PASKA LABAN NA MUNGGA

Dai ni na nhtoi hta e Madu Yesu Hkristu si ai kaw nna hkrung rawt ai Paska Poi hpe galaw nga ga ai. Ndai poi gaw Shi Madu hpe kam sham ai ni a matu ahkyak dik htum ai poi rai nga ai. Poi ni law law nga ai hta e Paska Poi gaw lachyum sung dik ai poi rai nga ai.

Madu Yesu si ai kaw nna hkrung rawt ai gaw anhte a makam masham a matu ahkyak dik htum ai rai nga ai. Shi gaw htani htana ahkrung nga ai asak Madu hte anhte hkye hkrang la hkrum na matu Kawa Karai Kasang shangun dat hkrum ai hte shi a asak aprat hpe nawng nna anhte hpe hkye hkrang la sai rai nga ai.

Ndai poi hpe galaw sa ai shaloi Lu Sha Gam ladaw hpe lai di hkyen lajang let galaw sa ai rai nga ai. Tinang a hkum hpe ndang nyet kau ai, nkyu hpyi ai hte mai kaja ai lam ni hpe galaw sa let hkyen lajang lai wa sai rai yang anhte prat a matu manu dan ai hte shang lawm lu na rai nga ai. Tinang a hkyen lajang ai lam ni hta madung nna kade daram akyu lu ai, myit dik myit pyaw ai ngu ai hpe hkam la lu na re.

Ndai Paska poi hpe galaw sa ai shaloi Shi Madu gaw Karai Kasang rai nga ninglen ru yak jam jau hkrum nna mungkan masha ni hpe hkye hkrang la sai zawn anhte hkrum hkra nga ai ru yak jam jau ai lam ni gaw anhte a makam masham hpe shangang shakang ya ai rai nna awng dang ai ngu ai hpe lu la na matu yak hkak ai lam hpe lai di ra ai lam dum shai nna shakut shaja let bai hkrung rawt ai ngu ai awng dang ai lam hpe masha hkum shagu hkam la lu u ga.

HKRUNG RAWT SAI MADU YESU HPE MATUT N NA NAWHKU DAW JAU NGA GA.

Madu Yesu si hkam ai hpang masum ya nhtoi hta, Shi a sape ni hpa hpe hkrum katut sai kun? Nni nkri hkam ai manga ya shani, wudang pawt kaw nga ai numsha ni mung hpang jahtum hkungga jaw ai lam galaw na matu laban jahpawt hta lup de sa ma ai. Sape ni chyawm, yawng gaw myit ru yawn hkyen hpa ngut ma sai, ngu sawn la ma ai. Dai myit mada shara htum mat sai sape ni hpe, Madu Yesu gaw gasadi jaw da ai hte maren hkrung rawt sai hpe kam sham na lamu kasa ni shadut shadum ya sai. Ndai kabu gara shiga hpe chye madat na matu n mai byin sai. Sape ni a myit masin gaw yawn hkyen ai, n kam ai hte hpring nga ai. Mau n ma re ai hte sha kaga sape ni hpe kabu gara shiga gam garan ya sai. 

Madu Yesu bai hkrung rawt ai hpe shawng shawng sakse myi chyaw mu mada ai ni gaw ‘num sha ni’ rai nna sape ni n rai nga ai. Dai hpe, ‘Num (Ewa)’ gaw shawng nnan na si ai hpe hkrum sha sai zawn, num (Maria Magdalena) gaw Asak ngu ai hpe shawng hkrum lu sai. Shawng shawng na hkrat sum lam hta num sha tau nau chye ai zawn, hkye hkrang la hkrum na lam yan nnan hta mung num sha she shawng chye ai rai sai. 

‘Nlung tawng’ yen galau kau ai gaw, hpa lamik kumla rai sai kun? Masha law law kanawng yang she mai byin ai, hpyen la ni dazik gayet shakap da ai hte zawng nga ai, nlung rai nga ai. Teng sha wa, dai lam gaw, bai hkrung rawt ai lam a shawng nnan na kumla rai nga ai. ‘lamu kasa ni, dai nlung tawng hpe hpaw sit kau ya ai gaw, Madu Yesu a lam jasan ya na sha n rai, hkrung rawt mat sai lam hpe sakse sak gan tawn da na matu rai sai. Hkawn sek a hkritung gaw pat nga ai zawn, lup sung hku chyinghka mung pat nga ai. Tim, dai pat da ai hkritung hku nna mungkan ga de shi shang wa ai zawn, pat da ai lup sung hku hta nna bai pru mat wa ai. 

Hkrung rawt sai lam hpe hkam sha lu na matu gaw, anhte a masin salum hta rawng nga ai nlung ni hpe shawng la kau ra na re. Hkrung rawt ai lam a kabu gara ai hpe nang chye nga ai kun? 

Ahkyak ai lam langai gaw; lama na, Madu Yesu si ai kaw nna bai n hkrung rawt ai sha, Sape ni kaw mung n dan pru dan ai rai yang, anhte ni Madu Yesu a lam hpe galoi mung na yu na sai n rai? Myit htum let yawn hkyen nga ai dai sape (num, la) ni hpe kabu gara ai hte myit rawt wa hkra hpa mung n galai shai ya lu ai. Madu Yesu, si ai kaw nna bai hkrung rawt sai ngu ai tengman ai lam gaw, Hkristan makam masham a akri madung rai nga ai. Chyoipra ai Wenyi a marang e, Shi Madu hpe chye lu na hte hkrung rawt wa sai lam hpe chye chyang lu na, ‘makam myit’ Madu Yesu, anhte hpe jaw ya sai. 

Hkrung rawt sai Madu Yesu hte hkum nan hkrum matut nna chye chyang nawku lu na gaw kabu pyaw dik ai lam rai sai. Shut hpyit mara hte si hkrung si htan hpe dang manga kau lu ai; ‘Awng Padang’ rai nga ai. Paska poi hpe chyeju dum ai myit, kabu gara ai myit hte nang shagrau shaa nga ai kun? 

Madu Yesu Hkristu e, prat nnan, anhte hpe Nang Madu jaw ya sai. Na a hpung shingkang hta, Madu hpe mu lu na ‘makam myit’ ngai hpe mung jaw ya rit. Nang Madu hte ani sha nga nna, Na a Tsawra myit kaba hte Arawng sadang hpe chye chyang lu na ngai hpe sharin ya e law!!! 

PASKA LABAN NA CHYUM LAIKA

27th March. 2016

YESU BAI HKRUNG RAWT AI NHTOI

CHYUM MUNGGA DAW 1

       KASA LAIKA 10: 34a. 37-43

‘Hkristu si ai kaw na bai hkrung rawt ai hpang, Shi hte rau lu sha ai ni anhte nan rai nga ga ai.

Dai aten hta e, Petru ga hpaw nna, shanhte hpe hkaw tsun dan mu ai gaw. Yawhan kashin kamun lam hkaw dan ai hpang, Galile mung kaw nna, Yuda mung ting kajai gara wa ai lam hpe, nanhte nan chye nga myit dai: dai gaw, Nazaret na Yesu a lam rai nga ai. Karai Kasang gaw, Chyoi Pra ai Wenyi hte mung, n-gun atsam hte mung, Shi hpe chya ya u ai; Karai Kasang shi hte rau nga nga ai majaw, mai kaja ai amu ni Shi galaw nna, nat gumlau e zingri zingrat hkrum ai ni yawng mayawng hpe shamai ya let kawan katsan hkawm nga ai. 

Shing rai, Yuda masha ni a mung hta e mung, Yerusalem mare hta mung, shi galaw ai amu yawng mayawng a sakse ni anhte rai nga ga ai: dai wa hpe nan shanhte hpun hta jen sat kau mu ai; Karai Kasang chyawm gaw masum ya nhtoi hta Shi hpe jahkrung sharawt la wu ai rai nna, mung masha yawng a man e n rai, Karai Kasang shawng e lata san da sai sakse ni gaw, si ai kaw na Shi bai hkrung rawt ai hpang e, Shi hte rau lu sha ai ni anhte nan rai nga ga ai. 

Shi Madu nan mung, Hkrung ai ni hte si sai ni a tara agyi tai na, Karai Kasang san da ai wa rai nga sai lam, mung masha ni hpe tsun dan let sakse hkam ya na matu, Shi anhte hpe hkang da mani ai. Myihtoi mahkra mung Shi a mying ningsang a marang e, mara raw dat kau ya ai hkrum na mara ai, nga nna tsun dan ma ai. 

CHYUM MUNGGA DAW 2 

KOLOSE 3: 4.

‘Hkristu nga nga ai lamu mungdan na lam ni hpe tam nga mu.

Hpu nau ni e, Nanhte Hkristu hte rau teng man ai asak de bai rawt wa manit dai majaw, Hkristu gaw, Karai Kasang a hkra maga e dung nga ai lamu mungdan na lam ni hpe tam nga mu. Ga ntsa na lam ni hpe myit hkum manoi mu; ntsang mungdan a lam ni hpe myit manoi nga mu. 

Kaning rai nme law, nanhte si mat ai ni rai nga myit dai rai nna, nanhte a asak Hkristu hte rau Karai Kasang hta e kyem da nga ai. Anhte a asak ngu ai Hkristu gaw dan pru wa ai shaloi e, nanhte mung Shi hte rau hpung shingkang hta dan pru na marin dai. 

KABU GARA SHIGA 

YAWHAN 20: 1-9. 

Dai laban bat a shawng shani e, nhtoi garai n htoi yang, Maria Magdalena jau jau e lup de sa wa ai rai nna, lup chyinghka la ai nlung sit mat nga ai hpe mu wu ai. 

Dai majaw shi gaw Simun Petru yan Yesu tsaw ra ai sape hpang de gat wa nhtawm, Madu hpe lup de na shanhte la nna, kanang e tawn da mu ai hpe anhte n chye ga ai, ngu nna, shanhte hpe tsun mu ai. 

Dai majaw Petru yan kaga sape pru nna, lup de sa wa ma ai. Shan rau gat sa wa yang, kaga sape gaw Petru hpe gat lai kau da nna, lup de shawng sa du ai: shaloi shi gum yu wu yang, sumpan gin-yan taw nga ai sha mu wu ai; rai ti mung, shi kata de n shang ai. Simun Petru chyawm gaw shi a hpang e hkan gat nang nna, dai de du jang, kata de shang yu wu ai. Sumpan gin-yan taw nga ai mung, baw na hpajet gaw sumpan hte rau n re ai, kaga ga rai nna katsu taw nga ai mung, shi mu wu ai. 

Dai majaw, lup de shawng du ai, kaga sape mung hkan shang wa nna, mu lu ai hte kam sham wu ai. Kaning rai nme law, Yesu gaw si ai ni kaw na bai hkrung rawt wa na ra ai nga nna, Chyum laika hta rawng nga ai hpe ndai ahkying du hkra, shanhte n chye madat ma ai.

SAN SENG AI MYIT MASIN HTE YESU HPE HKAP HKALUM LA GA

Hpung shingkang a hkawhkam wa, na a dum nta, myit masin de shang wa lu na lam tam mu sai kun?

Sadi run ai, n hkap la ai hte, wudang hta jen noi sat kau na lam ni ala nga ai hpe chye ning len, Madu Yesu, Yerusalem mare de lung wa sai. Yerusalem a masha ni chyawm gaw, Hkyela Madu Hkawhkam ngu nna shi hpe hkap pang hkalum ma ai. Dai Madu a mungdan lam hpe madun ya na, dai hkawhkam wa hta kade daram manu jahpu jaw ang ai hpe shanhte n chye ma ai. Madu Yesu, lawze kasha jawn let, Yerusalem mare de shang wa ai lam gaw; “Ziun shayi sha e, nachying kabu gara nga mu; Yerusalem shayi sha e, garu jahtau u, Yu u, na a hkawhkam wa nang hpang de du na ra ai, shi gaw ding hpring nga nna, hkye hkrang la ai lam shapraw nu ai, shi gaw sumnung ai myit rawng nna, lawze a ntsa e, rai sai, lawze kanu a kasha ntsa e, jawn nga ai” ngu ai myihtoi Zahkaria a ga dik wa sai lam rai sai.

Lawze kasha gaw simsa lam a kumla rai sai. Yerusalem mare de, sum nung ai hte shagrit shanem ai hte Madu Yesu shang wa ai gaw, amyu masha ni hpe ngwi pyaw simsa ai hte Awng dang lam jaw ya ai Hkyela Madu Hkawhkam wa zawn, rai sai. Dai awng dang lam hte ngwi pyaw simsa lam hpe gaw, wudang ntsa kaw si hkam ai hte bai hkrung rawt ai a marang e pahkam hkam ya sai.

“Shagrit shanem ai a Madu, Hkristu gaw, Wudang ntsa hta si hkam ai aten du hkra, shi a hkum hpe shagrit kau nna, madat mara wa sai. Shagrit shanem ai a lam anhte hpe sharin ya ai ten, Shi Madu a Karai atai hpe shayawm kau nu ai nrai. Prat shagu a hkawhkam wa, shagrit shanem ai a hkawhkam wa tai wa ai gaw mau hpa kaba rai nga ai kun?

KUNGLA SHAMAN AI LABAN NA MUNGGA

Dai ni na laban hta kabu gara shiga lahkawng hpe na la lu ga ai. Nawku jawng shawng kaw kungla shaman ai shaloi hti ai kabu gara shiga hta Madu Yesu hpe Hebre masha ni kabu gara hte hkap tau la ma ai. Rai tim mung, misa hkungga hta na la lu ai Kabu Gara shiga hta Madu Yesu hpe wudang hta jen noi shi hkam na matu mi na masha ni sha chyhtau hpyi shawn ai hpe na lu ga ai.

Kalang mi na aten hta shanhte a hkaw hkam wa ngu nna hkap la tim, kaga aten hta gaw dai hkaw hkam wa hten za na matu ra sharawng ai hpe mu lu ga ai. Shan hte kaja wa sha myit kraw kata na kam sham ai rai yang kaning re aten hta rai tim, manang ni kade gunglau ai rai tim myit galai shai na nrai nga ai.

Mai kaja ai lam hpe hkan shatup na matu, shing nrai tinang a makam masham hpe sakse hkam na matu gaw teng sha myit masin yawng n-gun hte kam sham yang she mai byin na rai nga ai. Dai nrai yang, yak hkak wa ai aten, manang ni a shadut shadang ai aten hta kaja ai amu bungli galaw na matu hprai mat chye nga ai.

Tinang kam sham ra ai lam hpe teng sha kam sham lu na matu hte galaw sa ra ai mai kaja ai lam hpe kaning re ai aten ahkying hta rai tim nhprai n-yet ai sha Karai Kasang a garum ya ai chyeju a jaw e hkan shatup sa wa lu u ga.

KUNGLA SHAMAN AI LABAN NA CHYUM LAIKA

KUNGLA SHAMAN AI SHALOI KABU GARA SHIGA 

LUKA 19: 28-40 

Dai aten hta, Yesu gaw Yerusalem mare de lung wa ai. Ya, Tsanlun ngu ai bum na Bethpage kahtawng hte Bahtani kahtawng de du magang jang, Shi sape lahkawng shangun dat nna, Nan a shawng na kahtawng de sa wa masu, dai de shang jang gade e mung garai n jawn yu ai lawze kasha dun nga ai hpe nan mu na mu ai: dai hpe raw nhtawm dun wa marit.
Masha langai ngai, dai hpa di raw myit ta? nga nan hpe san dam yang, Madu ndai hpe ra ai da, ngu nna htan mu, ngu matsun dat mu ai. Shangun dat ai yan gaw sa du nna, Shi tsun dat ai hte maren sa mu ma ai. Dai lawze kasha hpe raw nga yang, madu ni gaw, Dai lawze kasha hpe hpa di raw mu ta? ngu nna shan hpe san mu ai.

Shan gaw, Madu ndai hpe ra ai da, ngu mu ai. Shaloi shan gaw dai lawze kasha hpe Yesu hpang de dun wa nna, shanhte a hpun nba mara nhtawm, Yesu hpe shajawn mu ai. Shing rai Shi jawn sa wa nga yang, shanhte gaw tinang a hpun nba ni hpe lam e hkan nep ya ma ai. Ya mare du magang yang na Tsanlum bum kahtawng yu ai kaw du yang, sape hpung masha nlang hte gaw, shanhte mu yu sai magam atsam amu yawng a majaw, kabu gara let nsen kaba hte Karai Kasang hpe shakawn kungdawn ma ai gaw:

Madu a amying ningsang hte du sa ai Hkawhkam Wa gaw a nga ai law. Sumsing lamu e, ngwi pyaw ai hte tsaw htum ai shara e, hpung shingkang rawng nga u ga law, nga ma ai. 
Dai rai nna, dai hpung kata na, Hparishe ni nkau mi gaw, Sara e, Na a sape ni hpe daru kau u, ngu nna Shi hpe tsun ma ai. Shaloi, Yesu gaw, nanhte hpe Ngai tsun made ga, Ndai ni atsin sha nga ma yang gaw, nlung ni jahtau na rai nga ai, ngu htan wu ai. 

CHYUM MUNGGA DAW 1
ESAIA 50: 4-7
Ya hti na gaw, myihtoi Esaia a Laika hta na rai nga ai.
Hki ba ai wa hpe shalan shabran na chye wa lu hkra, Madu gaw sharin achyin hkam la ai ni a shinglet, ngai hpe jaw ni ai; jahpawt shagu Shi ngai hpe jasu nga ai: sharin achyin hkam la ai ni, na la lu ai zawn, Shi nye a ana hpe jasu ya nga ai. Madu gaw, nye a na hpe hpaw ya nna, ngai mung lale kau ai hte kanut mat wa ai n rai. Ngai gaw kayet ai ni hpe nye a shingma, shabyi mun baw ai ni hpe nye a shabyi ap ya nngai: kaya jahkrum ai hte mayen mahtaw bun ai kaw na nye a myi man kayin kau ai n rai.
Madu gaw ngai hpe garum na ra ai; dai re ai majaw ngai mak mat ai n rai; nye a myiman mung nhpai lung zawn ngai shatai nna, ngai kaya kahpa n hkrum na, ngai chye nngai.

CHYUM MUNGGA DAW 2 

HPILIPI 2: 6-11

Ya hti na gaw, Hpilipi masha ni hpang de San Pawlu shagun dat ai Laika hta na rai nga ai. Yesu Hkristu gaw Karai Kasang a ahpraw asam hta pra nga ti mung, Karai Kasang hte maren rai nga na shingjawng kashun ai hku n nawn ai sha, tinang dai shagawm kau nna, mayam a ahpraw asam dagraw let, shinggyim masha hte bung hkra tai wa sai: Shingrai masha a gawng shing-yan lang let Shi hkum hpe Shi shagrit kau nna, si ai du hkra madat mara nga ai, gaja wa Udang hta si ai du hkra madat mara nga ai. 
Dai re ai majaw, sumsing lamu lahta tang na dinghta tsang na hte katsan ga na lahput yawng mayawng hte gaw, Yesu a mying ningsang hte hput di nna, Yesu Hkristu gaw Madu rai nga ai, nga nna shinglet yawng mayawng hte gaw, Kawa Karai Kasang a hpung shingkang a matu mara kajai gumhkawng nga mu ga, Karai Kasang gaw Shi hpe shagrau nna, amying shingteng yawng mayawng hta grau ai amying nsang jaw da wu ai, rai nga ai.
Ya hti ai gaw Karai Kasang a mungga rai nga ai.

KABU GARA SHIGA

LUKA 23: 1-49. 

Ya hti na gaw, Luka ka da ai hte maren Kabu Gara Shiga hta na rai nga ai.
Dai shaloi, hpawng nga ai ni nlang hte gaw rawt nna, Shi hpe Pilatu hpang de woi bang nhtawm, Ndai wa gaw anhte a amyu hpe lam woi shadam ai hte, Kehta hkawhkam hpang de hkansi bang na lam hkum da ai nna, Shi hkum dai Hkristu ngu ai Hkawkam rai nga ai, nga nna tsun ai hpe anhte mu ga ai, ngu nna Shi hpe mara jaw mu ai.

Shaloi, Pilatu gaw, Yesu hpe, Nang Yuda masha ni a hkawhkam rai nga nni? ngu nna san wu ai; Shi gaw, Nang tsun ai hte maren ngai rai nga nngai, ngu nna htan wu ai. Pilatu chyawm gaw, Ndai wa hta hpa mara mung ngai n mu we ai, ngu nna hkinjawng agyi ni hte shawa masha ni hpe tsun wu ai.

Dai ni mahtang, Ndai wa gaw Yuda mung hte, Galile mung kaw nna ya nang du hkra, sharin shaga nga ai hte, mung masha ni hpe woi kabrawng wu ai nga nna grau tsun anin shadut ma ai.

Pilatu chyawm gaw, dai na jang Shi Galile masha re ai n re ai san la nhtawm, Herod up ai mung na masha re ai shi chye wu yang, Herod shi dai mung Yerusalem mare e dai ten e nga nga ai rai nna, Yesu hpe shi hpang de sa bang shagun wu ai.

Herod gaw Yesu hpe mu jang grai kabu nga ai. kaning rai nme law, Shi a lam na yu nu ai rai nna, Shi galaw dan ai lamik kumla langai ngai mu lu na, nga nna myit mada nga ai majaw Shi hpe mu mayu ai na la salu ai. Dai rai nna shi gaw Yesu hpe lam magup san yu wu ai. Rai ti mung, Yesu gaw ga hkaw mi mung n htan ya wu ai. Hkinjawng agyi ni hte laika ka ai sara ni chyawm gaw, rawt tsap nna Shi hpe mara grai grai jun da mu ai. Herod mung shi a hpyen masha ni hte Shi hpe aroi arip di nna jahpoi asawng nhtawm, reng ai hpun palawng jahpun nna, Pilatu hpang de bai sa shagun wu ai.

Dai shani jang Herod yan Pilatu gaw shada bai hkau ma ai: shawng de chyawm gaw shada myit kraw n ngawn hkat ma ai.

Shaloi, Pilatu gaw, hkyinjawng agyi ni, du ni hte mung masha ni hpe shaga jahpawng nhtawm, mung masha ni hpe lam woi shadam ai wa re ai nga nna, ndai wa hpe nanhte ngai kaw sa bang manit dai: ya yu mu, nanhte a shawng e ngai Shi hpe san yu we ai rai yang nanhte shagun ai mara lam hpa mung ndai wa hta ngai n mu we ai. Dai hta n-ga Herod mung hpa mung n mu wu ai: Shi gaw Ndai wa hpe anhte hpang de bai sa dat shangun ra ai. Dai rai nna, yu mu, ndai wa gaw hpa si ging ai amu mung n galaw wu ai; dai majaw ngai Shi hpe anu sharin nna dat dat na we ai, ngu nna shanhte hpe tsun wu ai.

Shing nga jang, shanhte nlang hte gaw, Dai wa hpe la kau u, Baraba hpe chyawm gaw dat ya mi, nga nna jawm jahtau ma ai: Baraba gaw mara e gumlau ai hte masha sat ai amu a majaw htawng hkrat ai wa rai nga ai. Pilatu gaw, Yesu hpe dat dat mayu wu ai rai nna, shanhte hpe bai shaga tsun wu ai. Rai ti mung, shanhte gaw, Dai wa hpe wudang hta jen da u, jen da u, nga nna jahtau nga ma ai. Dai rai nna, Pilatu gaw masum lang ngu na hta, bai tsun wu ai gaw, Ndai wa n hkru ai amu hpa galaw hkrum sata? Shi hta si ging ai mara ngai hpa mung n mu we ai: dai majaw ngai Shi hpe anu sharin nna dat dat na we ai, ngu nna shanhte hpe tsun wu ai.

Shanhte mahtang nsen kaba hte jahtau nna, Yesu hpe wudang hta jen da lu na lam atik anang hpyi shaja ma ai: Shing nga jahtau ai hte mung shanhte dang la ma ai. Dai majaw, Pilatu gaw shanhte hpyi ai hte maren rai u ga, nga nna daw dan ya mu ai. Shing nga Shi hpe shanhte hpyi ai hte maren, gumlau ai hte masha sat ai amu a majaw, htawng hkrat ai wa hpe dat ya nna, Yesu hpe gaw shanhte ra ai hku ap kau ya dat wu ai.

Yesu hpe shapraw sa wa nga ma yang, nam kahtawng de na wa ai Simun ngu ai Kureni mung masha langai mi hpe shanhte rim la nhtawm, wudang jahpai nna, Yesu a hpang e hkan nang shangun mu ai.Masha wunawng wuwa kaba hte, Shi a lam hkrap ngu hkrap ngoi, sharung shayawt nga ai numsha ni mung Shi a hpang e hkan nang ma ai. Yesu gaw, shanhte hpang de kayin nna, Yerusalem shayi sha ni e, Nye a majaw hkum hkrap myit; nanhte hkum dai hte nanhte a nshu nsha ni a matu hkrap nga mu: kaning rai nme law maudung num, na-um nasin n rai yu ai hkum hte, n chyu yu ai madoi chyu hpang gaw a nga lu ai, nga nna tsun na nhtoi du wa ra ai. Dai nhtoi e, bum ni hpe, anhte a ntsa daw kamyet mi, nga nna mung, kawng ni hpe anhte a ntsa e ka-up mi nga nna mung, shanhte shajang na mara ai.

Shanhte hpun katsing hta ning di ma yang gaw, hpun chyahkraw hta kaning wa di na mara ta? ngu mu ai. Dai shaloi damya lahkawng hpe mung sat kau na nga Shi hte rau woi shapraw sa wa mu ai.

Ya Pungkum ngu ai shara de du jang, shanhte gaw Shi hpe mung, damya yan hpe mung, Shi a hkra maga de langai mi, pai maga de langai mi di nna wudang hta jen da mu ai.
Shaloi Yesu gaw, Wa e, shanhte a mara dat kau ya mu: shanhte galaw ai lam hpe shanhte n chye nga ma ai, nga ai.

Shanhte gaw Shi a hpun palawng ni hpe mung, hpaida da nna karan la ma ai. Mung masha ni gaw mada yu let tsap nga ma ai. Du aya lu ai ni mung Shi hpe asawng asang nga nna, Masha kaga hpe Shi hkye la ga ai, ndai wa gaw Karai Kasang a Hkristu ngu ai, Karai Kasang lata la ai wa rai yang gaw, Shi hkum dai Shi hkye la u ga, nga ma ai. Hpyen masha ni mung sit sa nna ntsin hkri ladawn nhtawm, Nang Yuda ni a hkawhkam rai n yang gaw, Na hkum dai Nang hkye la u nga nna Shi hpe roi ma ai. Shi a ntsa e mung, ‘Ndai wa gaw Yuda ni a Hkawhkam rai nga ai, nga nna Laika shakap da nga ai.

Wudang hta noi nga ai damya langai mi mung, Nang gaw, Hkristu n rai nni? Na hkum dai hte an hpe mung hkye la mi, ngu nna Shi hpe roi wu ai. Langai wa mi chyawm gaw, Nang mung daw dan ai ndai hte wa hkrum da ninglen Karai Kasang hpe pyi n hkrit nni? An gaw tinang a mara majaw hkrum ging ai hte maren daw dan ai hkrum ga ai: Ndai wa chyawm gaw, n tsun n ang ai lam hpa mung galaw wu ai n rai, nga nna dai wa hpe daru let htan wu ai.

Shing nga nhtawm, Shi gaw, Yesu e, Nang Na a Mungdan hta du wa yang ngai hpe dum rit law, ngu nna hpyi wu ai. Shaloi, Yesu gaw, Ngai nang hpe teng teng tsun de ga, dai ni jang, nang Ngai hte rau Hparadisu e nga na rai nga ai, ngu nna shi hpe htan wu ai.

Ya gaw ahkying kru daram rai nga ai rai nna, jan a ahtoi nip mat ai majaw, hkying jahku du hkra mung ting nsin chyip rai mat ai; nawku htingnu na nba grang mung ka-ang brang rai ga mat ai.

Shaloi Yesu gaw, Wa e, nye a wenyi Na a lata hta ngai ap ya de ai, nga nna nsen kaba hte jahtau wu ai: shing nga tsun ngut jang, Shi nsa hti mat ai. Shing rai byin ai lam ni hpe hpyen latsa up ai du wa mu wu yang, Gaja wa teng teng Ndai wa gaw, ding man ai wa rai nga ai nga nna Karai Kasang hpe shagrau sha-a wu ai.

Dai lam yu na nga, sa hpawng ai masha nlang hte mung, shing rai byin ai lam ni hpe mu mu yang, sinda adup let bai wa ma ai. Shi hpe chye machye ni hte, Galile mung kaw nna Shi kaw hkan nang sai num ni gaw tsan tsan e tsap nna, dai lam ni hpe mada yu let nga ma ai.
Ya hti ai gaw Madu a Kabu Gara Shiga rai nga ai.

LUSHA GAM LADAW LABAN (5) MUNGGA

Lusha gam ai aten ladaw hta tinang a hkum hpe ndang nyet kau nna nkaja ai lam ni hpe koi gam let mai kaja ai lam ni hpe shakut shaja galaw sa ai aten rai nga ai. Nkaja ai lam ni hpe koi gam ai shaloi tinang a hkum hpe dingbai dingna jaw ai lam ni sha nrai, manang ni hpe nkaja ai lam n galaw na matu mung shakut shaja ra nga ai.

Maga mi hku nna mada yu yang manang wa a mai kaja na hpe yu nna garum shingtau ai lam rai nga ai. Dai rai yang manang ni hpe dingbai dingna jaw ai lam ni, manang ni hpe grau nna jahten ai lam ni hpe koi gam ra nga ai.

Kabu Gara shiga hta masha wunawng mi gaw nkaja ai amu galaw hkrup kau ai num sha hpe jeyang daw dan mayu nga ai. Jeyang daw dan ai hte mara dam lu na matu gingdan ai rai tim jeyang daw dan ai hte masha langai mi hpe galai shai shangun mayu tim galai shai na matu yak hkak nga ai. Shi a mara ni hpe htawm hpang de koi gam kau lu na matu Madu Yesu gaw tsaw ra myit hpe madun dan let n-gun jaw shadum lai wa sai. Ndai num sha a prat hta manu dan ai mahkrum madup langai teng sha byin wa nna galai shai na matu n-gun atsam jaw ya na sai re.

Dai rai yang ndai lu sha gam ai ladaw hta manang ni shut shai wa ai aten hta tsaw ra myit hpe madun dan shadum jahprang let Karai Kasang hpang de bai nhtang wa ai hkrun lam hta garum shingtau ya ai jet ai htingbu kaja ni byin tai wa lu u ga.

MADU YESU A CHYAHTUM CHYALAI CHYE CHYANG AI NHTOI HTA HKAWM SA GA

“Kaja wa ngai a Madu Hkristu Yesu a chye chyang ai lam a chyahtum chyalai ai a jaw e, yawng mayawng sum mat ai lam arai nga ai, ngai nan nawn nga nngai” (Hpil 3:8)

Madu Yesu hte mahku mara lu la ai majaw, kasa Pawlu a prat hta , shi a manu shadan ai lam ni shai mat sai. Lai mat sai aten, shi ahkyak da sai lam ni gaw, Kaman li la sha rai mat sai. Anhte yawng hta, ‘chyahtum chyalai chye chyang ai lam’ rawng nga ai. Anhte a pyaw daw kadaw mayu ai lam ni gaw yawng hpe ka-up chye nga ai. Masha law malawng hta, Hkristan ni hta pyi, malu masha, poi hkying ni, TV lamang, gumhpraw, ni gaw tsaw dik manu shadan hkrum ai. Ndai lam ni gaw, yawng mayawng hpe ka-up kau chye nga ai. Myit ru yawn hkyen lam hte si hkrung si htan hpe ‘chyahtum chyalai machye machyang’ ngu nna hkam sha chye ga ai. Dai lam gaw anhte a shadawn shadang hpe galai shai ya ai. Si hkrung si htan lam hta, anhte a nga pra lam sum mat ai ngu shadawn ga ai. Anhte a sak prat sum mat sai, ngu yawn n wai rai chye ai. Lai mat wa sai sak hkrung lam a gaman lila, mana bu ai lam ni, a majaw, daw dan hkrum ai ngu hkam sha ai.

Rai tim, si hkrung si htan, yawn hkyen ai hpe chye chyang ai lam hpe, pyaw pyaw rai nna sawn sumru tawn ai hpe nan Madu Yesu hpe hkum nan chye chyang ai lam gaw kaup kau lu ai. Madu Yesu hta anhte a prat hpe tsep kawp ap nawng tawn da ai rai yang, lai wa sai aten na prat hpe daw dan hkrum na nrai. Myit tsaw myit dep ai lam ni hte myit yawn myit malai ai lam ni yawng hkoi mat na re. shaloi anhte gaw; ‘hpang maga na arai hte hpe malap kau nna, man ang ai arai ni hpe chyan la let’, hkawm sa lu na. Hkristu hta ap nawng da sai prat gaw lachyum n pru rai na n rai, teng man ai myit dik lam rai nga ai. Madu Yesu hpe chye la lu ai anhte a masin a majaw, prat gaw shingjawng poi rai nna, myit htum shara n rai. Madu Yesu hta chyahtum chyalai chye chyang ai nhtoi hta anhte hkawm sa ga. 

“Karai Kasang e, Madu Yesu Hkristu a bai hkrung raw tai lam kaw nna lwi hkrat ai chyeju hpe chye mayu nngai law. Si mat ai ni a bai rawt wa na lam hta ngai mung dep lu hkra, Shi hte shi a bai rawt ai lam a atsam chye lu nna, Shi Madu a nni nkri hkrum ai hta kanawn lu na hte, Shi a si hkam ai hpe hkan dagraw lu u ga”, ngu hpyi nngai law.

LUSHA GAM LADAW LABAN (5) NA CHYUM LAIKA

13th March. 2016

CHYUM MUNGGA DAW 1 

ESAIA 43: 16-21. 

‘Yu mu, amu nnan ngai galaw na nngai; nye a amyu masha ni hpe luhpa jaw na we ai.’

Ya hti na gaw, myihtoi Esaia a Laika hta na rai nga ai.

Madu ning nga ai: Nammukdara hta lam waw nna, hka kaba ni hta lam hpaw ai wa; hpyen leng ni hte gumra ni hte hpawn, hpyen luksuk ni hte share ninghkring ni hpe si mat ai wan shat zawn jasim na matu, shanhte n rawt lu hkra, jahten shabyak ai de woi sa ai wa ngai rai nga nngai. 

Moi na amu hpe nanhte n dum ra myit dai; chyaloi nhkoi na lam ni hpe n gawn ra myit dai. Yu mu, amu nnan ngai galaw na nngai; ya pyi byin pru na ra ai; dai hpe nanhte n mu lu myit ni? Gaji wa, nam mali hkan e nmaw lam, hkraw hkun ai shara e hkanu hkashi, ngai shapraw na we ai. 

Nam na ashu ashan ni mung, nam gwi ni hte u gawla-uk ni mung, ngai hpe shagrau na mara ai; kaning rai nme law, ngai lata la ai amyu masha ni luhpa lu na matu, nam mali hkan e hka hpung ni, hkraw ai shara e hka nu hka shi, shapraw na we ai. Nye a matu ngai san da ai amyu masha ndai gaw ngai hpe shakawn kaungdawn nga na mara ai.

Ya hti ai gaw Karai Kasang a mungga rai nga ai.

CHYUM MUNGGA DAW 2 

HPILIPI 3: 8-14. 

‘Hkristu hpe lu la nna, Shi hta grin nga lu yang gaw, ngai sum mat ai yawng mayawng hte hpe shanut shanaw zawn nawn nga nngai.’ Ya hti na gaw, Hpilipi masha ni hpang de San Pawlu shagun dat ai Laika hta na rai nga ai. Hpu nau ni e, Nye a Madu Hkristu Yesu hpe chye chyang ai lam hta; grau kaja ai lam kaga n nga ai , ngai nawn nga nngai; gaja wa, Hkristu a matu ngai yawng mayawng hte hpe sum kau ni ai. Shi hpe lu la nna, Shi hta grin nga lu yang gaw, ngai sum mat ai yawng mayawng hte hpe shanut shanaw zawn nawn nga nngai. 

Ya kaw nna jep ai tara a hkum tsup ai lam ngai n hkan tam nngai; Hkristu hpe kam sham ai a marang e, makam masham hta ru jung nna, Karai Kasang kaw na lu la ai hkum tsup ai lam hpe ngai ra sharawng nngai. Hkristu hte Shi a bai hkrung rawt ai lam a atsam chye lu nna, Shi si hkam ai shaloi na myit marai hpe grau nna dagraw la ai a marang e, Shi hte rau nni nkri jawm hkam la ai lam hpe chyu sha, ngai myit ndawt nga li ai. Ngai dai hku hkan lu yang gaw, si ai kaw na bai hkrung rawt wa ai ni hte rau ngai hkan lawm lu na nngai.

Shing rai tsun yang, ngai ya e pyi hkum tsup rai nga ai hpe n tsun nngai: ngai garai n awng ai ni; rai ti mung, Hkristu Yesu ngai hpe kumhpa jaw na matu hkap la ni ai hte maren, dai hpe ngai nan hkap la lu u ga gat shachyut nngai.

Hpu nau ni e, ngai ya e pyi awng ni ai, ngai teng teng n myit nngai. Lam langai sha ngai tsun lu nngai: hpang na lam hte hpe malap kau nna, shawng na lam ni hpe hkan chyan la nngai. Hkristu Yesu hta e sumsing lamu de na kumhpa hpe lu la na matu, Karai Kasang anhte hpe shaga la sai hte maren, awng padang shadaw du hkra ngai gat shachyut nngai.

Ya hti ai gaw Karai Kasang a mungga rai nga ai.

KABU GARA SHIGA 

YAWHAN 8: 1-11 

‘Mara n lu ai wa gaw shawng nlung hte kabai u ga.’

Ya hti na gaw, Yawhan a Laika hta na Kabu Gara Shiga rai nga ai.

Dai aten hta e, Yesu gaw Tsanlun Bum de sa mat wa ai. Hpang jahpawt jau jau e Nawku Htingnu de Shi bai sa wa ai rai nna, masha nlang hte Shi kaw sa ma ai; shi dung let shanhte hpe sharin shaga 

nga ai.Shaloi tara sara ni hte Hparishe ni gaw, shut hpyit nga ai masha num langai mi hpe dun sa nna, ka-ang e shatsap tawn da nhtawm, Sara e, ndai numsha hpe shut hpyit nga yang mu hkrup saga ai; ndai zawn re ai numsha hpe, nlung hte kabai sat kau lu na re ai, nga nna Mawshe gaw jep ai tara hta anhte hpe matsum jaw da mani ai: ya nang gaw kaning ngu na wu ta? ngu nna Shi hpe san mu ai. Shing nga san ai gaw, Shi hta mara shagun na lam mu lu hkra, Shi hpe chyam dinglik ya ai rai nga ai. 

Yesu chyawm gaw ga de gum nna, ga hta layung hte ka nga ai. Shanhte shing nga bai kahtap san san rai ma ai majaw, Shi rawt mada yu nna, Nanhte hta na mara n lu ai wa, shawng shi hpe nlung hte kabai mu, ngu nna shanhte hpe tsun mu ai. Shing nga tsun ngut jang Shi bai gum nna ga hta ka nga ai. Shanhte dai ga na jang, agyi salang ni shawng pru wa ai kaw nna, langai hte langai pru mat wa ma ai: shing rai Yesu Hkrai sha hti nga ai hte, dai numsha mung myi na shara e nga nga ai. 

Shaloi Yesu bai rawt mada yu nna, Numsha e, ya shanhte kanang rai wa ma sata? Nang hpe kadai mung n jeyang a ni? ngu nna shi hpe san yang, dai numsha gaw, Madu e, kadai mung n jeyang nngai. ngu nna htan wu ai. Shaloi Yesu gaw, Ngai mung nang hpe n jeyang na nngai: wa nu; ya kaw nna mara hkum galaw nit, ngu nna tsun dat wu ai.

Ya hti ai gaw Madu a Kabu Gara Shiga rai nga ai.

LUSHA GAM LADAW LABAN (4) MUNGGA

Shinggyim masha a asak aprat hte tinang hkum hpe masam maram yu nna dum shai na matu gaw galau kaba ai lam hta ahkyak nga ai. Tinang hkum hpe dum shai yang she shading sharai la na matu mai byin nga ai.

Mara kaji lu ai wa gaw mara kaba lu ai wa hta shading sharai la na matu grau yak chye nga ai. Hpa majaw nga yang mara kaji hpe mara ngu nna nhkap la ai sha shi hkum shi jaw dum chye ai majaw rai nga ai. 

Kabu gara shiga hta kahpu wa gaw kanau a mara hte kawa a mara hpe chyu mu nna shi hkum shi dinglik yu ai lam nnga ai majaw galai shai na matu nmai byin nga ai. Kanau wa chyawm gaw mara kaba hpe galaw hkrup kau nna myit malai lu let nta de bai wa nna kasha kaja langai byin mai tim mung kahpu wa chyawm gaw galai shai ai lam nnga ai sha mi na hte maren shing nrai grau nna hten run ai lam de du chye nga ai.

Ndai lu sha gam ladaw hta tinang hkum hpe san jep yu nna galai shai ra ai kaji kajaw re ai lam ni hpe mu chye nna galai shai lu na matu shakut shaja sa wa ga.

MYIT MALAI MAJING HTE KARAI KASANG HPANG DE SIT SHANG GA

Tsawra ai ni, dum nta, manang ni hte tsan gang ai prat gaw kade wa yawn hpa rai nga a ta? Dai zawn hkam sha yak ai lam hpe lai di lu na matu gaw dum nta de bai wa nna rau zup hpawng lu ai, kabu gara ai hte sha rai na re. Karai Kasang, shi a amyu masha ni hpe, shaning shagu Shalai wa ai poi hpe galaw na matu shatsam da ai gaw; Egutu mung e, mayam prat kaw nna amyu masha ni hpe, nam mali lam hta atsawm sha woi wa let, gasadi da ai lamu ga de du wa shangun ai hpe n malap kau na matu rai nga ai. Kadai hte mung n hka ai sha Sumsing lamu hta e mung rau ning ngai ng mayu ai gaw Karai Kasang sharawng awng ai lam rai nga ai. 

Shalai wa ai poi hpe; wenyi si ai kaw nna hkrung ai de, mara a mayam prat kaw nna shang lawt lu ai de, ngu ai hpe kabu gara shiga ni hta galu dik ai gashadawn hte, Madu Yesu tsun jahpra dan sai. Rai yang, ndai kasha lahkawng hte lak lai shai ai Kawa a mau mwi hta kaning re ai ahkyak ai shiga hpe Madu Yesu madi madun mayu ai rai? Kasha yan a madat mara ai hte n madat ai lam kun? Akyu n rawng ai skasha hpe hkap tau hkalum la ai kawa hte kahpu a hkalum la ai lam kun? Shut hpyit ai kanau hpe n kam hkap la ai kahpu hte, myit malai lu nna bai wa ai kasha hpe lai lai jan jan hkap pang hkalum la ai kawa a lam hpe Madu Yesu madi madun ya nga ai. Kawa a sut gan hpe garan la nna sa jai shama kau ai rai tim, kasha a ntsa, tsawra myit gaw n yawm ai. Dai kasha, n   ta hte tsan gang nga ai ten hta, shi hkum shi grai cye la nu ai. Tim, shi kawa wa a tsawra myit kade sung ai hpe gaw n chye ya shi ai, shi a n   tsa tsawra la ai kawa hpe bai nhtang galaw ai lam n nga shi ai. Wa ni hpe rem ra ai shaloi, shi grai kaya kahpa hkrum nna, shi sum hkalut kau sai lam ni hpe bai myit shing ran let, mara lu sai, myit malai let kawa nta de bai wa na myit lu we ai. 

Shi a kawa hte mahku mara bai lu la na myit mada ai ten, kasha marai mi zawn yawng bai lu la na myit mada ai ten, kasha marai mi zawn yawng bail u la na n sumru lu ai. Kawa mung, n gup aga hte n rai, ta tut amu hte mara raw ya ai hpe madun dan ai gaw asan sha rai sai. Tsawm htap ai shingkyit, ta chyawp, hte reng la ai daw sha poi gaw, Karai Kasang hpang de n htang wa ai kadai a prat hta rai tim san seng ai, ging dan ai, hte kabu gara ai, prat nnan lu la na lam rai sai. 

Dam mat ai ma kasha gaw mara n kap ai ngu ai de n du wa lu sai rai tim, kasha marai mi zawn bai hkap hkalum la ai hkrum sai. Mara kap ai hte yawn hkyen ai kaw nna hkyam sa lu ai hte hkye mawai la ai kumla gaw, si ai kaw na bai hkrung rawt ai, wenyi si hkrum ai kaw nna sak prat nnan de du wa ai lam nan rai sai.   

Ndai gashadawn hta, tsawra matsan dum ai hte mara n lu dat ya ai lam hpe mung madi madun ai. Shut chye ai kasha gaw mara hkyemsa ya ai hkrum nna, n shut chye ai kasha kaba wag aw mara n dat ya lu ai. 

Shi a mara n dat ya lu ai lam gaw, yu kaji ai hte gurm rawng ai de du shangun sai. Bai nna shi a masin pawt ai lam gaw uhpung uhpawng kaw nna tsan gang shangun sai. 

Gashadawn ndai hta, Karai Kasang a sumla hpe asan sha  Madu Yesu madun ya sai. Teng sha wa Karai Kasang gaw anhte yawng hta tsawra matsan dum chye nga ai. Anhte lam dam hkawm mat wa ai ten hta rai tim, Karai Kasang gaw kabai tawn kau na n rai. Mat mat ai ni hpe bai mu tam la nna nta hta bai hkalum la na hpe kabu gara nga ai. 

Sumsing lamu na Kawa Karai hte shi a kasha zawn mahku mara bail u la na hte myit malai lu ai a kabu gara ai hpe nang chye ai kun? Madu Yesu e, Na tsawra matsan dum myit hpe majoi mi sha ngai hkam la ni ai. Myit kam shut shara mung ngai n myit na we ai. Nang Madu, tsawra matsan dum chye nga ai hte maren, ngai hpe mung dai tsawra matsan dum ai hte jahpring ya rit law.

LUSHA GAM LADAW LABAN (4) N A CHYUM LAIKA

6th Mar, 2016

CHYUM MUNGGA DAW 1

YAWSHU 5:9a 10-12.

Ya hti na gaw, Yawshu a Laika hta na rai nga ai.

Dai aten hta e Madu gaw Yawshu hpe, Dai ni, Egutu mung na kaya kahpa lam hpe nanhte kaw na galau kau ya \ma sade ai, ngu nna tsun wu ai. Shaloi, Israela kashu kasha ni Gilgala shara e dap jung nna, dai shata shi mali ya shana de Yerihko pa e Shalai dat ai Paska poi sha ma ai. Paska poi sha ai hpang shani jang, dai mung na mam hte galaw ai, matsi n rawng ai muk hte mam nmyi shanhte sha lu ma ai.

Dai mung na mam sha lu ai hpang shani kaw nna dai manna dawm mat sai: htawm hpang e Israela kashu kasha ni manna n lu sha ma sai. dai shaning shanhte gaw Hkanan mung na nsi naisi sha ma ai.

Ya hti ai gaw Karai Kasang a mungga rai nga ai.

CHYUM MANGGA DAW 2

2 KORINHTU 5: 17-21

 Karai Kasang gaw anhte hpe Hkristu hta e Shi hkum lala hte htinglu htinglai ya mi ai.   

Ya hti na gaw Korinhtu masha ni hpang de San Pawlu shagun dat ai Laika lahkawng hta na rai nga ai. Hpu nau ni e, Hkristu hte matut mahkai hkrum ai wa gaw, masha nnan tai wa ai: prat dingsa htum mat nna, Shi prat nnan hta shang wa sai: Dai lam yawng mayawng hte gaw Karai Kasang kaw nna rai nga ai: Shi gaw Hkristu a Marang e anhte hpe Shi hkum lala hte htinglu htinglai  ya mi ai; dai htinglu htinglai ya ai amu gun hpai na matu, Shi anhte hpe ahkang aya jaw da mani ai.

Ngai tsun mayu ai gaw: Karai Kasang gaw Hkristu hta e nga nga nna, masha ni a ntsa e tinang a mara n shagun ai sha, mungkan ga hpe Shi hkum lala hte htinglu htinglai ya nga ai: dai htinglu htinglai ya ai lam a shiga hpe, Shi anhte kaw ap da ya mani ai.

Dai re ai majaw, Hkristu a dat kasa ni anhte rai nga ga ai: Karai Kasang anhte a n-gup ga hku nna  shadum jahprang ya ai hte maren rai nga ai. Dai rai nna, Karai Kasang hte htinglu htinglai nga mu, nga nna Hkristu a amying hte nanhte hpe akroi anoi hpyi nem nga ga ai. Shi hta e Karai Kasang a ding hpring ai ni anhte tai wa u ga, mara n chye ai wa Hkristu hpe, Karai Kasang gaw anhte a matu shut hpyit mara shatai wu ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 15: 1-3. 11-32.

Na nnau gaw si mat sai; ya bai hkrung ra ai   

Ya hti na gaw, Luka a Laika hta na Kabu Gara Shiga rai nga ai.

Dai aten hta e, Kang hta ai ni hte mara kap ai ni nlang hte gaw 

Shi a ga madat na nga, Yesu hpang de sa ma ai. Dai rai nna, Hparishe ni hte tara sara ni gaw, Ndai wa mara kap ai ni hpe hkap la nna, shanhte hte rau lu sha nga ai, nga nna aput angun nga ma ai. Shaloi dai ni hpe ndai ga shadawn Shi tsun mu ai gaw: Masha langai mi shadang sha lahkawng lu ai. Dai yan hta kasha kaji mahtang gaw kawa hpe, Wa e, ngai la ang ai sali kumhtaw gaw, ngai hpe karan ya e, ngu nna hpyi yang, Kawa mung shan hpe sali wunli karan ya wu ai.

Dai hpang nhtoi gade ya n na yang, kasha kaji gaw arai mahkra shinggyin la nhtawm, tsan ai mung de sa wa nna, dai shara e pyaw daw kadaw hkawm ai hte, shi a sut rai ginlut shamat kau wu ai. Shing rai lu malu shamat kau ma jang, dai mung e hku wa  kaba hku wa ai rai nna, shi matsan chyaren hkrum magang nga ai. Shaloi dai mung na masha langai mi kaw shi sa shingbyi nga ai: dai wa shi a prang ga de, shi hpe wa rem    shangun dat wu ai. Shaloi shi gaw, wa ni sha ai shapre kawp hte pyi, shi a kan jahkru mayu ti mung, kadai wa mung n jaw sha mu ai.

Shing rai shi myit dum yang, Nye wa a shabrai sha ai ni gade wa n taw n tsang muk sha nga ma hka! Ngai wa gaw ndai yang e kawsi kyet ai hte hten bya magang wa nga nngai; Ngai rawt nna nye wa kaw wa nhtawm, Wa e, sumsing lamu hpe mung, nang hpe mung, ngai shut ni ai: ya kaw nna na nsha ngu na ngai n ging n dan nngai: na shabrai sha ai masha langai mi zawn ngai hpe tawn da e law, ngu na we ai, nga nna myit lu ai.

Shing rai shi rawt wa nna, kawa kaw du wa ai. Shi tsan tsan naw rai nga yang, kawa gaw shi hpe hkap mu ai hte matsan yu dum nna, gat sa nhtawm, kasha a du hta noi ginshum let shi hpe a pup wu ai. Shaloi kasha gaw, Wa e, sumsing lamu hpe mung, nang hpe mung, ngai shut ni ai: ya kaw nna na nsha ngu na ngai n ging n dan nngai, ngu nna kawa hpe tsun nem wu ai.

Kawa chyawm gaw shi a shangun ma ni hpe, Reng htum ai hpun palawng alawan la sa nna, shi hpe jahpun ya maru; shi a lata hta lachyawp chyawp ya maru; lagaw hta kyepding din ya maru; kawn tawn da ai dumsu kasha mung la sat mu: shing rai anhte kabu gara ai hte lu sha nga ga: hpa majaw nga yang, ndai ngai sha gaw si mat sai, ya bai hkrung sali ai; mat mat sai mung, ya bai mu la se ai, ngu mu ai: Shing rai shanhte pyaw pyaw rai nga ma ai.

Kasha kaba wa chyawm gaw yi e nga nga ai. Yi de na wa nna shi nta du magang yang, chying bau dum ai hte ka manau ai nsen na wu ai. Dai rai nna, ma langai mi hpe shaga la nhtawm, dai kaning re ai rai nga ai, san yu wu ai. Dai ma gaw, Na nnau bai wa ai rai nna, nwa mung shi hpe hkam akaja sha hkap la lu ai majaw, kawn tawn ai dumsu kasha sat nu ai, ngu nna shi hpe tsun dan wu ai. Dai na jang shi masin pawt nna nhku de n shang hkraw wu ai.

Shaloi shi a kawa pru sa nna, shi hpe sa nem wu ai. Dai kasha chyawm gaw, Yu u, nde nlaw ning tup na a nchyang amu ngai galaw nna, nang hkang da ai ga ngai galoimung n lai nngai rai ti mung, nye jinghku ni hte pyaw pyaw rai nga na, nang lang mi mung bainam kasha langai mi pyi, ngai hpe n jaw yu ndai. shawa num ni hte kanawn nna, na a sut rai ginlut shamat kau ai ndai na nsha wa bai wa jang chyawm gaw, kawn tawn ai dumsu kasha, shi a matu nang sat nit hka, ngu nna shi a kawa hpe htan wu ai.

Kawa gaw, Ngai sha e, nang gaw ngai hte rau tut anga nga ndai; nye a sut rai nga manga gaw, na a hkrai rai nga ai. Rai ti mung, pyaw pyaw rai kabu gara mai nga ai; hpa majaw nga yang, ndai na nnau gaw: si mat sai; ya bai hkrung ra ai: mat mat sai mung ya bai mu la saga ai, ngu nna shi hpe nem wu ai.

Ya hti ai gaw Madu a Kabu Gara Shiga rai nga ai.