PRANWAN LADAW LABAN (4) MUNGGA

Shinggyim masha gaw wuhpung wuhpawng hte nga sa ra ai re majaw anhte shada da matu mung lit la ra nga ai. Dai rai yang tinang a htingbu wa mai kaja na matu garum ya na gaw tinang a lit rai nga ai. Grau nna manang wa shut shai wa ai aten ahkying hta shadum jahprang ya ra ai.

Karai Kasang a dat kasa ni rai nga ai myi htoi ni gaw tengman ai lam hpe hkan shatup nna, manang ni hpe mung tsun shadum ai lam ni galaw lai wa sai. Dai re ai majaw manang ni a ndawng nyawt ai hpe mung mu hkrum lai mat wa sai. Madu Yesu Hkristu a asak aprat hta Kawa Karai Kasang a ra sharawng ai hpe shi hkum nan hkan shatup ai sha n-ga manang ni hpe mung tsun shadum lai wa sai. 

Dai rai yang manang wa mai kaja na matu tinang lit la ra ai lam hta tsun shadum ra ai lam hpe grai n-galaw shi yang tinang shawng hkan shatup ra na re. Myi htoi ni gaw tengman ai lam hpe tsun shaga ai hte maren dai tengman ai lam hta hkawm sa ai ni rai nga ai. Tinang a ra rawng ai lam hpe tinang shawng dum shai nna, shading sharai let manang wa a matu tengman ai lam hpe shadum jahprang ya ai Kashin Kamun sakramentu hta hkam la sai Myi Htoi aya hpe tatut hkan shatup lu u ga.

YESU A LAMIK KUMLA A MAJAW KAMSHAM AI NI TAI NGA GA AI KUN?

Nanhte a mare kahtawng na nawku daw jau ai lamang hta ndai shiga ni hpe Madu Yesu tsun ai shaloi, nang kaning rai bai htang na rai ta? 

Laban n’htoi, Tara jawng hta Madu Yesu shang let Chyum Laika hti, mungga hkaw ai shaloi, Shi a mare buga masha ni gaw grai sadi maja let madat nga ma ai. Shanhte ni gaw kaga buga kahtawng hkan e Yesu lamik kumla galaw ai hpe na yu sai majaw rai nga ai. Shi a kahtawng hta kaning re ai lamik kumla Shi galaw na rai kun? Kadai myihtoi ni mung tinang a buga hta arawng aya n lu ma ai, nga shanhte hpe tsun masai. Israela; ‘lata la hkrum ai amyu masha’ ni hta, tara maigan masha ni mahtang grau kam sham ai lam nga ai majaw, shanhte hpe masin pawt wu ai. Tara maigan masha ni hpe gaw ‘ngarai wan shagrung ya na sau’ nga nna Israela ni hkap la ma ai. ‘shinggan masha’ ni hpe shagrau ai majaw, Madu Yesu hpe grau pawt sin dawng ma ai. Shanhte mahtang, Karai Kasang a tsawra matsan dum ai hpe n mu ai hte amyu masha yawng hpe hkye hkrang la na Karai Kasang a yaw sing lam hpe mung n chye na lu ai. 

“Madu Yesu e, Nang gaw, anhte a myit mada shara hte sharawng awng ai lam rai nga ai."

PRANWAN LADAW LABAN (4) NA CHYUM LAIKA

31^stJanuary, 2016

CHYUM MUNGGA DAW 1

YAREMIA 1:4-5. 17-19.

‘Masha amyu ni a myihtoi tai na, Ngai nang hpe aya dang da ni ai.’

Ya hti na gaw, myihtoi Yeremia a Laika hta na rai nga ai.

Yuda hkawhkam Yoshia a lakhtak e Madu a mungga ngai hpe tsun dan ni ai: Ngai nang hpe nnu a hkritung e garai n shachyaw yang pyi, nang hpe chye nngai: masha amyu ni a myihtoi tai na, ngai nang hpe aya dang da ni ai. Dai re majaw, nang gaw shingkyit kyit nna rawt u; ngai nang hpe hkang da mada, shanhte hpe tsun dan u; shanhte a man e ngai nang hpe n jahkrit shama kau u ga, shanhte hpe hkum hkrit et.

Yu u, mungdan ting a man e mung, Yuda hkawhkam ni, de a du salang ni, de a hkinjawng ni hte mung masha ni a man e mung, Ngai nang hpe dai ni jang, bunghku kum ai mare, hpri shadaw hte magri shakum zawn n-gun shaja na de ai. Shanhte nang hpe hkap gasat ti mung, dang kau lu na n rai; kaning rai nme law nang hpe mawai la na matu, Ngai nang hte rau nga nga nngai, ngu nna Madu nan tsun nga ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 KORINHTU 12:31;13:1-13

‘Kam sham ai, Myit Mada ai, Tsaw ra ai, ngu ai lam masum dinggrin a nga nga na ra ai; rai ti mung dai ni hta na grau htum ai gaw, tsaw ra ai lam rai nga ai.’

Ya hti na gaw, Korinhtu masha ni hpang de San Pawlu shagun dat ai Laika langai hta na rai nga ai.

Hpu nau ni e, Grau kaja ai chyeju kumhpa ni hpe lu la hkra shakut nga mu. Dai rai nna grau htum ai lam langai mi, ngai nanhte hpe naw madun dan na made ai.

Ngai gaw masha a ga hte lamu kasa ni a ga amyu myu hpe chye tsun ti mung, tsaw ra ai myit n rawng yang gaw, mahku rawng ai bau hte, ngoi gara ai shup sheng ngai tai nga nngai. Ngai myihtoi chye htoi ai hte, mung sung ga sung yawng mayawng hte, hpaji amyu hkum sumhpa chye chyang nga nna, bum ni hpe sit shangun lu hkra makam masham rawng nga ti mung, tsaw ra ai myit n rawng yang gaw, ngai hpa n rai nga nngai. Nye a arai mahkra hpe ngai gam kau nna, nye a hkum hpe pyi nat kau na matu ap kau ya ti mung, tsaw ra ai myit n rawng yang gaw, hpa akyu nga na n rai.

Tsaw ra ai lam gaw, myit galu nga ai; sumnung shingdi nga ai; tsaw ra ai lam gaw manawn masham n nga ai; tinang a hkum hpe shagrau ai ga n tsun ai; gumrawng gumtawng n rawng ai; n sun n ang ai hku n galaw ai; tinang a akyu n tam ai; masin pawt wa ai n rai; mara n tam nga ai; n ding n man ai lam hta n kabu ai sha, teng man ai hte rau kabu gara nga ai. Tsaw ra ai lam gaw, tut nawng e masha a n-gun kya ai hpe magap da nga ai; tut nawng e htingbu wa hpe kam nga ai; tut nawng e shi a lam hpe myit mada nga ai; tut nawng e hkrum ang ai tsinyam hpe hkam sharang nga ai.

Myihtoi htoi ai lam hkoi mat na ra ai; ga amyu myu chye tsun ai lam htum mat na ra ai; chye chyang ai lam mung hkoi mat na ra ai; tsaw ra ai lam chyawm gaw, htum mat chye ai n rai. Kaning rai nme law, daw chyen mi sha chye chyang nga ga ai; daw chyen mi sha myihtoi htoi ga ai; rai ti mung, hkum tsup ai lam du jang n hkum n tsup ai daw chyen hkoi mat na ra ai.

Ngai ma kaji naw rai nga yang, ma ga ngai ga ai hte ma myit rawng nna, ma a myit yu ai hku ngai hkan nga nngai: ya ngai salang wa jang she, ma a lam hpe ngai tawn kau se ai. 

Ya gaw, n dan n leng ai hku jamna shingna hpe sha anhte naw mu nga ga ai; rai ti mung, dai shaloi e, myi man yawng let mu na ra ga ai. Ya gaw daw chyen mi sha ngai chye nngai; dai shaloi e, Karai Kasang ngai hpe chye chyang ai zawn, ngai mung chye na we ai. Ya, kam sham ai, myit mada ai hte, tsaw ra ai ngu ai lam masum dinggrin a nga nga na ra ai; rai ti mung, dai ni hta na grau kaba ai gaw, tsaw ra ai lam rai nga ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 4: 21-30

‘Elia yan Elisha hpe zawn, Yesu hpe mung Yuda masha ni hpang de chyu sha shangun dat ai n rai’

Ya hti na gaw, Luka a Laika hta na Kabu Gara Shiga rai nga ai.

Dai aten hta e Yesu gaw, tara jawng hta e ga tsun hpaw nna, Dai ni nan nanhte madat nga yang, ndai ka da ai ga dik wa sai, ngu nna shanhte hpe tsun mu ai. Madat la ai ni yawng hte gaw, Shi a ga hpe ra sharawng nna, Shi a n-gup hta na pru ai chyeju ga a majaw mau nga ma ai. Shanhte gaw, Ndai wa gaw, Yosep a kasha n rai nga a ni? tsun shajang ma ai.

Dai rai nna Shi gaw, Nanhte mahtang, ‘Tsi sara e, tinang hkum dai hpe shamai la u, nga nna ga shagawp hku ngai hpe tsun nhtawm, Anhte na ai hte maren, Kaperna-um mare e shabyin ai amu hpe zawn, Nang na a buga e mung galaw dan u, nga nna ngai hpe tsun na marin dai. Shi gaw, Nanhte hpe ngai teng teng tsun made ga:

Kadai myihtoi rai ti mung tinang a buga e arawng n lu nga ai. Elia a aprat e, masum ning shata kru tup marang n htu ai hte jan ja nna, dai mung ting hkan e nachying hku hku hpang gara rai wa yang, Israela a amyu hta gaida law law nga ma ai: rai ti mung, shanhte hta na langai mi hpang de pyi Elia hpe n shangun dat wu ai; Sidun mung Zarehpa mare na gaida jan langai mi hpang de she shangun dat wu ai.

Myihtoi Eslisha a aprat e mung, Israela amyu hta manggang kap ai masha law law nga ai, rai ti mung, shanhte hta na langai mi pyi san pra wa lu ai n rai; Siria masha Naman ngu ai wa chyu sha san pra wa lu ai, ngu nna shanhte hpe tsun mu ai.

Dai tara jawng na ni yawng hte gaw dai lam na la jang, masin pawt bu ma ai. Shanhte rawt nna, mare shinggan de shi hpe shapraw nhtawm, dai mare de ai bum pungding de woi sa nna, n-gam mahka kaw nna Shi hpe kanawng jahkrat kau na maw ai. Shi chyawm gaw shanhte a ka-ang hku ga pru nna, sa mat wa ai.

Ya hti ai gaw Madu a Kabu Gara Shiga rai nga ai.

PRANWAN LADAW LABAN (3) MUNGGA

Dai ni na kabau gara shiga hta Madu Yesu gaw nawku htingnu kata de shang nna shi galaw sa wa an amu magam lam ni hpe tsun ndau let Shi a amu bungli ni hpe galaw hpang wa sai re. 

Matsan masha ni a matu, htawng rawng ai ni a matu, myi nmu ai ni a matu, dip sha hkrum ai ni a matu Madu Yesu gaw kabu gara shiga byin tai wa sai re. Shi ndau shana ai hte maren shi galaw sa wa ai amu magam ni gaw manang wa a matu mai kaja ai amu bungli rai nga ai.  

Madu Yesu jaw ya ai shaman chyeju ni hpe hkam la lu sai anhte ni gaw Madu Yesu a kabu gara ai shiga hpe matut nna htawn shana na matu lit nga ai rai nga ai. Anhte galaw sa wa ai amu bungli ni hte tsun shaga ai ga ni gaw manang ni a matu kabu gara shiga byin tai wa u ga.

MYIT MADA LAM JAW YA AI JA CHYUM MUNGGA

Karai Kasang a tengman ai hte mai kaja lam a machye machyang hte hpring tup wa lu na matu nang kaning di lu na ta? 

Kabu gara ai shiga laika (4) hte gaw, Madu Yesu Hkristu hta dai tengman ai lam madung hpe madi madun ma ai. Luka a kabu gara ai shiga hta, nnan hpang wa ai shara kaw nan laklai shai ai lam hpe anhte mu lu ga ai. Kasa Luka gaw shi hkum nan maga kaw nna laika ka da sai. ‘Theophilus’; (Karai Kasang a tsawra hkrum ai wa) ngu ai, shi a manang wa hpang de made da nu ai. Shinggyim labau hta laklai shai dik ai mabyin hpe, ngai, nang hpang de ka ya dat nngai, ngu ka da nga ai. Bai nna, ndai mabyin a lam hpe, Madu Yesu hte rau hkum nan nga lai wa nna, shi a Mungga hpe tinang a na hte nan na yu sai ni, lamik kumla hpe myi hte chyaw mu yu sai ni, Shi Madu a si hkam ai hte bai hkrung rawt sai lam hpe sakse tai lu ai ni kaw nna, na la lu ai rai nna n kam shara gaw n nga ai hpe shi chye la ai. ‘Gospel’ ngu ai lachyum gaw; ‘kabu mai ai shiga/ kabu gara shiga’ ngu ai re. 

Dai gaw, Madu Yesu a kabu gara ai shiga rai nna Shi Madu a si hkam ai hte bai hkrung rawt ai lam a marang e lu tawn da ai, ‘Awm dawm ahkang aya’ rai nga ai. Kabu gara ai shiga gaw, dai ni na anhte a matu Karai Kasang a mungga rai nga ai. Dai hpe ta tut hkap la kam sham ai ni a matu, shamai shatsai ya ai, shalawt dat ai, galai shai ya lu ai atsam rawng ai, asak hkrung ai mungga rai nga ai. Karai Kasang a ahkrung nga ai mungga hte na a prat galai shai wa lu na matu nang ra sharawng nga ai kun? Karai Kasang a kasha hpe madat mara na hte Shi Madu a mungga hpe hkap la kam sham na ra nga ai.

Kasa Luka tsun dan ai hta, Madu Yesu gaw, Shi a Sasana amu magam hpe, Shi nga kaba wa ai Galilee buga hta nnan hpang wa ai, nga ai. Tara Jawng hta na Madu Yesu a mungga hpe shawng nnan na la ai nta masha ni hte mare masha ni gaw, mau kajawng ma ai. Tara jawng a ningbaw wa hku nna, laban bat shagu, marai rai hpe Chyum Laika hti let lama ma tsun na saw shaga ai gaw, htung lai rai nga ai. Madu Yesu hti ang ai gaw, myihtoi Esaia laika hta na rai nna, shut hpyit mara hta nga ai ni hpe shalawt la na matu, Hkyela Madu gaw Chyoipra ai Wenyi a marang e du sa wa na lam rai nga ai. Dai hta e, Madu Yesu gaw, dai myihtoi ga gaw shi hta e hpring tup wa na re lam shawa masha ni hpe tsun dat nu ai. Hkyela Madu (snr) mana ai wa chyu sha dai zawn tsun gwi na re. Shawa masha ni myit yu na sha, Shi galaw dat ai nrai, Karai Kasang amyu masha ni hpe jaw da ai Gasadi hpe myit mada shara nnan byin shangun ai lam rai sai. Shawa masha ni Madu Yesu a mungga hpe sharawng awng ai hte hkap la nna, dai ‘Yosep a kasha’ kadai rai na hpe mau nga ma ai. Madu Yesu a magam bungli hta Karai Kasang a shaman chyeju hte Atsam hpe anhte mu lu ga ai. Shi hpe hkap la na jin jin rai nga ai ni a matu, Madu a chyeju hte hpring ai mungga gaw, kabu pyaw ai hte myit mada shara jaw ya nga ai. Karai Kasang a mungga hpe nang hpang gara nga ai kun? 

Madu Yesu gaw anhte hte anhte a hkye hkrang la lam a matu du sa wa ai rai nga ai. Shut hpyit mara a mayam prat; si hkrung si htan, hkum hkrang hte wenyi prat tup hten za mat na kaw nna, hkye sharawt la na matu du sa wa ai rai sai. Anhte myit htum mat ai, hkrit kajawng ai, wenyi hta, hten za ai, myit ru yawn hkyen ai lam ni kaw nna Karai Kasang a atsam chyu sha, anhte hpe hkye hkrang la lu na re. Hkye hkrang la lam a kabu gara shiga gaw, dai ni anhte ni yawng a matu, ‘kabu mai ai shiga’ rai na sai. Kabu gara shiga a kabu pyaw ai lam hte ndut ndang ahkang hpe nang chye nga ai kun?

“Madu Yesu e, Nang gaw, anhte a myit mada shara hte shingran ni yawng hpe hpring tsup ya lu ai wa rai nga ai. Nang Madu a Chyoipra ai Wenyi chyeju a marang e, Tengman ai, Asak hte Awm dawm ahkaw ahkang, Nang anhte hpe jaw ya nit dai. Kabu gara shiga a kabu pyaw ai lam hte ngai hpe jahpring ya nna, Nang hpe tsawra lu na hte Na a mungga hpe hpang gara nga na ngai a salum hpe wan shagrung ya rit law. Amen"

PRANWAN LADAW LABAN (3) NA CHYUM LAIKA

24 January, 2016

CHYUM MUNGGA DAW 1  

NEHEMIA 8: 1-4a. 5-6. 8-10.

‘Shanhte gaw Karai Kasang a tara laika hpe hti dan nna, mung masha ni de a ga lachyum hpe chye na ma ai.’

Ya hti na gaw, myihtoi Nehemia a Laika hta na rai nga ai.

Dai nhtoi hte hta e, hkinjawng Ezra gaw, shata sanit a shawng shani e, chye na lu ai shawa hpawng numsha lasha mahkra a man e, tara laika hpe la shapraw wu ai. Jahpawt jau jau kaw nna jan pungding du hkra, Hka Chyinghka ndaw na dam lada ai shara e tsap let chye na lu ai numsha lasha ni a man e tara laika hti dan ai hte, mung masha ni yawng dai hpe madat mara nga ma ai. Chyare wa Ezra gaw shanhte shachyaw san da ai pinra ntsa e tsap nga wu ai.

Shing rai Ezra gaw mung masha mahkra hta grau tsaw ai shara e tsap let, mung masha mahkra ni a man e dai tara laika hpe hpaw da nna, dai laika hpe hpaw ai shaloi, shanhte yawng hte gaw rawt tsap ma ai. Shaloi, Ezra gaw galu kaba re ai Madu Karai Kasang hpe shakawn kungdawn wu ai. Mung masha ni nlang hte gaw tinang a lata sharawt let, Amen, Amen, nga nna tsun nhtawm, ga du hkra gum dagup let Madu hpe nawku ma ai.

Shingrai shanhte gaw, Karai Kasang a tara laika hpe dan dan leng leng hti nna, ga lachyum shapraw dan ai majaw, mung masha ni chye na ma ai. Mung masha ni dai tara laika ga hpe na jang hkrap ngu hkrap ngoi nga ma ai rai nna, munggyi Nehemia, hkinjawng hte chyare wa Ezra hte mung masha ni hpe sharin achyin nga ai. Lewi masha ni gaw, dai ni nan, nanhte a Madu Karai Kasang a matu Chyoi Pra ai shani rai nga ai; myit hkum yawn, hkrap mung hkum hkrap mu, ngu nna mung masha ni mahkra hpe tsun mu ai.

Bai Ezra gaw, Sa wa mu; sau ai hpe sha mu, dwi ai hpe lu mu; n lu ai ni hpe gaw gam jaw mu: dai ni gaw Madu a chyoi pra ai shani rai nga ai; myit hkum kaji mu; Madu hta kabu gara ai gaw nanhte a n-gun atsam rai nga ai, ngu nna mung masha ni hpe jasim mu ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

1 KORINHTU 12: 12-30.

‘Nanhte gaw, Hkristu a hkum hkrang rai nga ai, rai ti mung, langai hte langai daw shan kaga ga rai nga myit dai.’

Ya hti na gaw, Korinhtu masha  ni hpang de San Pawlu shagun dat ai Laika langai hta na rai nga ai.

Hpu nau ni e, Masha a hkum hkrang hta daw shan law law rawng nga ti mung, dai ni yawng hte gaw hkum hkrang langai sha jawm tai nga ma ai. Dai hte maren Hkristu mung, daw shan law law lu ai hkum hkrang langai sha zawn rai nga ai. Anhte yawng mayawng, Yuda ni hte Greka ni rai ti mung, mayam ni hte shanglawt ni rai ti mung, Wenyi langai sha hta e kashin kamun hkam la saga ai rai nna, anhte yawng jawm lu na matu dai Wenyi hpe jaw ya mani ai.

Dai hkum hkrang chyawm gaw daw shan langai sha n rai, law law wa rai nga ai. Lagaw mahtang gaw, ngai lata n rai nngai majaw hkum hte n seng nngai, nga nna tsun ti mung, hkum hte seng nga ai. Bai dai ana gaw, ngai myi n rai nngai majaw, hkum hte n seng nngai nga nna tsun ti mung hkum hte seng nga ai. Hkum ting gaw myi chyu sha rai yang, na lu na lam kanang nga na a ta? Ana hkrai rai yang gaw, manam lu na lam kanang nga na a ta? Ya chyawm gaw Karai Kasang Shi ra ai hte maren, daw shan langai hte langai hpe dai hkum hkrang hta jahkum shatsup tawn da nu ai.

Daw shan yawng mayawng amyu mi sha rai yang gaw, hkum hkrang kanang nga na a ta? Ya ndai hku rai nga ai: daw shan law law nga ti mung, hkum hkrang langai sha rai nga ai. Myi gaw, Nang lata hpe ngai n ra nngai, ngu nna n tsun lu ai; abaw mung, Nan lagaw yan hpe ngai n ra ai ngu nna n tsun lu ai.

Dai hta n-ga hkum hkrang na n-gun kya ai zawn re ai daw shan gaw lawm ra ai; hkum hkrang na grau n shareng ai daw shan ni hpe, anhte grau nna sadi sahka ai hte jahpun nga ga ai. Dai rai nna, anhte a n htap n htuk ai zawn re ai daw chyen ni hpe grau nna jahtuk shatsawm ga ai; htap htuk ai daw chyen ni mahtang gaw shatsawm n ra nga ai.

`Dai hkum hkrang hta n ru n ra n byin ai sha, daw shan ni shada da myit tsang hkat nga mu ga sha she Karai Kasang dai hkum hkrang hpe shabung shapre nna, arawng grit ai daw shan ni hpe grau nna arawng jaw mu ai. Shing rai, daw shan langai mi nji nmu hkrum yang yawng mayawng rau machyi dum ma ai; daw shan langai mi shagrau ai hkrum yang, yawng hte gaw rau kabu gara nga ma ai.

Ya nanhte gaw Hkristu a hkum hkrang rai nga ai, rai ti mung, langai hte langai daw shan kaga ga rai nga myit dai. Nawhku Hpung hta e Karai Kasang gaw kasa ni hpe shawng na tsang hta san tawn da mu ai; tsang lahkawng hta myihtoi ni; tsang masum hta sara ni; dai hpang e lamik kumla galaw ai ni; dai hpang e machyi makaw shamai shatsai na chyeju lu la ai ni; shingdep shingtau ai ni; sharawng awng ai hte woi awn chye ai ni hte, ga amyu myu chye tsun ai ni hpe Shi san tsawn da manu ai.

Yawng mayawng kasa rai nga a ni ? Myihtoi rai nga a ni ?

Yawng mayawng hte wa sara rai nga a ni? Ga amyu myu chye tsun nga a ni? Yawng hte wa ga amyu myu a lachyum hpe htai dan lu a ni?

Ya hti ai gaw Karai Kasang a mungga rai nga ai.

KABU GARA SHIGA

LUKA 1:1-4; 4:14-16

‘Ndai ka da ai ga gaw dai ni nan dik mat wa sai.’

Ya hti na gaw, Luka a Laika hta na Kabu Gara Shiga rai nga ai.

Shawng nnan kaw nna tinang nan mu ai hte, dai mungga a magam gun hpai ai ni gaw anhte hpe hkai dan madan hte maren anhte a man e byin wa ai lam ni hpe masha law law wa ka da manu ai. Ngai mung dai lam yawng mayawng hpe npawt ndung hkren azin ayang san sagawn yu ni ai. Dai rai nna arawng lu ai Htawhpilu e, nang sharin la sai mungga teng man rai nga ai hpe kam lu u ga, na a matu dai lam mahkra hpe matut manoi rai ka da na ngai myit lu nngai.

Dai aten hta Yesu gaw, Wenyi a atsam hte Galile mung de bai wa nga ai rai nna dai ginwang shara magup hkan e Shi a lam kajai gumhkawng mat wa ai. Shanhte a tara jawng ni hta Shi sharin shaga ya nna, yawng hte gaw Shi hpe shagrau sha-a ma ai.

Shaloi, Shi nga kaba wa ai Nazaret mare de du wa ai; Shi a htung hte maren Laban nhtoi e tara jawng hta Shi shang wa ai rai nna laika hti na rawt tsap wu ai. Shaloi myihtoi Esaia a laika Shi hpe jaw ma ai rai nna, dai laika hpaw yang ning nga ka da ai shara mu hkrup wu ai:

Madu a Wenyi nye a ntsa e nga nga ai: Matsan mayan ni hpe Kabu Gara Shiga hkaw tsun na matu Shi ngai hpe namman chya ya ni ai. Bawng dung ai ni hpe sharawt lu na lam, myi kyaw ai ni hpe myi bai mu na lam, hkaw tsun na matu mung, zingri zingrat hkrum ai ni hpe dat dat shangun na hte Madu sharawng awng ai shaning hkaw tsun dan na matu mung, Shi ngai hpe shangun dat ni ai, nga nna hti wu ai.

Dai laika katsu nna, tara jawng na nrum ntau wa hpe bai ya kau nhtawm, Shi dung nga ai: tara jawng na ni nlang hte gaw Shi hpe azi yu nga ai, Shaloi, Shi gaw: Dai ni nan nanhte madat nga yang, ndai ka da ai ga gaw dik wa sai, ngu nna shanhte hpe ga tsun hpaw wu ai.

Ya hti ai gaw Madu a Kabu Gara Shiga rai nga ai.

PRANWAN LADAW LABAN (2) MUNGGA

Nhkum ntsup ai anhte shinggyim masha ni hta ra rawng ai lam ni gaw galoi mung nga na re. Dai hte maren wuhpung wuhpawng hte nga ai lam hta shada da garum shingtau let sak hkrung nga mai nga ai.

Madu Yesu gaw wudang ntsa kaw nna Shi a Kanu hpe anhte a matu jaw ya sai re. Dai hte maren, anhte a Kanu Nu Maria gaw shi a kasha ni ra kadawn ai hta galoi mung garum ya nga ai. Dai ni na chyum mungga hta Hkan Nan mare na hkungran poi kaw tsabyi chyaru nlaw mat ai majaw kasha Yesu kaw hpyi shawn ya ai a marang e mauhpa namit kumla byin tai wa nna hkungran poi hpe galaw ai ni gaya hkrum na kaw nna shalawt dat ya sai.

Nu Maria gaw anhte shinggyim masha ni hpe tsaw ra nna lam dam taw nga ai shi a kashu kasha ni hpe Karai Kasang hpang de bai nhtang wa na matu tsaw ra myit kaba hte mungkan shara shagu hta dan pru nna chyeju jaw ya nga ai. Dai hta n-ga shi kaw garum hpyi ai kashu kasha ni a matu mung Karai Kasang hpang de hpyi htinglu htinglai ya nga ai. Nu Maria hpyi htinglu htinglai ya ai a marang e Wa Karai Kasang kaw nna ra ai chyeju ni hpe anhte yawng hkam la lu u ga.

KABA HTUM AI TSAW RA MYIT

Karai a hpung shingkang na a prat hta anga nga ai ni hpe nang dum chye lu ai kun? Karai Kasang gaw Shi a hpung shingkang hpe anhte n nawn ai shara; Betlehem mare na katsi la ai ‘nga lawng’ hta, Canan mare na hkungran poi kaji hta, Pungkung kawn na sai kap ai wudang hta, shalen dan chye ai.

Dai ni na kabu gara shiga hta, Madu Yesu, shawa man e shawng nnan lang galaw ai lamik kumla a lam na la lu ga ai. hkungran la yan num hpe shaman ya ai hte poi hta e, kabu gara shangun sai. Shi Madu hkum nan shang lawm ai hte, sabyi ntsin shalaw jaw ai marang e, gaya hkrum na kaw nna lawt lu sai. Hka kaw nna tsabyi shatai ya ai gaw, grai matsan dum ya ai kumla rai sai. Gashaka dingsa hta tsabyi ntsin hpe, Karai Kasang a kumhpa hte shaman chyeju hku nna mu mada ma ai (Tra 7:13, Ga 3:10, Shk 105). Madu Yesu gaw, kaja dik ai tsabyi gallon 180 daram mau hpa shapraw ya sai. Ra kadawn ai hta grau shalaw jaw ai hpe yu yang, Shi Madu jaw ya na shaman chyeju alaw ahtam rai nga ai hpe mu lu ai.

Dai lamik kumla hta ‘kaja ai tsabyi nnan’ gaw kabu gara ai shiga e madi madun ai, ‘Gashaka ningnan a tsabyi’ rai nna, Madu Yesu jaw ya na rai nga ai, ‘Asak a muk’ lam ni hpe lachyum shapraw ya ai. Hpang jahtum aten, Shi a hpung shingkang hta du sa ai shaloi jaw ya na Hkyela Madu a daw sha poi hpe mung madi madun ai.

Madu Yesu a lamik kumla gaw, amyu masha ni a ntsa tawn da ai, Karai Kasang a Atsam hte tsawra myit hpe mung shadan dan sai. Karai Kasang a matsan dum ai lam gaw shadawn shadang n-nga ai hte Shi a sung htum ai tsawra myit hpe Kasha Yesu Hkristu hta hpaw shaleng dan sai. Dai kasha gaw anhte a matu mara, shinggyim masha sa tai ai, anhte hkye la hkrum mu ga, shi si hkam ai, hte anhte mung Shi a hpung shingkang hta nga lu u ga, Shi Madu hkrung rawt sai.

Na a prat a matu law htam la ai shaman chyeju ni hpe lu la na matu, Kawa Karai hpe, nang hpang gara nga ai kun?

“Sumsing Lamu na anhte a Wa e, Nang Madu a hpung shingkang hpe, Yesu Hkristu hta anhte mu lu sa ga ai. Ngai a tsun shaga, galaw maw mawn ai lam yawng hta Nang Kawa a hpung shingkang hpe shadan shadawng lu na, Chyoipra ai Wenyi hta ngai hpe jahpring ya rit law. Amen."

PRANWAN LADAW LABAN (2) NA CHYUM LAIKA

17^th January, 2016

CHYUM MUNGGA DAW

1 ESAIA 62: 1-5

‘La nnan gaw num nnan majaw kabu gara nga ai hte maren, na a Karai Kasang na a majaw, kabu gara nga na ra ai.’

Ya hti na gaw, myihtoi Esaia a Laika hta na rai nga ai.

Yerusalem mare a ding hpring ai lam, pyengding zawn htoi tu nga ai du hkra, ngai Ziun a lam hta atsin sha nga na nrai, Yerusalem mare a matu kaman nga na n rai. Dai aten hta, maigan amyu ni na a ding hpring ai hpe, hkawhkam ni mahkra na a arawng sadang hpe, mu mada nna, Madu a n-gup na pru ai mying nnan hte nang hpe shamying na mara ai.

Nang gaw Madu a lata hta, tsawm htap ai shanghkawng na a Karai Kasang a lata hta, hkawhkam janmau tai na rin dai. Htawm hpang de nang hpe, Mare Dingsa ngu nna mung, na a mungdan hpe, Katsi Katsang shara ngu nna mung shamying sana n rai; nang hpe Ngai Sharawng Awng ai Jan, na a mungdan hpe, Hkungran sai Num Nnan ngu nna shamying na mu ai; kaning rai nme law, Madu gaw nang hta awng sharawng nna, na a  mungdan gaw hkungran madu lu na ra ai.

Shabrang wa gaw mahkawn hte hkungran ai zawn, na a shadang sha ni gaw nang hte hkungran na mara ai; la nnan gaw num nnan a majaw kabu gara nga ai hte maren, na a Karai Kasang na a majaw kabu gara nga na ra ai.

Ya hti ai gaw, Karai Kasang a mungga rai nga ai

CHYUM MUNGGA DAW 2

1 KORINHTU 12:4-11.

‘Dai Wenyi langai sha myit rai ai hte maren, langai hte langai hpe

 chyeju kumhpa karan jaw mu ai.’

Ya hti na gaw, Korintu masha ni hpang de San Pawlu shagun dat ai Laika langai hta na rai nga ai.

Hpu nau ni e, Ya, chyeju kumhpa amyu myu nga ti mung, dai ni hpe karan jaw ai Wenyi gaw langai sha rai nga ai. Daw jau ai lam amyu myu nga ti mung, Madu langai sha hpe anhte daw jau nga ga ai. Mauhpa atsam amyu myu nga ti mung, yawng mayawng hta e dai lam mahkra hpe shabyin ai Karai Kasang gaw langai sha rai nga ai.

Rai ti mung, akyu chyeju lu la u ga she, dai Wenyi gaw langai hte langai hta e shi a atsam hpe shapraw shadan dan nga ai. Dai rai nna langai mi gaw wenyi atsam hte hpaji mungga chye tsun ai; kaga wa gaw, dai Wenyi garum ai hte chye chyang ai mungga tsun lu ai; kaga wa gaw dai Wenyi a jaw e makam masham; kaga wa gaw Wenyi langai sha a jaw e machyi makaw shamai shatsai na ahkang, hkam la shajang ma ai. Langai mi gaw lamik kumla galaw dan lu ai; kaga wa gaw myihtoi chye htoi nga ai; kaga wa gaw wenyi ni hpe chye ginhka lu ai; kaga wa gaw ga amyu myu a lachyum hpe shapraw dan lu ai: dai lam yawng hte hpe Wenyi langai sha e nan shabyin wu ai rai nna, Shi myit ra ai hte maren, langai hte langai hpe karan jaw mu ai.

Ya hti ai gaw, Karai Kasang a mungga rai nga ai.

KABU GARA SHIGA

YAWHAN 2: 1-12.

Ya hti na gaw, Yawhan a Laika hta na Kabu Gara Shiga rai nga ai.

Dai aten hta e, Galile mung na Hkana mare hta num hkungran ai poi galaw nga ma ai rai nna, Yesu a kanu gaw dai poi hta lawm nga ai; Yesu hpe mung Shi a sape ni hte nawng, dai poi de shaga la mu ai.

Tsabyi chyaru ma mat jang, Yesu a kanu gaw, shanhte tsabyi chyaru n lu mat sai, ngu nna tsun wu yang, Yesu gaw: Nu e, nang hpa majaw ngai hpe san n ta? Nye a ahkying garai n du li ai, ngu nna Shi hpe htan wu ai. Shi a kanu chyawm gaw, Shi nanhte hpe tsun ai hte maren hkrak hkan galaw nga mu, ngu nna shangun ma ni hpe tsun mu ai.

Dai yang e, Yuda ni a jasan jaseng ai htung hkan shatup na matu, nlung yam kru hpe shadun tawn ma  ai; dai yam shagu hta dang lahkawng masum daram shang lu ai. Yesu gaw, ndai yam ni hta hka ja bang jahpring mu, ngu nna shangun ma ni hpe tsun jang, shanhte hka ntsin dem rai hkra hka ja bang ma ai. Shaloi, Yesu gaw, Ya kamai la nna, poi up wa hpe sa jaw mu, ngu nna shanhte hpe tsun jang, shanhte sa jaw ma ai. Poi up wa gaw, tsabyi chyaru tai mat ai ntsin hpe chyim yu jang dai hpe kanang na la ai hpe n chye da wu ai, hka ja ai ma ni chyu sha chye ma ai. Dai rai nna, la nnan wa hpe shaga la nna, Masha kadai mung grau mu ai tsabyi chyaru shawng jaw lu ma ai; masha ni ram ram lu ai hpang she n mu ai baw jaw ma ai: nang gaw grai mu ai tsabyi  chyaru hpe ya du hkra kyen da ndai, ngu wu ai. Shing rai Yesu gaw, Galile mung na Hkana mare hta shawng nnan e lamik kaumla galaw dan hpang nna, Shi a hpung shingkang madun dan wu ai; Shi a sape ni mung Shi hpe kam sham nga ma ai.

Dai hpang Shi gaw, kanu kanau ni hte Shi a sape ni hte nawng, Kaperna-um mare de yu wa nna, dai yang e mung, gade ya wa n hkring nga ma ai.

Ya hti ai gaw, Madu a Kabu Gara Shiga rai nga ai.

YESU KASHIN KAMUN HKAM LA AI POI NHTOI MUNGGA

Du sa ai ladaw hte hpang wa ai ndai nawku dawjau ai shata hti laika hta daini na nhtoi gaw Hkrismat Ladaw ngut nna Pranwan Ladaw de shang wa sai re. Pranwan ladaw a shawng nnan na laban nhtoi gaw Madu Yesu Hkristu kashin kamun hpe hkam la ai ndai laban poi nhtoi rai nga ai. Karai Kasang rai nga tim shagrit shanem ai hte shinggyim masha ni hpe hkyela ai masing hta shi hkum nan Yawhan Baptista a lata hta kashin kamun hpe hkam la lai wa sai.

Ndai poi shani gaw anhte hkam la sai Kashin Kamun Sakramentu hpe kalang mi bai shadum jahprang ya nga ai. Shangai wa sai Madu Yesu Hkristu gaw anhte hpe hkye hkrang la na matu du sa sai. Anhte hkam la sai Kashin Kamun a majaw n-ging dan tim Karai Kasang a kasha ni shabyin shatai da hkrum sai re.

Ndai poi nhtoi a shadum jahprang ai lam langai gaw n-ging dan tim Shi a kashu kasha ni sabyin shatai da sai re ngu ai hpe dum shai nna shaning ting hta gingdan ai kashu kasha ni byin tai wa lu na matu Madu Yesu matsun ai hte mare Karai Kasang ra sharawng ai hpe hkan shatup nga sa ra lu u ga.

CHYOIPRA AI WENYI HTE KASHIN KAMUN HKAM LA AI NI TAI NGA GA

Karai Kasang a matu salum wan hkru ai daram byin na, nang ra sharawng ai kun? Yawhan Baptista tsun ai gaw, Hkyela Madu gaw, “Chyoipra ai Wenyi hte wan hte kashin kamun jaw ya na” nga ai. Chyum Laika hta anhte yu yu yang, ‘wan’ ngu ai hpe Karai Kasang hte Shi a amu magam hta jai lang ai hpe mu lu ai. Karai Kasang, Mawshe hpe wan grung tim n hkru mat ai sing wum hta ga shaga ai (Pru 3:2). Karai Kasang a hpung shingkang hpe kumla madun ai (Eze 1:4, 13), Karai a magawp maga la ai lam (2 Hk.hk 6:17), Karai a Chyoipra ai lam (Tr 4:24), Tengman ai Tara dara ai lam (Zhk 13:9), hte Shi Madu a sinpawt la htet (Esa 66:15-16). ‘Chyoipra ai Wenyi’ hpe mung kumla madun ai (Mt 3:11, kasa 2:3). Karai Kasang a wan hpe, jasan jaseng ai hte shachyoi shapra lam, Karai Kasang hte Shi a Mungga hpe hkrit hkungga na lam, anhte hta madun ai.

Madu Yesu gaw, wenyi a wan anhte hpe jaw ya ai marang e, anhte ni mung, Shi Madu a kabu gara shiga a kabu gara ai sakse ni tai let ninghtoi tai lu na matu rai nga ai. Madu a mungga gaw anhte a prat hpe galai shai ya lu ai atsam rawng ai hte kaga masha ni Hkristu hpe chye wa lu na matu madi madun ya lu na rai nga ai. Yawhan Baptista zawn, Yesu Hkristu a Tengman ai hte ninghtoi hpe sakse hkam lu na matu, anhte ni mung saw shaga hkrum sa ga ai. 

Madu a Ninggun atsam, Chyeju, hte tsawra ai lam gaw, na a prat hta htoi tu lu na, nang ra sharawng nga ai kun? Shi a Chyoipra ai Wenyi hte hpring tup wa lu na matu, Madu kaw hpyi ga.

Yawhan Baptista wa chyawm gaw, shut hpyit mara hpe raw kau hkrum na, myit malai ai kashin kamun hpe hkam la na sharin achyin sai. Rai yang, shut hpyit mara tsep kawp n kap ai Madu Yesu, hpa majaw Yawhan a kashin kamun hpe hkam la sai kun? Dai hpe yu yang, wudang ntsa hta si hkam sai, Shi Madu a ‘Sai hte Kashin Kamun hkam ai’ lam hpe anhte tau nau mu ya lu na re. Madu Yesu a kashin kamun hkam la ai lam gaw, Karai Kasang a nni nkri hkam la ai shangun ma tai ai Sasana magam hpe hkap la ai hte hpang wa ai lam rai sai. Shi hkum shi, shut hpyit mara lu ai jahpan kaw bang la sai. Madu Yesu gaw, Kawa Karai a sharawng awng ai lam hpe tsep kawp hkap la hkan sa sai. Shi Madu a tsawra myit a jaw e, anhte shut hpyit mara ni a matu si hkam sai.

Karai Kasang hpe tinang a hkum ap nawng ya nna lu la ai, kam hpa ai hte kabu gara ai hpe nang chye nga ai kun? Kawa Karai mung, Shi a kasha hta na chying wa sharawng awng ai lam, anhte na hkra tsun shapraw sai. Chyoipra ai Wenyi mung, dai Yawdan hka kaw nna rawt lung wa ai aten kaw nna, Sasana magam galaw hpang na Madu Yesu hpe sa du shaman ya sai. Madu Yesu gaw, shi hpe kam sham ai ni a matu wenyi ru pawt tai wa sai.

Kashin Kamun hkam la ai shaloi, Sumsing Lamu hpaw malang wa let, Madu Yesu hte Chyoipra ai wenyi a marang e ‘Hka’ mung shachyoi shapra hkrum nna, hpan da ai lam nnan hpang wa sai. Madu Yesu a tinang hkum shagrit kau let ap nawng ai hte kashin kamun hkam la ai mungsung hta anhte kaning rai shang lawm lu na rai?

“Kashin kamun a marang e Hkristu hte rau si hkam let, Shi Madu hte rau hkrung rawt ga! Shi hte rau sharawt la hkrum na matu, Shi Madu hte rau hkrat sum ga, Shi Madu hte rau hpung shingkang hta ning ngai nga lu na matu, Shi Madu hte rau rawt wa ga!” (Gregory of Nazianzus, 7th AD)

Na a prat galai shai wa ai hpe nang mu mayu ai kun? Kabu gara shiga hpe grau kaja ai hte garan kachyan lu ai wa nang tai mayu ai kun? Madu Yesu a shagrit shanem ai lam hpe myit aru yu let, Shi Madu a myit masa ni hpe lu la na matu, Chyoipra ai Wenyi kaw akyu hpyi ga. Dai zawn nang galaw lu ai shaloi, Sumsing Lamu mung na a matu hpaw ya na re. Shi Madu a Sasana Magam hta zet let ai masha ni anhte tai na matu, Chyoipra ai Wenyi a marang e, gram lajang ya na, Madu Yesu jin jin rai nga ai.

Mungkan ga a ‘Jum’ hte ‘N’htoi’ tai na anhte hpe saw shaga da sai. Karai Kasang a hkye hkrang la ai kabu gara shiga hte Tengman ai lam hpe anhte a mai kaja ai marang e chye la lu u ga, Madu Yesu Shi a Tsawra myit hte anhte hpe jahtoi ya mayu nga ai. Na a makau na masha ni hpe kabu gara shiga hta kabu pyaw lu na, nang hkum nan n’htoi tai wa lu u ga, Chyoipra ai Wenyi hte hpring wa lu na matu Madu Yesu kaw hpyi ga.

“Madu Yesu e, chyoipra ai wenyi hte ngai hpe jahpring ya let, kabu gara ai shiga a wan shat hte ngai a salum hpe wan shagrung ya rit. Kawa Karai Kasang hta sharawng awng ai lam Nang Madu tam mu la ai zawn, Nang Madu hta mung sharawng awng ai lam ngai tam mu lu na garum ya rit law. Amen"

MADU YESU KASHIN KAMUN HKAM AI LABAN CHYUM LAIKA

10th JANUARY, 2016

CHYUM MUNGGA DAW 1

ESAIA 42: 1-4. 6-7

Ya hti na gaw, myihtoi Esaia a Laika hta na rai nga ai.

Madu ning nga nna tsun ai gaw: Yu mu, ndai wa gaw ngai shadaw ai nye a shangun ma, ngai lata la ai nye a tsaw ra ai wa rai nga ai: nye a Wenyi shi a ntsa e ngai bang da ya nngai; Shi gaw amyu baw ni hpe tara dara na ra ai.  Shi jahtau na n rai; Shi a nsen hpe sharawt na n rai, mare lam hta e na shangun na n rai; Bye dip kau ai mai-aw hpe Shi n shadaw na hte, kachyi mi sha tu ai wanshat hpe sat kau na n rai: Shi a tara  ding ai lam ga ntsa e garai n grin nga yang, Shi n-gun yawm na n rai; gawng mung run na n rai; zunlawng ni Shi a tara hpe a mada nga na ra ai.

Nang gaw myi kyaw ai ni hpe myi hpaw ya na hte, htawng hta dung nga ai ni hpe shapraw nna, nsin htawng hta dung ai ni hpe shalawt dat na matu, Ngai Madu nan ding hpring ai hte nang hpe shaga la nna, na a lata hpe shadaw let, nang hpe makawp maga nna, masha amyu ni a matu ga shaka, maigan amyu ni a matu nhtoi  tai wa u ga, nang hpe san da de ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

KASA 10: 34-38

Ya hti na gaw, Kasa Laika hta na rai nga ai.

Dai aten hta e, Petru ga hpaw nna tsun wu ai gaw- Karai Kasang masha a myiman n tau ai gaw, ya ngai kaja wa chye se ai: amyu baw shagu hta shi hpe hkrit hkungga ai hte, ding man ai amu galaw ai wa gaw, Shi kaw myiman pa nga ai. Nga yawng nga pra a Madu rai nga ai Yesu Hkristu a marang e, ngwi pyaw ai hte seng ai Kabu Gara shiga hkaw tsun dan u ga nga, Karai Kasang gaw Israela a kashu kasha ni hpang de Shi  a mungga shagun dat wu ai. Yawhan gaw Kashin Kamun lam hkaw ai hpang, Galile mung kaw nna Yuda mung ting kajai gara wa ai lam hpe, nanhte nan chye nga myit dai: Dai gaw Nazaret wa Yesu a lam rai nga ai; Karai Kasang gaw Chyoi Pra ai  Wenyi hte mung, n-gun atsam hte mung, Shi hpe chye ya wu ai. Karai Kasang shi hte rau nga nga ai majaw, mai kaja ai amu shi galaw nna, gumlau nat e zingri zingrat hkrum ai ni yawng mayawng hte hpe shamai ya let, kawan katsan hkawm nga ai.

Ya hti ai gaw, Karai Kasang a mungga rai nga ai.

KABU GARA SHIGA

LUKA 3: 15-16. 21-22

Ya hti na gaw, Luka ka da ai hte maren, Kabu Gara Shiga hta na rai nga ai.

Masha ni chyawm gaw myit mada nga ma ai rai nna, Yawhan gaw Hkristu wa mi hkoi rai nga ai kun? nga nna yawng mayawng gaw tinang a kraw kata e Shi a lam myit nga mayang; Yawhan gaw, ngai gaw nanhte hpe hka hte kashin kamun jaw de ai, rai ti mung, ngai hta atsam grau rawng ai wa gaw sa wa ra ai. Shi a kyepdin sumri raw na pyi ngai n ging nngai: Shi gaw Chyoi Pra Wenyi hta mung, wan hta mung nanhte hpe kashin kamun jaw na ra ai.

Masha nlang kashin kamun hkam la ma ai shaloi, Yesu mung kashin kamun hkam nhtawm, akyu hpyi nga yang, lamu hpaw wa nna dai Chyoi pra ai Wenyi gaw hkrang dan dan Shi a ntsa e hkrudu zawn yu hkrat wa nna, Nang gaw nye a tsaw ra ai Kasha rai nga ndai; Nang hta Ngai sharawng awng nngai law, nga nna lamu de nna nsen dan pru wa ai.

Ya hti ai gaw, Madu a Kabu Gara Shiga rai nga ai.

HKAWHKAM MASUM POI MUNGGA

Mungkan hta amyu baw sumhpa law la ai kaw nna sinpraw hkran na Hkawmhkam masum, hpaji rawng ai marai masum sha Madu Yesu shangai ai shaloi du sa ai chyasam masha ni rai ma ai. Ndai lam gaw masha hkum shagu a matu Shi Madu shangai wa ai rai tim hkapla lu ai myit masin nga ai ni sha mu hkrum lu ai rai nga ai.

Hkawhkam masum gaw shangai wa ai ma Yesu a lam hpe chye lu ai shaloi shanhte a myit masin hta nachying mu hkrum mayu ai myit nga nna hpang jahtum e yak hkak ai lam ni hpe lai di nna shan hte myit ai byin pru wa ai re. Hkrun lam tsan ai, tinang du mayu ai shara hpe atsawm nchye ai, shim lam nnga nna, lagut damya ni nga ai hte kaga yak hkak ai lam ni law law nga tim shanhte a prat dai aten hta Madu Yesu hpe mu hkrum mayu ai myit hta grau ai nnga ai a majaw nbyin byin hkra shakut shaja nna lu la ai shaman chye ju rai nga ai.

Lamu hta paw pru ai shagan langai hta sha, myit maju jung nna hkawm sa ai Hkawhkam masum Madu Yesu hpe mu hkrum lu ai zawn anhte byin mayu ai, grau nna ndai shaning nnan hta law law nga ai rai tim, tinang a asak aprat, wengyi lam hta ahkyak dik htum hpe lata la nna myit masin yawng n-gun mahkra hpe jai lang nna ndai shaning nna hta awngdang ai shaman chyeju hpe hkam la lu u ga.

HKAWHKAM (3) ZAWN AHTE A PRAT HTA MADU YESU HPE MU HKRA TAM YU SAGA AI KUN?

Madu Yesu gaw, shi tsun shana ai hte maren, htani htana ahkrung nga ai Karai Kasang a Kasha hte mungkan ga hpe hkyela na wa rai yang, Shi a Mungga na la ai ni, Shi a magam mu lu ai ni, hpa majaw n kam ma ai rai? Kabu gara shiga ka ai kasa Yawhan tsun ai hta, Madu Yesu mungkan ga de du sa ai rai tim, mungkan ga gaw Shi Madu hpe n chye ai hte, Shi amyu masha ni Shi hpe n hkap la ma ai, nga ai (Yh 1:10-11).          

Madu Yesu n dan n dawng shangai wa sai. Shi shangai wa ai hpe, sagurem ma, matsan mayan ni sha chye dat ma ai. Hpaji chye ai masha n kau mi sha, dai hpe chye la nna, Israela amyu sha ni a hkawhkam shangai wa ai hpe sa du hkungga shagrau na matu Betlehem de sa du ma ai. Dai masha ni gaw Israela amyu masha n rai, tara maigan masha ni she rai nga ai. Shanhte gaw, Hkyela Madu du sa wa na myihtoi ga hpe hti yu, jahta yu ai ni rai na sai. Dai majaw, Hkyela Madu shangai wa na lam hpe ala dingda nga ma ai. Karai Kasang mung shanhte hpe, laklai ai shagan hte lam madun ya nna, zaibru jang rap di let, Betlehem mare kasha de du hkra sa wa masai. Dai shagan gaw laklai ai shagan rai nna, shanhte hpe lam woi na matu mai byin nga ai. Shanhte hpe lam woi madun ai sha n-ga, Hkristu Yesu hpe mu lu u ga, Madu shangai ai shara kaw hkring nga ai.

Karai Kasang hpe chye chyang mayu ai myit a majaw, Sinpraw hkran de na hkawhkam/hpaji sara ni gaw, dum nta, buga ginra, mungdan ni hpe kau da let hkawm sa ra sai. Shanhte mung, Tengman ai chye chyang ai a ru pawt rai nga ai; Karai Kasang a Hpaji hte Ninghtoi rai nga ai, Madu Yesu kaw du lu ma sai. Shangai wa sai hkawhkam kasha hpe mu ai shaloi, shagrit shanem ai hte nawku dau jau let, gingdan ai kumhpa ni hpe sak jaw ma ai. 

Sumsing lamu hte ginding aga a hkawhkam rai nga ai, shinggyim masha ma chyangai dai hpe shanhte kaning rai chye na lu na rai? Nawku hpung a jiwoi jiwa ni sharin ya ai hte maren nga yang, Karai Kasang a hpaw shaleng ya ai lam chyu sha, masha a myit, masin hpe hpaw ya nna Hkristu hpe Hkyela Madu hte Hkawhkam re ai hpe hkap la lu ma ai. “shangai wa ai hkawhkam a hpung shingkang hpe anhte maram lu ga ai; hkawhkam/ hpaji sara ni sa du nawku ai, ma chyangai sha naw rai nga ai Yesu hpe, mauhpa hkungga ai kumhpa ni sak jaw ma ai. Shanhte a myi hta ma chyangai hpe mu ai rai tim, myit masin hta gaw kaga hpe mu nga ai. Ntai nmai ma chyangai ngu anhte myit la tim, Karai Kasang a hpung shingkang gaw shadan shaleng nga sai. Ma chyangai gaw la kasha sha rai tim, Karai Kasang ngu nna nawku hkrum sai. Tsun shaleng dan n lu ai Karai Kasang a arawng sadang nan rai nga sai.               

N mu lu mai ai, htani htana agrin nga ai Karai Kasang gaw, anhte shinggyim masha ni a matu, gawng kya la ai hkum shan hpe dagraw la sai. Ninggawn Tawa Karai a kasha, hkum shan dagraw la nna masha sa tai ai. Dumsu lawng hta, wushat wakang hta taw nga na matu, Karai Kasang ahkang jaw sai. Ma chyangai a hkrap ngoi ai nsen hpe shi na ya ai. Dai n sen gaw, nni nkri hkam la ai aten mungkan masha ni hkrap ngoi ai nsen hte maren rai nga ai. Dai gaw, Shi Madu nan rai nga ai hte Karai Kasang a hpung shingkang arawng sadang hpe dai ma chyangai hta mu lu ai gaw hkawhkam masum rai nga ai. 

“Kaning rai n me law, anhte a matu kasha shangai nna, anhte hpe shadang sha jaw mi ai, shi a lahpa ntsa e up ai ahkang mara nga na rai ai” (Esa 9:5) nga ai myihtoi Esaia a ga gaw ndai lam hpe madi madun nga ai. 

Makam masham ngu ai gaw, Karai Kasang a awm dawm kumhpa rai nna anhte a matu galaw da ya ai. Dai hpe, Chyoipra ai Wenyi a garum ya ai marang e, anhte a myit masin salum a myi hpe hpaw ya nna, Yesu Hkristu hku nna Karai Kasang hpaw shaleng dan ai Tengman ai hpe, anhte chye na, hkap la lu ga ai. Makam masham hta, shinggyim masha a sharawng awng ai lam, nyan hpaji gaw Karai Kasang chyeju kumhpa hte pawng hpawng galaw ai. “kam sham ai lam ngu ai gaw, Karai Kasang a shaman chyeju marang e, Karai a Tengman ai lam hpe, sharawng awng ai hte chye chyang wa ai hpe, sakse madun let tup hkrak galaw ai amu magam rai nga ai” (Thomas Aquinas). 

Madu Yesu hte hkum nan chye chyang, hkrum katut ai lam gaw, Karai Kasang hpe hkum nan chye la ai lam rai nga ai. Hpaji sara ni/hkawhkam masum hte Madu Yesu hkrum zup ai hta anhte mu lu ai gaw, Yuda amyu masha ni a matu sha n rai, amyu masha yawng a matu, Shi a kasha hpe hkyela Madu, hkawhkam hku nna jaw ya ai Karai Kasang a yaw sing ai lam hpe rai nga ai. Madu Yesu du sa ai gaw, Yuda amyu hte Tara maigan amyu masha ni, Karai Kasang hte htani htana ngwi pyaw simsa nga lu na matu rai nga ai. Dai majaw, Yuda hte Tara maigan masha ni, shanhte a prat hkrun lam hta Hkyela Madu hpe mu lu u ga, anhte akyu jawm hpyi ya ga! Madu Yesu Hkristu a ninghtoi hpe masha kaga ni mung mu lu u ga, nang sakse hkam hkawm sa nga ai kun? 

“Madu Yesu Hkristu e, shinggyim masha yawng a matu hkyehkrang la lam hpe la sa ya ai majaw chyeju dum ga ai. Nang Madu a kabu gara shiga gaw, dai ni jang, amyu masha shagu, mungkan jut shara shagu de chyam bra wa lu u ga law. Ngai hte hkrum zup ai ni a matu, kabu gara shiga a kabu hpa lam sakse tai lu na ngai hpe garum la rit law! Amen!

HKAWHKAM MASUM POI CHYUM LAIKA

3rd JANUARY, 2016

CHYUM MUNGGA DAW 1

ESAIA 60: 1-6

Ya hti na gaw, myihtoi Esaia a Laika hta na rai nga ai. 

Yerusalem e, rawt u; htoi tu u; na a nhtoi du ra ai; Madu a hpung shingkang na a ntsa e dan hkung nga ai Kaning rai nme law, nsin gaw ginding aga hpe, saiwan gaw na a ntsa e paw pru nna, Shi a hpung shingkang na a ntsa e dan pru na ra ai. Maigan amyu ni gaw na a nhtoi de, hkawhkam ni gaw na a nhtoi tu kabrim ai de du sa na mara ai.

Baw sharawt nna, grup yin mada yu u; shanhte yawng zuphpawng nna nang hpang de du wa mara ai. Na a shadang sha ni gaw sumtsan mung de na wa nna, na a shayi sha ni gaw ba wa ai hpe hkrum na mara ai. Shaloi, nang mu mada yang, na a myiman htoi kabrim na ra ai; na a myit  masin kabu gara ai hte kaba wa na ra ai; kaning rai nme law, nammukdara a sutgan nang hpang de du wa na ra ai. Gawla-uk wunawng ni, Midian hte Ehpa Mung na gawla-uk hkalung ni gaw, nang hpe ka-up na ra ai; Sheba mung na ni yawng du na mara ai; shanhte gaw aja hte lawban lang nna, Madu hpe shakawn kungdawn na lam kajai gumhkawng na mara ai.

Ya hti ai gaw, Karai kasang a mungga rai nga ai.

CHYUM MUNGGA DAW 2

EHPESU 3: 2-3A. 5-6

Ya hti na gaw, Ehpesu ni hpang de San Pawlu shagun dat ai Laika hta na rai nga ai.

Hpu nau ni e, Karai Kasang nanhte hpe jaw mayu ai chyeju lam, Shi nye a lata hta ap ya da sai hpe nanhte na la sai nhten; dai hta n-ga, dai mung sung ga sung hpe shingran ga hte ngai hpe shana dat ai gaw, nanhte na la sai hpe nawn da nngai. Ndai mung sung lam, ya aprat e Shi a chyoi pra ai kasa ni hte myihtoi ni kaw, Wenyi a shadan dan ai hte maren, moi shawng na aprat ni hta e shinggyim masha kaw na shana ya mu ai. Dai mung sung lam a lachyum gaw maigan amyu ni Yuda amyu ni hte rau, ga ndat a sali wunli hkam la lu nna, shanhte hte rau hkum hkrang langai sha tai wa ai hte, ga ndat ni hpe jawm lu jawm la ai ni tai wa nga ma ai.

Ya hti ai gaw, Karai kasang a mungga rai nga ai.

KABU GARA SHIGA

MAHTE 2:1-12

Ya hti na gaw, Mahte ka da ai hte maren, Kabu Gara Shiga hta na rai nga ai.

Ya Herawt hkawhkam a lakhtak hta, Yuda mung na Betlehem mare e Yesu shangai wa ai hpang sinpraw mung na hpaji rawng ai masha ni Yerusalem mare de sa du ma ai rai nna, shangai wa sai Yuda Hkawhkam wa gaw kanang e nga a ta? Shi a shagan hpe sinpraw mung hta mu lu sai rai nna, Shi hpe nawku na matu sa du ga ai, nga san mu ai.

Herawt hkawhkam dai ga hpe na jang , shi hte Yerusalem na ni yawng gaw myit kahpra mat ma ai rai nna, dai amyu na hkinjawng agyi ni hte tara sara ni yawng hpe jahpawng shinggyin da nhtawm, shanhte hpe Hkristu gaw kanang e shangai wa na a ta? nga nna san wu ai. Shanhte gaw, Yuda mung na Betlehem mare e shangai wa na ra ai; kaning rai nme law, myihtoi wa ka da ai gaw. Yuda mung na Betlehem e, Yuda mung agyi ni hta kaji htum rai nga ndai n rai; nye a amyu Israela hpe woi rem na Du gaw, nang kaw nna pru wa na ra ai nga ai, ngu nna shi hpe tsun dan mu ai.

Shaloi Herawt gaw hpaji rawng ai ni hpe lagyim shaga la nna, dai shagan shanhte kaw dan pru ai aten hpe azin ayang san la nhtawm, Nanhte sa wa nna dai ma, kaji hpe azin ayang hkan tam mu; shi hpe mu jang ngai mung shi hpe sa nawku lu u ga, ngai hpe wa shana rit, ngu nna shanhte hpe Betlehem mare de sa shagun dat mu ai.

Ya hkawhkam wa a ga na la jang, shanhte pru sa wa ma ai. Shaloi, yu mu, sinpraw mung e mu mada ai shagan gaw, shanhte a shawng e sa wa nna, ma kaji nga ai shara ntsa ang e hkring mat ai. Dai shagan hpe bai mu ai shaloi, shanhte nachying kabu gara nga ma ai. Dai nta de shang wa jang, ma kaji hte Shi a kanu Maria hpe mu ma ai rai nna, lahput hput di let, Shi hpe nawku ma ai. Tinang  a sut sumpu ni hpe hpaw nna, Shi hpe aja, lawban hte mura ngu ai kumhpa sak jaw ma ai.

Herawt hpang hku bai n wa mu ga, yup mang hta shanhte hpe madun dan ai majaw, shanhte gaw tinang a mungdan de lam kaga hku wa mat ma ai.

Ya hti ai gaw, Madu a Kabu Gara Shiga rai nga ai.

SHANING NNAN MUNGGA (KARAI A KANU CHYOIPRA AI NU MARIA POI)

Ninggawn Karai Kasang a Mau hpa Shaman Chyeju hta anhte yawng kabu gara nga ga law!

Madu Karai jaw ya ai Shaning ningnan hpe anhte hkap hkam la sa ga ai. Dai shaning ningnan hta ngwi pyaw awng dang ai hte sak hkrung hkawm sa let, Shi Madu hpe chyeju shakawn na gaw, anhte a matu mai kaja la nga ai hte ahkaw ahkang kaba nan rai nga ma li ai.

Rai sa! Shaning ningnan hta anhte du shang sa ga ai hte maren, ndai shaning ningnan hta anhte myit yaw shatawng shada da ai lam ni mung, marai hkum hpra hta nga na re. Tinang a sak prat hta kaning rai shakut shaja sa wa na, kun dinghku a matu yaw shada da ai lam ni, buga ginra na ra kadawn ai lam ni hta kaning di na, mungdaw, mungdan a shawng lam gam maka a matu kaning rai shakut sa wa na, tinang gun hpai nga ai magam bungli ni a matu yaw sing da ai lam ni, law law wa nga na re. Nga mung nga ra na re. Dai gaw shaning ningnan de du shang wa ai shaloi, anhte myit dum ai lam yan ni rai nga ai.

Rai yang, lai wa sai shaning ting hpe mung anhte myit sumru yu ai lam ni galaw chye ga ai. Tinang galaw lai wa sai lam yan ni a awng dang ai lam, ningra ai lam, hkrat sum ai lam ni, hpe sawn sumru yu na mung ahkyak ai lam nan rai nga ai. Dai zawn galaw la lu ai marang e, anhte matut hkawm sa na rai nga ai shaning ting a matu myit dum mai ai ginlam ni lu la na rai nga ai.

Dai hta, tinang hkum nan hta mung, kun dinghku masha shada da mung, htingbu wa hte mung, Karai Kasang hpe mung, shingra tara makau grup yin hpe mung, kade daram shut kau lai wa sai hpe anhte myit dum lu na ahkyak nga ai. Myit aru yu ai marang e, anhte n shut sana ngu na gaw n tsun lu ai rai tim, hkum nan galai shai wa lu na matu dum hprang la lu ai hte Karai Kasang kaw akyu hpyi nna ra kadawn nga ai chyeju atsam ni hpe lu la na matu, anhte hpe lam hpaw ya na re.

Karai Kasang gaw anhte hpe hkying ten shagu hta bau sin makawp maga ya nga ai, ra kadawn nga ai chyeju ni jaw ya nga ai hpe dum hprang lu na kaja dik nga ai. Madu Karai hta sha n rai yang, hpan da hkrum ai anhte ni hpa n-galaw lu ai hpe dum shai mai nga ai. Karai Kasang hta myit machyu jung, kam sham, myit mada, tsawra nga let ndai shaning ningnan ting hta ap nawng shakut hkawm sa wa ga ngu yawng hpe saw shaga mayu nngai law!!!

“Karai Kasang hta shingbyi nga ai gaw, masha wa hpe shamyet nga ai hta, grau kaja nga ai” (Shk 118:8). 

Karai Kasang jaw ya na rai nga ai Shaning ningnan a mauhpa chyeju atsam, anhte yawng a ntsa, second shagu hta adu nga u ga, shada da akyu hpyi ya ai hte Hkristu hta manoi nga ga law!!!

Mungga a kanu Nu Chyoipra ai Maria mung anhte hta ra nga ai chyeju ni hpe Trinita kaw hpyi garum ya na rai nga ai.

KARAI A KANU CHYOIPRA AI MARIA A POI CHYUM LAIKA

January 1, 2016

CHYUM MUNGGA DAW 1

BU HKAWM 6: 22-27

Ya hti na gaw, Bu Hkawm Laika hta na rai nga ai.

Maw she hpe Madu tsun wu ai gaw: Arun hte shi a shadang sha ni hpe ning ngu tsun u: Israela a kashu kasha ni hpe ning ngu shaman ya mu: Madu nang hpe shaman ya nna, bau sin nga u ga; Madu nang hpe Shi a myi man a nhtoi jahtoi ya nna, matsan dum nga u ga, Madu nang hpe mada yu nna, ngwi pyaw simsa ai hpe jaw ya u ga law, ngu na rai myit dai.

Shing rai, shanhte gaw, Israela a kashu kasha ni a ntsa e, nye a mying ningsang hpe gang shaga la nna, ngai shanhte hpe shaman chyeju jaw na we ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

GALATI 4:4-7

Ya hti na gaw, Galati masha ni hpang de San Pawlu shagun dat ai Laika hta na rai nga ai.

Hpu nau ni e, Aten ladaw gu jang jep ai tara npu e nga ai ni hpe hkye hkrang shaw la na hte, kasha shatai na chyeju anhte hkam la lu na matu, numsha kaw na shangai ai hte, dai jep ai tara npu e prat wa ai Shi a Kasha hpe nan, Karai Kasang gaw anthe hpang de shangun dat wu ai.

Ya nanhte gaw, kashu kasha rai nga myit dai majaw, Karai Kasang Shi a Kasha a Wenyi hpe anhte a myit masin hta shangun dat nna, dai Wenyi mahtang gaw, Abba, Wa e, nga nna anhte hta jahtau nga ai. Dai rai nna nang gaw mayam naw rai nga ndai n rai, kasha nan rai nga nit dai; kasha nan rai nga yang gaw, Karai Kasang a marang e, sali wunli hkam la ang ai wa mung rai nga ndai.

Ya hti ai gaw, Karai kasang a mungga rai nga ai. 

KABU GARA SHIGA

LUKA 2: 16-21

Ya hti na gaw, Luka ka da ai hte maren, Kabu Gara Shiga hta na rai nga ai.

Dai aten hta e, sagu rem ai ni Betlehem mare du hkra sa nna, Maria yan Yosep hpe mung, dumsu wakang hta kaleng taw nga ai ma chyangai hpe mung mu ma ai. Shi hpe mu ma yang, dai ma a lam shanhte hpe shana dan sai hte maren, shanhte tsun kajai dat ma ai. Na la lu ai ni yawng hte mung, sagu rem ai ni shanhte hpe tsun dan ai ga a majaw mau nga ma ai.

Maria chyawm gaw, dai ga mahkra hpe matsing la nna, shi a myit hta e sumru yu nga ai. Sagu rem ni mung shanhte hpe tsun dan sai hte maren, na la lu ai hte mu la lu ai lam mahkra a majaw, Karai Kasang hpe shakawn  kungdawn, shagrau sha-a let bai wa ma ai. Dai ma kaji hpe ashan kadoi na matu, matsat ya nhtoi du jang, kanu a hkritung e garai n rawng yang, lamu kasa shamying da ai amying hte maren, Shi hpe Yesu ngu nna shamying ya mu ai.

Ya hti ai gaw, Madu a Kabu Gara shiga rai nga ai.