung dingnyawm nawku ma ai.

KABU GARA SHIGA 

YAWHAN 21: 1-19

‘Yesu gaw muk la nna sape ni hpe sa jaw mu ai; nga hpe mung dai hte maren sa jaw mu ai.’

`Yesu gaw Tiberi nawng makau e sape ni hpe Shi ahkum bai madun dan mu ai. Dai shaloi na madun dan ai lam gaw, ning rai nga ai: Simun Petru hte Marun Ma ngu ai Htawma, Galile mung Hkana kahtawng na Nahtanela, Zebedi a kasha yan hte kaga sape lahkawng rau nga ma ai. 

Shaloi, Simun Petru gaw, Ngai nga sa hkan na nngai, ngu nna shanhte hpe tsun wu ai. Shanhte gaw anhte mung hkan sa na ga ai, nga ma ai; dai shana shanhte gaw langai mi pyi n lu ma ai. 

Nhtoi htoi wa yang, Yesu gaw nawng hkingau ntsa e tsap nga ai: rai ti mung, sape ni gaw Yesu re ai n chye ma ai. Dai majaw, Yesu gaw, shanhte hpe, Ngai sha ni e, nanhte shahpa lama ma lu myit ni? ngu nna san wu ai; shanhte gaw, N lu ga ai, ngu nna Shi hpe htan mu ai. Shaloi Shi gaw, Dai li a hkra maga de sumgawn jahkat mu, shaloi lu na myit dai, ngu nna shanhte hpe tsun mu ai. Dai hte maren shanhte jahkrat nna, nga law law wa magawn la lu ai majaw,sumgawn pyi n gang lu ma ai.
Dai rai nna, Yesu a tsaw ra ai sape gaw Madu she rai nga ai, 

ngu nna Petru hpe tsun wu ai. Simun petru dai hpe na la jang shi palawng lawai nna, nawng de gan shang wa ai. Kaga sape ni chyawm gaw, hkin-gau hte manga shi lam sha gang nga ai majaw nga hte hpring chyat re ai sumgawn garawt let, li kaji hte du wa ma ai. 

Shanhte gaw hkarang ntsa de du wa yang, nra wan mang hta, nga kakang da ai hte muk tawn da ai hpe mu ma ai. Shaloi, Yesu gaw, Ya nanhte lu la ai nga hta na la wa marit, ngu wu ai. Simun Petru li hta lung nna, nga kaba latsa e manga shi masum ting rawng ai sumgawn hpe, hkarang ntsa de karawt shalun wu ai. Dai hte wa law ti mung sumgawn gaw n je ai. 

Shaloi, Yesu gaw, Wa marit, Jahpawt shat wa sha maru, ngu nna shanhte hpe tsun wu ai. Shi Madu rai nga ai hpe sape ni chye mu ai majaw, shanhte hta na kadai mung, Nang kadai rai nta? ngu nna n san wam mu ai. Yesu gaw muk la nna sape ni hpe sa jaw mu ai; nga hpe mung dai hte maren sa jaw mu ai. Yesu Shi si ai ni kaw na bai hkrung rawt ai hpang, sape ni hpe Shi a hkum madum dan ai hta na, ndai gaw masum lang ngu na rai nga ai. 

Ya shanhte jahpawt shat sha ngut jang, Yesu gaw Simun Petru hpe, Yawhan a kasha Simun e, ndai ni tsaw ra ai hta, nang Ngai hpe grau tsaw ra nni? ngu nna san wu ai. Shi gaw, Rai sa, Madu e, ngai Nang hpe tsaw ra nga nngai gaw Nang chye nga ndai ngu nna htan wu ai. Shaloi Yesu gaw, Nye a sagu kasha ni hpe bau nga u, ngu nna shi hpe tsun wu ai. 

Bai lahkawng lang, Yawhan a kasha Simun e, Nang ngai hpe tsaw ra nga nni? ngu nna shi hpe san wu ai. Shi gaw, Rai sa, Madu e, ngai Nang hpe tsaw ra nga nngai gaw, Nang chye nga ndai ngu nna bai htan wu ai. Yesu gaw, nye a sagu ni hpe rem nga u, ngu wu ai. 

Bai masum lang, Yawhan a kasha Simun e, nang Ngai hpe tsaw ra nga nni? ngu nna san wu ai. Masum lang du hkra, Nang Ngai hpe tsaw ra nni? nga nna shi hpe san wu ai majaw Petru myit yawn nna, Madu e, Nang gaw yawng mayawng hpe chye nga ndai, ngai Nang hpe tsaw ra nga nngai gaw, Nang chye nga ndai, ngu nna htan wu ai. Yesu gaw, Nye a sagu ni hpe bau nga u. Nang hpe Ngai kaja wa teng teng tsun de ga. Nang shabrang nga ai hte yang na a hkum hpe nang dai shingkyit kyit nna, sa mayu ai shara shagu de sa lu ndai: rai ti mung, nang dingla jang chyawm gaw, na a lata yan hpe nang lalam nna, masha kaga gaw nang hpe kyit ya nhtawm, nang n ra ai shara de woi sa wa na rin dai, ngu nna shi hpe tsun wu ai. Shing nga tsun ai gaw, Petru gaw kaning re ai si lam hte Karai Kasang a hpung shingkang shapraw lu na hpe, tau nna tsun ai rai nga ai. Ga dai tsun ngut jang, Yesu gaw, Petru hpe, Ngai kaw hkan nang rit, ngu wu ai.

PASKA LADAW HTA LABAN 2 NA MUNGGA

Madu Yesu a sape ni gaw shanhte a ning baw rai nga ai Madu Yesu wudang ntsa hta jen noi si hkrum ai hpang kam hpa shara, myit mada shara shamat kau nna myit garen gari hkrum let hkrit gari taw nga ma ai. Dai aten hta bai hkrung rawt ai Madu Yesu gaw shahte a kaang kaw du sa nna Chyoi Pra ai Wenyi hpe jaw ya sai rai nga ai. Dai aten kaw nna sape ni gaw Chyoi Pra ai Wenyi a n-gun atsam hte myit mada shara bai lu nna shahte a asak aprat a matu myit mada shara hte n-gun atsam bai lu la sai re.

Shinggyim masha ni a asak aprat hta tinang htang tawn da ai hte maren nbyin wa ai, myit mada shara shamat kau ai aten ahkying ngu ai gaw galoi mung hkrum hkra chye nga ai. Ndai zawn re ai ahkying aten hta Karai Kasang hpang de si shang na matu nmai malap nga ai. Hpa majaw nga yang Karai Kasang gaw yawng hpe dang di dang dep ai wa re ai majaw anhte a matu kam hpa shara majing, kam hpa shara kaja rai nga ai.

Bai hkrung rawt ai Madu Yesu gaw hkrit tsang taw nga ai sape ni hpe n-gun atsam bai jat jaw ya ai zawn myit hkri lit li hkrum nga ai anhte ni hpe mung n-gun atsam jaw let lam madu ya mai nga ai. Dai rai yang bai hkrung rawt ai Madu Yesu hpe kam hpa ai anhte gaw myit ru myit tsang hkrum hkra nga ai ahkying aten hta Chyoi Pra ai Wenyi a n-gun atsam hpe jaw ya nna yak hkak ai lam ni yawng hpe lai di lu ai chye ju hpe grau nna ndai Paska Ladaw hta hkam la lu u ga.

N MU LU TIM KAM SHAM AI NI GAW A LU MA AI

Ngai a Madu, ngai a Karai Kasang e’
Hkrung rawt sai Madu Yesu hpe hpang jahtum mu hkrum ai sape wa gaw, Shalai wa ai poi hte, Yerusalem mare de shawng shawng rau hkan nang ai wa rai nga ai. Lazaru machyi makaw hkrum ai majaw sa kawan na Madu Yesu tsun ai shaloi, ‘Shi hte rau si nang na, anhte mung hkan nang sa ga’, (Yh 11:16) nga nna tsun ai mung kasa Htawma rai nga ai. Madu Yesu hpe grai tsawra hkungga ai majaw, Htawma gaw Madu a nni nkri hkam ai ten hta makau kaw nga lawm na n-gwi nu ai. Madu Yesu si hkam ai hpang, myit htum, yawn hkyen ai hte Sape manang ni kaw nna tsan ai de hkawm pru mat wa ai mung Htawma a shut ai lam rai sai. Dai aten hta, shi hkrai sha nga hkawm na hpe Htawma grau ra sharawng kau sai.

Hkrung rawt sai Madu Yesu hpe mu ai ‘numsha’ ni hpe mung, Sape manang ni hpe mung, n kam ai myit rawng kau nu ai. Sape manang ni hte rau jawm pawng nga na matu n-gun bai lu ai hte wa ai shaloi, Madu Yesu gaw, teng sha bai hkrung rawt sai am hpe sa madun nu ai. Shi a Sara hpe chye mu la ai hpang, Yesu gaw teng wa Madu hte Karai re ai hpe tsun jahtau nu ai mung Htawma rai nga ai. 

Makam masham a chyeju jaw e, anhte ni mung, Madu Yesu hpe, hkum nan a Madu hte Karai re ai lam tsun shapraw ra nga ai. Shi Madu a si hkam ai hte bai hkrung raw tai marang e, anhte ni mung Asak nnan lu la na rai nga ai. Chyoipra ai Wenyi a marang e, Madu hta asak prat nnan lu la nna, bai hkrung rawt ai Atsam hta rau hkawm sa lu na matu, anhte pe Madu jaw ya nga ai. Karai Kasang a Mungga hte Chyoipra ai Wenyi a atsam hpe nang kam sham ai kun? 

Madu Yesu Hkristu e, shut hpyit mara hte si hkrung si htan hpe dang kau ai marang e, shut hpyit mara hte nsin hpe dang manga kau lu na atsam lu la sa ga ai. Nang Madu a Sak hkrung Mungga hta kam hpa nga let Nang hte ani sha nga lu na, ngai hpe garum la rit. Nang Madu a bai hkrung rawt ai Atsam hta myit mada nga na hte, Nang Madu a gasadi ni hpe kam sham lu na ngai a makam hpe, Chyoipra ai Wenyi a marang e, atsam ningja jat bang ya rit law!!! 

PASKA LADAW HTA LABAN 2 NA CHYUM LAIKA

3th April. 2016

CHYUM MUNGGA DAW 1 

KASA 5: 12-16

‘Kam sham ai numsha lasha hpung kaba Madu kaw jat bang wa ma ai.’

Kam sham ai masha nlang hte gaw, myit langai sha hte Sawlumon mying ai jarawp hta zuphpawng nga ai. Masha gale kadai mung shanhte a zuphpawng hta n lawm wam ma ai; mung masha ni chyawm gaw shanhte hpe sha-a ma ai rai nna, kam sham ai numsha lasha hpung kaba, Madu kaw jat bang wa ma ai. 

Ya, Kasa ni a lata hta lamik kumla hte mauhpa amu law law wa, mung masha ni a man e byin dan nga ai. Dai rai nna, Petru lai sa wa yang, langai ngai a ntsa e shi a shingnip sha pyi hkra u ga nga nna, machyi makaw hkrum ai ni hpe mare lam makau de hpai shapraw, yup ku ni hte panep ni hta tawn da shajang ma ai. 

Dai hta kaga, Yerusalem grup yin ginwang hkan na mare ni kaw nna mung, masha law law wa machyi ai ni hte nat shang zingri ai ni hpe woi nna, du sa shajang ma ai: dai ni yawng hte gaw shamai shatsai ai hkrum ma ai.

CHYUM MUNGGA DAW 2 

SHINGRAN 1: 9-11a. 12-13. 17-19

‘Ngai si mat wa sai; rai ti mung, ya e, htani htana ngai a hkrung nga nngai.’ 

Anhte nlang Yesu hte matut mahkai ai hkrum nga ga ai rai nna, ngai Yawhan gaw nanhte a hpu nau wa rai nga nngai: shing rai nanhte a nni nkri, nanhte a mungdan, nanhte shakut sharang ai lam hta mung, ngai hkan lawm nga nngai. 

Ngai gaw Karai Kasang a mungga hkaw dan ai hte Yesu a matu sakse hkam ya ai majaw, Patmu ngu ai zunlawng hta nga nga nngai. Madu a nhtoi langai mi hta Wenyi a jaw e ngai nawng mat wa ai rai nna, nang mu ai hte maren laika hta ka da u nga nna, nye a shingdu de pahtau zawn ngoi ai nsen hpe ngai na la se ai.
Dai ngai hte shaga ai nsen hpe mu lu hkra, ngai kayin yu 

nngai. Shingrai kayin yu yang ja pyengding sanit hte dai pyengding ni a ka-ang e Masha Kasha zawn san ai wa langai mi hpe ngai mu nngai: dai wa gaw lahkre du ai palawng galu bu hpun nna, sinda hta ja shingkyit kyit nga ai. 

Dai wa hpe mu jang, Shi a lagaw nhpang e si ai wa zawn ngai kadawng taw mat nngai. Shi gaw Shi a hkra lata nye a ntsa e mara ya nna, ngai hpe tsun ai gaw: 

Hkum hkrit et; Ngai gaw Ningshawng Wa mung, Jahtum Wa mung rai nga ai hte, Ahkrung nga ai Wa rai nga nngai. Ngai si mat wa sai rai ti mung, ya e htani htana prat dingsa ngai a hkrung nga nngai: si hkrung si htan mungdan a sumsaw hte katsan ga na sumsaw hpe ngai lang nngai. Dai re ai majaw nang mu lu sai hpe mung, ya byin nga ai hpe mung, htawm hpang de du na ra ai lam hte hpe mung, ka da u, nga ngai hpe tsun ni ai. 

KABU GARA SHIGA 

YAWHAN 20: 19-31

‘Dai hpang matsat ya du jang, Yesu sa du nna, shanhte a ka- ang e tsap nga ai.’

Dai laban bat a shawng shani na nsin rim e, Yuda masha ni hpe hkrit ai majaw, sape ni hpawng nga ai nta e chyinghka la da sayang, Yesu shanhte a ka-ang e sa du tsap let, Nanhte ngwi pyaw nga myit ga, ngu nna shanhte hpe tsun mu ai. Shing nga tsun nhtawm, Shi a lata hte garep shanhte hpe madun dan wu ai. Sape ni mung, Madu hpe mu lu yang, kabu gara nga ma ai. Bai, Yesu gaw, Nanhte ngwi pyaw nga myit ga; Nye Wa Ngai hpe shangun dat ai hte maren, Ngai mung nanhte hpe shangun dat made ai, ngu mu ai. 

Shing nga nhtawm sape ni a ntsa e Shi a nsa kawut nna, Chyoi pra ai. Wenyi hpe hkap la mu; kadai a shut hpyit mara hpe rai ti mung, nanhte raw dat yang gaw, raw mat na ra ai; kadai a shut hpyit mara rai ti mung, nanhte shagun da yang gaw, dai mara naw nga na ra ai ngu nna shanhte hpe tsun mu ai. 

Shing rai Yesu sa du ai shaloi, kasa shi lahkawng hta lawm ai marun ma ngu ai Htawma gaw, shanhte rau n nga ang ai. Dai rai nna kaga sape ni Shi hpe, Anhte gaw madu hpe mu lu saga ai, ngu nna tsun dan mu ai. Shi chyawm gaw, Shi a lata hta hpri hkang hpe ngai n mu, dai hpri hkang hta nye a layung ngai n shawn yu, Shi a garep hta nye a lata n bang yu yang gaw, ngai n kam n sham na nngai, ngu nna shanhte hpe tsun wu ai. 

Dai hpang matsat ya du jang, shi a sape ni nhku e bai hpawng nga ma ai rai nna, Htawma mung shanhte hte rau lawm nga ai. Chyinghka la da ti mung, Yesu sa du nna, shanhte a ka-ang e tsap let, nanhte ngwi pyaw nga myit ga law, ngu wu ai. Shaloi, shi gaw Htawma hpe, Na a layung nang de ladawn nna, Nye a lata hpe yu yu u; na a lata ladawn nna, nye a garep hta bang yu u; n kam n sham ai myit hpe kau da nna, kam sham nga u, ngu wu ai. Dai rai nna, Htawma gaw, nye a Madu, nye a Karai Kasang rai nga ndai, ngu nna Shi hpe htan wu ai. Yesu gaw, Htawma, nang Ngai hpe mu lu ai majaw kam sham nit dai; n mu lu ti mung kam sham ai ni gaw a lu ma ai, ngu nna shi hpe tsun wu ai. 

Ndai laika hta n ka da ai lamik kumla kaga law law mung, Yesu gaw Shi a sape ni a man e galaw dan nu ai; rai ti mung, Yesu gaw Karai Kasang a Kasha Hkristu rai nga ai hpe anhte kam sham nna Shi a amying ningsang a marang e asak hkrung ai lu la myit ga, nga nna, ndai hte wa ka tawn nga ai.