CHYOI PRA AI HTINGGAW POI MUNGGA

Masha langai shangai wa ai shaloi machye machyang shi a bawnu hta kaman zawn hpa nrawng ai nga nna hpaji chye ai masha ni tsun ma ai. Asak apart kaba wa ai hte maren mu la na la ai lam ni kaw nna machye machyang hpe shajat la nga ai. Dai rai yang shangai wa ai kaw nna kaba wa ai ahkying aten hta rau nga ai kanu kawa kahpu kanau ni a kasi hpe hkan nna masha langai a myit masa sat lawat hpe dawdan ya chye nga ai.

Chyoi Pra ai htinggaw poi hpe galaw shaloi San Yosep hte Nu Maria a lam hpe chyum laika hta nna chye la mai ai lam ni nlaw ai rai tim Kasha Yesu a lam hpe ka tawn da ai chyum laika kaw nna shan kanu yan kawa a lam hpe grau nna chye la mai nga ai. Hpa majaw nga yang kashu kasha ni gaw kanu kawa ni kaw nna mu la, na la ai lam hi hta mahta nna shanhte a ahkyang lai len sat lawat ni hpe gaw gap ai majaw re. Kasha Yesu a myit masa lam tsun shaga ai lam hte galaw sa ai lam ni gaw kanu yen kawa kaw nna lu la ai sali wunli re ngu tsun mai nga ai.

Chyoi Pra ai htinggaw hpe kasi la nna asak aprat kaba sai ni gaw naw kaji ai ni hpe kaja ai kasi madun lu na matu ahkyak nga ai zawn kaji ai ni mung tinang hkum hpe dum shai nna kaja ai lam ni chyu sha lata nna tinang a asak aprat hta sung jashawn let kaja ai kun dinghku hpe gaw gap ai hta lit nga ai hte maren yawng shawng lawm lu u ga.

JET AI HKRISTAN KUN DINGHKU

Mungga hti ai; Shalai wa ai poi aten, Madu Yesu asak (12) ning ten hta, Shi Madu a kanu yan kawa gaw, Yerusalem mare de woi lung ma ai. Bai wa ai aten hta chyawm, kanu yan kawa hpe n tsun dan ai sha, ngam taw nga ai. San Yosep hte Nu Maria mung, jinghku jingyu ni, manaw manang ni a lapran e tam yu nna n mu jang, Yerusalem mare de bai lung tam sai. Nawku htingnu na Chyum laika sara ni a lapran e, chyum mungga ni hpe san htai galaw nga ai, chye chyang kung kyang la ai kasha hpe wa mu ma ai.  Nu Maria chyawm gaw, dai mu mamu a lam hpe shi a salum hta kyem da nga ai.

Mungga hpe sumru ai; Kun dinghku ngu ai gaw Yesu, Maria Yosep kun dinghku hta pyi gaw kalang lang, yak hkak ai aten ladaw ni nga nga ai. Tim, dai lam ni gaw, kun dinghku ni a tsawm htap ai lam hpe shayawm kau lu na nrai. Nu Maria hte San Yosep mung, mare kaba hte tsan ai, Nazareth mare kaji de bai hkan nang wa ai, shanhte a kasha a lam hpe grau chye madat wa sai. Shi hpe yu kaji ai majaw n rai, kawa a n’ta hta apyaw sha mai nga nga ai shanhte a kasha a majaw rai nga ai. Kawa Karai hpe ap nawng tawn da ai gara nawku jawng kaw rai tim, Madu Yesu sa du nga nga ai rai yang, Nu Maria hte san Yosep gaw myit tsang lam n nga ai.

Dai majaw, Chyoipra ai Htinggaw poi hpe anhte shakawn shagrau galaw nga ai ten, anhte kadai a kun dinghku hta rai tim, Chyoipra ai Htinggaw rai nga ai, Yesu, Maria, Yosep a kun dinghku lam hpe hti yu nna matsing la mai nga ai. Dai hpe yu nna, kun dinghku gaw kade yak ai rai tim, pyaw ai rai tim, kun dinghku sha rai nga ai.

Mungga hpe htan ai; Ngai a kun dinghku a matu, n-galaw kau sai lam ni gaw, hpa mi rai sai kun? Dai ni mungkan ting na kun dinghku ni hpe shakawn shagrau ga! Ngai a kun dinghku masha ni a matu lama ma mau hpa amu ngai wa galaw dan na re.

Mungga hte akyu hpyi ai; "Madu e, ngai a kun dinghku kata na kaja ai dinghku masha ngai tai lu na garum la rit. Shaman chyeju ni, mayak mang hkang ni hpe gun wa ai rai tim, shaman chyeju ni grau law law lu mayu nngai law. Mayak mang hkang ni du wa ai rai tim, kun dinghku a matu kaja ai de byin shangun ya rit. Shaman chyeju lu na matu chyam dinglik yu ai lam sha rai u ga. Anhte kun dinghku masha ni yawng hkra, ngwi pyaw, mai hkam kaja, simsa nga lu na matu shaman ya rit law, Amen."

CHYOIPRA AI HTINGGAW POI SHANI NA CHYUM LAIKA

December 27, 2015

CHYUM MUNGGA DAW 1

SIRAK 3: 3-7. 14-17a.

Ya hti na gaw, myihtoi Sirak a Laika hta na rai nga ai.

Kashu kasha ni tinang a kawa hpe hkungga lara na matu, Karai Kasang hkang da nu ai; kanu gaw shi a shadang sha ni a ntsa e up hkang na ahkang aya hpe Madu nan jaw da nu ai. Tinang a kawa hpe hkungga lara di ai wa gaw, shut hpyit mara shaprai kau ai amu hpe galaw nga ai; tinang a kanu hpe akaw alaw di ai wa mung, sutgan law law mahkawng da ai wa hte bung nga ai. Tinang a kawa hpe hkungga ai wa gaw, asak galu na ra ai; kanu a myit shadik shapyaw ai wa mung, Madu hpe madat mara nga ai.

Ngai sha e, na nwa asak kaba wa ai sahloi, shi hpe bau garum nga u; shi hkrung nga ai nhtoi mahkra hta, shi a matu yawn hkyen shara hkum tai et. Shi a myit n gring wa ti mung, nang hkam kaja ai hte n-gun rawng ai wa gaw, nwa a myit n-gun kya ai hpe hkam sharang nna, shi hpe n gawn n sawn hkum di u; kaning rai nme law, nwa hpe sumnung shingdi ai hte galaw ya ai lam hpe galoi mung malap kau ya na n rai; na a mara raw dat ya na lam tai na ra ai.

Ya hti ai gaw, karai kasang a mungga rai nga ai.

CHYUM MUNGGA DAW 2

KOLOSE 3: 12-21.

Ya hti na gaw, Kolose masha ni hpang de San Pawlu shagun dat ai Laika hta na rai nga ai.

Hpu nau ni e, Nanhte gaw Karai Kasang a lata la ai amyu rai nna, chyoi pra ai ni hte tsaw ra hkrum ai ni rai nga myit dai. Dai re ai majaw, matsan dum chye ai, mai kaja ai, myit nem ai, summung shingdi ai, myit galu kaba ai dagraw nga mu; nanhte a n-gun kya ai hpe shada da hkam sharang nna, mara langai ngai  nga yang gaw, shada da raw dat hkat nga mu. Madu gaw nanhte a mara raw dat kau ai hte maren, nanhte mung  shada da raw dat ya mu Hpang jahtum e, dai yawng hte hpe matut da na hte jahkum shatsup ya na matu tsaw ra ai myit hpe dagraw hpun nga mu.

Nanhte a myit masin hta e mung, Hkristu a ngwi pyaw ai lam a up nga u ga; kaning rai nme law, hkum hkrang langai sha a daw shan ni tai lu hkra, nanhte hpe shaga la manit dai. Dai hta n-ga chyeju dum ai myit nanhte hta e arawng nga mu.

Hkristu a mungga gaw nanhte hta n taw n tsang ai shanu nga u ga: hpaji byeng-ya amyu myu hte  nanhte shada da sharin shaga nna, shadum jahprang ya mu. Nanhte  a kraw lawang hta e Karai Kasang hpe chyeju dum let, shakawn kungdawn ga, mahkawn mangoi ga, wenyi hte seng ai laka ga hpe mahkawn mangoi nga mu.

Nanhte hpa lam galaw myit yang, ga hte rai ti mung, amu hte rai ti mung, Madu Yesu a amying ningsang hta galaw nga nna, Shi a marang e Kawa Karai Kasang hpe chyeju dum nga mu.

Numsha ni e, tinang a madu wa hkang ai hku hkan nga mu; dai gaw Madu a man e sut nga ai. La ni e, Madu jan ni hpe tsaw ra nga nna, shanthe hpe kajet kaje hkum rai nga myit.

Ma ni e, kanu kawa ni hpe lam shagu hta madat mara nga mu: dai gaw, Madu a man e sharawng awng ai lam rai nga ai. Kanu kawa ni e, nanhte a ma ni myit n kaji u ga, shanhte hpe hkum jahte nga mu.

Ya hti ai gaw, Karai kasang a mungga rai nga ai.

KABU GARA SHIGA

MAHTE 2: 13-15. 19-23

Ya hti na gaw, Mahte ka da ai hte maren, Kabu Gara Shiga hta na rai nga ai.

Ya hpaji rawng ai ni wa mat ai hpung, yu mu, Madu a lamu kasa langai mi yupmang hta Yosep kaw dan pru nna, rawt u, dai ma kaji hte shi a kanu hpe woi la nna, Egutu mung de hprawng sa u; ngai nang hpe bai shaga ai ladaw du hkra dai yang e nga nga su; kaning rai nme law, dai ma kaji hpe sat kau na, Herawt tam magang ra ai, ngu wu ai. Shaloi, shi rawt nna, dai ma kaji hte shi a kanu hpe, shana ladaw e woi la nna, Egutu mung de htawt wa ai hte, Herawt nsa hkyet ai ladaw du hkra, dai yang e a nga nga ai. Dai gaw, Ngai Sha hpe Egutu mung na ngai shaga la se ai, nga nna, myihtoi a n-gup hte Madu tsun ai ga gaw, dik wa u ga matu byin wa ai.

Ya Herawt nsa hkyet mat ai hpang, yu mu, Madu a lamu kasa langai mi, Egutu mung hta e, yup mang hta Yosep kaw pru nna, Rawt u, dai ma kaji hte shi a kanu hpe woi la nna Israela a mung de wa su; dai ma a asak hpe tam ai ni si mat masai,  nga ai. Shaloi shi rawt nna, dai ma kaji hte shi a kanu hpe woi la nhtawm, Israela a mung de bai wa ai. Rai ti mung, Arkela-u, shi a kawa Herawt a malai, Yuda mung hta e hkawhkam tai nga ai hpe shi na wu ai shaloi, dai mung de shang na shi hkrit nga ai: dai hta kaga, yup mang hte shi hpe bai madum dan ai majaw, Galile mung de shi bai htawt nna, Nazaret ngu ai mare hta a nga nga ai. Dai rai nna, Nazaret wa shi hpe ngu na maru ai, nga nna  myihtoi ni tsun ai ga gaw dik wa sai.

Ya hti ai gaw, Madu a Kabu Gara Shiga rai nga ai.

HKRISMAT POI SHANI NA MUNGGA

Anhte shing gyim masha ni gaw kabu pyaw hpa lam hpe tam ai shaloi kaja ai hte nkaja ai hpe galaw chye nga ai. Nkau mi gaw masha nmu ai sha lama ma nkaja ai hpe galaw lu yang kabu pyaw nga ai. Nkau mi chyawm gaw kaja ai amu bungli hpe galaw nna kabu pyaw chye nga ai. Dai rai yang kaja ai masha gaw kaja ai amu bungli hpe galaw nna kabu pyaw ai zawn, nkaja ai masha chyawm gaw nkaja ai hpe galaw nna kabu pyaw ai re ngu sawn la mai nga ai.

Lama wa nna, Madu Yesu Hkristu shangai wa ai shana hta mungkan masha ni hpe hkye hkrang la ai wa shangai wa sai re ngu mungkan hpe ndau shana ai rai yang kadai masha yawng gaw Madu Yesu hpe mu hkrum na matu shakut shaja na re ngu nmai tsun na re. Karai Kasang a Mungga hte maren kam sham ai masha ni sha teng sha Madu Yesu Hkristu hte mu hkrum na matu shakut shaja na rai nga ai.

Madu Yesu shangai wa ai hpe shawng nnan chye la nna mu hkrum ai gaw matsan mayan re ai sagu rem ni rai nga ai. Herod hkaw hkam wa chyawm gaw Madu Yesu shangai wa na re ngu Hkaw Hkam masum tsun shana dan ai raitim shi hkum nan nhkap la lu ai majaw sa du nawku na matu ahkaw ahkang sum mat nga ai. Rai tim mung sagum rem ai ni gaw lamu kasa ni shana ai hte maren myit sharawng awng ai hte hkan tam shakut ai majaw Madu Yesu Hkristu shangai wa ai shara de du nna sa du nawku lu ma ai. Karai Kasang a Kabu Gara Shiga hpe na la ai bung ai raitim tinang a myit hta dai Kabu Gara ai Shiga hpe sharawng awng ai myit masin nga ai ni chyu sha dai shaman chye ju hpe hkam la lu nga ai.

Madu Yesu Hkristu shangai wa ai ndai Hkristmat poi hpe shang lawm ai ni anhte gaw Shi Madu hpe hkap tau la lu na matu kaja ai myit masin hpe gaw gap da lu nna kaja wa sha sharawng awng ai myit hte anhte a asak aprat hta Shi Madu hpe hkap tau la lu u ga.

MUNGGA GAW MASHA TAI WA SAI

Kasa Yawhan a kabu gara shiga nhpaw hta Karai Kasang a mungga hte seng nna hkum tsup hkra, shadan shaleng ka tawn da nga ai. Mungga gaw Karai Kasang rai nna htani htana anga nga ai. Mungga gaw Hpan Madu re. Mungga gaw shinggyim masha hpe atsam nnan jaw ya ai. Mungga gaw Shi a amyu masha ni hpang de sa ai rai tim hkap la n hkrum ai.

Mungga gaw masha tai wa nna, anhte hte rau anga nga sai, hte mu lu ai Karai Kasang tai wa nna, Karai Kasang a chyeju hte tengman ai hpring let, Kawa hta na Kasha shingtai a hpung shingkang zawn, anhte shi a hpung shingkang hpe mu lu sagaw ai.

Shinggyim masha dagraw la ai Mungga gaw, Mawshe hte Yawhan sakse hkam ai hta grau dik ai, tsaw dik htum ai Karai Kasang a kumhpa rai nga ai. Madu Yesu chyu sha, Karai Kasang a hpring tsup ai chyeju hte hpring nna, Shi Madu anhte hte rau sa nga ai marang e, Karai Kasang a hpaw shaleng dan ai lam gaw hkum tsup wa sai. Madu Yesu hta, n mu lu ai Karai Kasang hpe anhte mu lu sa ga ai. Rai yang, ndai ‘kabu gara ai shiga’ gaw, dai ni na anhte a teng ai lam hpe, galoi, kaning rai, galai shai ya lu na rai kun? Teng nga ai, tsawra myit hte shakut shaja ai marang e, Chyoipra ai wenyi hte Shi a kasha hpe shangun dat ya ai Kawa Karai a chyeju hpe kam hpa ai marang e, shani shagu na anhte a prat hta mu mada lu ai hkye hkrang la ai lam a kumla ni hpe yu nna mung, anhte shachyam  shabra sa wa lu na rai nga ai.

“Yawng hpe chyeju hte hpring ai Hkrismat Poi ra u ga law” ngu shakram dat lu nngai!!!

HKRISMAT SHANI NA CHYUM LAIKA

December 25, 2015

CHYUM  MUNGGA  DAW 1

ESAIA 52: 7-10

Ya hti na gaw, myihtoi Esaia a Laika hta na rai nga ai.

Kabu gara ai shiga gun nna, ngwi pyaw ai lam shana ai wa a lagaw, gade tsawm htap nga a hka! Kaja ai shiga kajai gumhkawng ai hte, hkye hkrang la ai lam shana ya let, na a Karai Kasang up nga ai, nga nna Ziun hpe tsun shana ai wa a lagaw gaw, bum lang ntsa e gade tsawm htap nga ahka! Na a sin langa ni a nsen madat u; shanhte nsen sharawt nna, kabu gara ai hte rau garu ma ai: kaning rai nme law, Madu gaw Ziun mare de nhtang wa ai hpe, tinang nan myi chyaw mu lu na ma ai.

Yerusalem mare na katsi katsang shara ni e, mahkawn mangoi let rau garu mu: Madu gaw, Shi a amyu hpe shalan shabran ai hte, Yerusalem mare hpe hkye mawai la wu ai. Madu gaw, masha amyu baw ni mahkra a man e Shi a chyoi pra ai lahpum shadawng dan nna, anhte a Karai Kasang a hkye hkrang la ai lam gaw, lamu ga htum hkra dan leng wa sai. Ya hti ai gaw, Karai Kasang a mungga rai nga ai.

CHYUM MUNGGA DAW 2

HEBRE 1: 1-6

Ya hti na gaw, Hebre masha ni hpang de San Pawlu shagun dat ai Laika hta na rai nga ai.

Hpu nau ni e, Karai Kasang gaw moi na lakhtak hta, prat mi hte prat mi lam amyu myu hku nna, myihtoi ni a n-gup hte ji wa ni hpe ga tsun da nu ai. Ndai hpang jahtum na aten ladaw hta, Shi a Kasha a n-gup hte anhte hpe ga matsun jaw da mani ai. Dai Kasha hpe, sali wunli mahkra hkam la na matu, Shi san da sai rai nna, Shi a marang e ndai mungkan ga hpe hpan tawn da nu ai.

Dai Kasha gaw Karai Kasang a hpung shingkang tu kabrim ai nhtoi rai nga ai hte, Karai atai a hkrang sumla rai nga nna, Shi hkang da ai mungga a atsam hte, Shi yawng mayawng hte hpe bau sin nga ai.

Ya, shut hpyit mara shatsai kau ya nna, matsaw ningtsang na daru magam a hkra maga de Shi dung nga nna, lamu kasa ni hta Shi grau reng ai amying hkam la sai hte maren, shanhte hta Shi grau reng ai wa tai nga ai. Kaning rai nme law, ‘Ngai Sha Nang rai nga ndai; dai ni e Ngai Nang hpe shaprat sade ai; Bai nna, Ngai gaw Shi a Kawa tai nna, Shi gaw Ngai Sha rai na ra ai,’ nga nna Karai Kasang tsun ai ga hpe, gara lamu kasa hpe Shi tsun yu a ta? Dai hta kaga, Shi a Kasha Alat hpe mungkan ga de jashawn dat ai shaloi, ‘Karai Kasang a lamu kasa ni yawng Shi hpe nawku mu ga,’ nga nna tsun wu ai.

Ya hti ai gaw, Karai Kasang a mungga rai nga ai.

KABU GARA SHIGA

YAWHAN  1: 1-5. 9-14

Ya hti na gaw, Yawhan ka da ai hte maren, Kabu Gara Shiga hta na rai nga ai.

Shawng npawt e Mungga nga nga ai; dai Mungga gaw Karai Kasang hte rau nga nga nna, dai Mungga nan Karai Kasang rai nga ai. Dai Mungga gaw shawng npawt e Karai Kasang hte rau nga nga ai Arai yawng  mayawng hte gaw  Shi a marang e tai wa ai rai nna, Shi n galaw lawm ai gaw langai pyi n nga ai. Shi hta e, asak daju rawng nga ai rai nna, dai asak gaw masha ni a nhtoi rai nga ai. Dai nhtoi gaw nsin hta htoi nga nna, nsin mahtang dai hpe n dang kau lu ai.

Mungkan ga e shangai wa ai masha yawng hte hpe jahtoi ya ai Nhtoi nga nga sai: Shi gaw Nhtoi majing rai nga ai. Shi gaw, mungkan ga e nga nga ai hte, mungkan ga mung shi a marang e tai wa sai; rai ti mung, mungkan ga gaw Shi hpe n chye wu ai. Shi gaw Shi a buga de du sa ti mung, Shi a baw sang ni Shi hpe n hkap la ma ai. Shi a amying ningsang hpe kam sham nna, Shi hpe hkap la ai ni yawng hte hpe chyawm gaw, Karai Kasang a kasha ni tai lu na atsam Shi jaw da nu ai; dai ni gaw, asai hte shaprat ai ni n rai, hkum shan a myit hte mung n rai, masha a myit maw ai lam hte mung n rai, Karai Kasang e shaprat ai ni sha rai nga ma ai.

Mungga gaw masha a hkum shan dagraw la nna, anhte hte rau nga sai. Dai rai nna, Kawa kaw nna shaprat ai Kasha Shingtai a hpung shingkang zawn, Shi a hpung shingkang hpe anhte mu lu saga ai.

Ya hti ai gaw, Madu a Kabu Gara Shiga rai nga ai. 

DU SA LADAW LABAN (4) MUNGGA

Kabu pyaw hpa lam gaw masha hkum shagu ra sharawng nga ai. Dai rai yang kabu pyaw hpa lam hpe lam amyu myu hku nna tam chye nga ai. Raitim mung, kalang lang rai jang kabu pyaw hpa lam gaw manang ni jaw ya yang she lu la mai nga ai. Ga shadawn, tinang jam jau taw nga ai aten, shing nrai ra ahkyak ai lam ni hpe tinang a n-gun atsam hte tam la nmai ai ahkying aten hta manang ni a garum shing tau ai hpe hkam la lu ai raing yang kabu pyaw hpa lam hpe teng sha lu la mai nga ai.

Nu Maria gaw asak aprat kaba ai kana Elizabeth ma hkum hte rai nna yak hkak ai ahkying aten hta tinang ra kadawn ai lam hpe kau da nna sa kawan garum shing tau na matu du sa ai rai nga ai. Nu Maria hpe kana Elizabeth mu ai ten hta shi hkum nan sha n-ga shi a hkri tung na ma mung kabu gum lawt ai hpe mu lu ai. Nu Maria du sa ai lam gaw kana Elizabeth a matu kabu pyaw hpa lam rai nga ai.

Dai rai yang manang ni ru yak jam jau ai, ra kadawn ai ahkying aten hta garum shing tau lu ai gaw manang ni a matu kabu pyaw hpa lam kaba rai nga ai. Ndai du sa ai ladaw hta anthe galaw sa ai amu magam law law gaw manang wa ra kadawn ai hpe jahpring shatsup ya lu nna kabu gara shiga hpe Nu Maria zawn manang ni a matu htawn shana lu u ga.

NANG MADU YESU HPE WOI LAM GA SANI?

Mungga hti ai; Nu Maria gaw, shi a hkum hta byin ai lam hpe pyi n sawn ai sha, kanu tai na lam de shata kru rai wa sai, kana Elizabeth hpang de lawan sa wa sai. Shan lahkawng a hkrum zup ai lam gaw kabu gara ai lam rai nna, Elizabeth a hkri tung na ma hta grau nna kabu gara shara rai sai. Karai Kasang a mungga hpe kam sham ai Nu Maria a atsam ningja hpe Elizabeth grai shakawn shagrau sai. 

Mungga sumru yu ai; yak hkak jam jau hkrum ai ten, masha kaga ni a majaw n pyaw wa ai ten hta, tau nau sadi jaw ai ga ni hpe n bung hta shapoi chye ai masha ni nga ma ai. Kachyi mi pyi n chye myit ai ni rai nna, myit ru yawn hkyen ai lam hkrum sha ai ten, shingdu shara de htawt sit na ra kadawn nga ai. Kana Elizabeth, na-um na-sin hkum rai sai nga, na chye ai shaloi, tinang a na-um na-sin hte mayak mahkak hpe makoi magap da ai lam n-nga ai sha, asak kaba sai, Elizabeth hpe garum shingtau la na matu, Nu Maria kagat sa wa sai. Dai majaw shi gaw, kabu gara ai hte hkap tau hkalum la hkrum sai. Nu Maria a garum kahtau ya ai lam gaw, shi a nni nkri hta grau manu dan nga ai. Hkri tung kata na ma pyi chyeju dum gum lawt nga sai. Nu Chyoipra ai Maria gaw kaga masha ni hte rai nga yang, shi a matu, shi a tingkyen myit a matu, n myit ai sha, lama mi gun hkawm nga ai. Dai gaw Madu Yesu Hkristu rai nga ai. Anhte mung, masha kaga ni kaw hkawm sa gawan ai shaloi, Hkristu hpe gun hpai hkawm ai ni tai mayu ga ai. 

Mungga hpe bai htan ai; Jinghku jingyu manaw manang ni hpang de sa gawan, sa chyai ai aten gaw galoi hta hpang jahtum rai sata? Shanhte hpang de sa chyai gawan da ai gaw prat mi pyi rai na sai. Dai ni, laban nhtoi hta, anhte n hkrum shaga ai grai na sai, manaw manang ni hpang de sa chyai, gawan na matu lajang na mai kaja nga ai. Kumhpaw kumhpa lama ma la sa na mung n malap ga. Lama na Madu Yesu hpe n lu woi sa ai rai tim, kumhpaw kumhpa gaw la sa ya na rai nga ai. 

Mungga hta akyu hpyi ai; "Madu Yesu e, tinang a matu chyu sha n myit ai sha, masha kaga ni a matu tau chye ya na sharin ya e. Kaning re ai shagrau shaa lam hpe mung n myit mada ai sha, garum shingtau ai hta kabu gara nga lu na sharin ya rit. Nu Chyoipra ai Maria a sharin ya ai marang e, Madu Yesu hpe anhte a masin salum hta shara jaw lu u ga law. Amen."

DU SA LADAW HTA LABAN (4) CHYUM LAIKA

December 20, 2015

CHYUM  MUNGGA  DAW  1

MIHKA  5:2-5a.

Ya hti na gaw, myihtoi Mihka a Laika hta na rai nga ai.

Madu ning nga ai: Nang Betlehem Ehprat e, Yuda amyu law law hta nang kaji nga ti mung, Isarela amyu hpe up na Madu gaw, nye a matu nang kaw paw pru na ra ai: dai wa gaw moi chyaloi nhkoi kaw nna paw pru ai wa rai nga ai.

Dai rai nna, shinggyim machyi ai numsha kasha shaprat ai aten du hkra, Madu shanhte hpe ap kau na ra ai: dai shaloi e naw ngam nga ai shi a kahpu kanau ni gaw, Israela kashu kasha ni hte rau nhtang wa na mara ai.

Dai wa gaw tsap nga nna, Madu a n-gun hte mung, shi a Madu Karai Kasang a mying ningsang a daru magam hte mung, shi a sagu hpung hpe bau na ra ai: shanhte mung  grin nga na mara ai; kaning rai nme law, shi gaw lamu ga htum hkra galu kaba wa na ra ai. Dai wa gaw anhte a ngwi pyaw Madu tai na ra ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

HEBRE 10:5-10

Ya hti na gaw, Hebre masha ni hpang de San Pawlu shagun dat ai Laika hta na rai nga ai.

Hpu nau ni e, Hkristu gaw ndai mungkan ga de du sa yang, ning nga tsun wu ai gaw:

Hkungga hte kumhpa hpe nang n ra nga ndai; Nang nye a matu hkum hkrang lajang da nit dai: Hkum dingyawng nat ai hkungga hte, mara raw ai hkungga hpe, Nang n ra sharawng ndai; Shaloi e, Laika shabawn hta nye a lam ka da nga ai gaw:

Karai Kasang e, nang e nga nga nngai; Nang myit ra ai hku hkan galaw na, ngai sa du ring ngai, ngu we ai, nga nna tsun ai. Jep ai tara hta hkungga nawng ai lam hkang da ti mung, Shi gaw, Shagu hkungga, kumhpaw kumhpa, hkum dingyawng nat ai hkungga hte, mara raw ai hkunga hpe nang n ra sharawng nga ndai, nga nna shawng tsun nu ai. Dai hpang, Ngai nang e nga nga nngai; myit ra ai hku hkan galaw na ngai du sa ring ngai, nga nna bai tsun ai. Dai rai nna, hpang na lam hpe shagrin na matu, shi shawng na lam hpe yeng seng kau wu ai.

Shing rai, Karai Kasang myit ra ai hku re ai majaw, Yesu Hkristu a hkum hkrang hpe lang lata sha nawng ya ai a marang e, anhte gaw shachyoi shapra ai hkrum saga ai.

Ya hti ai gaw, Karai Kasang a mungga rai nga ai.

KABU  GARA  SHIGA

LUKA  1:39-45.

Ya hti na gaw, Luka a Laika hta na Kabu Gara Shiga rai nga ai.

Dai aten hta e, Maria gaw Yuda mung na bum ga e nga ai mare langai mi de alawan rawt sa nna, Zakari a nta de shang nhtawm, Elisabet hpe hkrum shaga wu ai. Maria hkrum shaga ai ga hpe Elisabet na la jang, shi a hkritung na ma gumlawt nga ai. Elisabet mung Chyoi Pra ai Wenyi hte hpring nna, nsen kaba hte jahtau let, Numsha ni hta nang a lu ndai; na a hkritung na ma mung a lu nga ai. Nye a Madu a kanu ngai hpe sa kawan ai gaw hpa chyeju a jaw e rai ra ai i? Ngai nang hpe tsun de ga: Na a shakram ai ga nsen ngai na la ai hte rau, nye hkritung na ma kabu gara ai hte gumlawt nga ai. Madu shi hpe tsun ai ga dik wa na ra ai lam hpe kam sham ai numsha gaw ‘a’ lu ai, ngu nna tsun wu ai.

Ya hti ai gaw, Madu a Kabu Gara Shiga rai nga ai.

DU SA LADAW LABAN (3) MUNGGA

Du sa ai ladaw hpe shaning shagu anhte galaw sa ai shaloi Madu Yesu Hkristu shangai wa ai Hkrismat poi hpe gingdan ai hte shang lawm lu nna Hkrismat a shaman chyeju hpe hkam la lu na matu rai nga ai. Ndai lam gaw du sa ai ladaw laman hta anhte galaw sa ai lam langai rai nga ai.

Nawku hpung a nawku daw jau ai lam hte seng nna sanglang da ai hta du sa ai ladaw hpe daw lahkawng garan ginghka tawn da nna hkan shatup galaw sa na matu matsun da nga ai. Du sa ai ladaw laban bat langai kaw nna December (16) ya shani shawng na daw hta e Madu Yesu hpung shingkang hte hpang jahtum na nhtoi hta du sa na hpe hkyen lajang na matu re. December (17) ya shani kaw nna Hkrismat du hkra gaw lai wa sai shaning hking lahkawng ning hta du sa ai, shangai wa ai, Madu Yesu hpe kalang bai hkap tau la na matu hkyen lajang ai rai nga ai.

Madu Yesu a lahkawng lang ngu na du sa ai aten ahkying hpe anhte tup hkrak nchye ga ai majaw shani shagu jin jin rai ala nga na matu shadum jahprang ai lam rai nga ai. Dai rai yang Madu Yesu gaw anhte a sak hkrung nga sa ai lam hta shani shagu Shi Madu anhte kaw du sa ai ngu ai hpe grau nna du sa ladaw hta hkrang shaleng na matu gaw ahkyak nga ai. 

Ndai du sa ai ladaw hpe anhte shang lawm ai shaloi hpang jahtum na aten ahkying hta Madu Yesu bai du sa na hpe myit dum nga let shangai wa ai Madu Yesu hpe gingdan ai hte hkap tau la lu na matu sha n-ga, Madu Yesu shani shagu anhte kaw du sa nga ai hpe sakse hkam nga sa lu u ga.

HKUM HKRANG WENYI YAWNG HKYEN LAJANG GA

Mungga hti ai; Ya chyawm, masha n kau mi, Yawhan Baptista kaw sa let, san seng san pra ai prat lu la na matu kaning rai nga pra na lam sa san ma ai. N kau mi chyawm, Shi kadai re ai hpe sawn maram yu ma ai. Aten na na ala dingda nga ai, Messiah: Hkyela Madu, Shi n re ai lam tsun dan sai. Prat ban law law ala nga ai, shi hta grau n-gun atsam kaba ai wa du sa na hpe tsun dan sai.

Mungga hpe sumru yu ai; Shinggyim masha ni a mai kaja lam hpe galaw ya na matu ahkaw ahkang lu ai ten, Project kaba ni, Program grai hkrak ai, ngu ai lam ni gaw anhte a matu agung alau rai wa sai. Hkum hkrang hta ra kadawn ai gaw shawng shawng rai nga ai. Yawng bai myit yu ga nga yang, shinggyim hkum hkrang rai nga ai hte, hkum hkrang hta ra kadawn nga ai jahpring na mung ahkyak ai zawn, wenyi lam yan mung ahkyak nga ai. 

Tim, kasa Yawhan, Sasana magam nnan hpang wa ai ten hta, masha kaga ni hpyi shawn, san ai lam gaw, malu masha, bu hpun palawng, shingbyi shara, n rai nga ai. San seng ai prat, htani htana asak lu la na lam hpe she, gasan san ma ai. Dai majaw, tinang hkum hkyen lajang ai lam galaw na matu Yawhan gaw nam mali de woi la hkrum sai. Karai Kasang a mungga, masha kaga ni hpe tengman kang ka ai hte htawn shabra lu na matu, shi hkum nan, Karai Kasang hpe shawng atsawm sha madat la ra nga ai. Dai gaw, Karai Kasang a shang wang hta shi a htaphtuk ai shara hpe atsawm sha chye la shangun sai. Shi gaw, Mungga hpe gun hpai ai wa she rai nna, mungkan ga hpe hkye shaw la na wa gaw n rai nga ai. 

Mungga hpe htan ai; kalang lang, nambat lahkawng shara kaw nna galaw hkawm sa ra ai hpe, ngai kaning rai bai htang a ta? Ngai a bai htang galaw ai lam, gara kaw nna pru wa ai hpe, ngai chye nga ai kun? Tinang hkam sha ai hpe ning shawng jaw nna ahkyak ai shara kaw nga ai hta, makau kaw nga let, galaw taw ai mahtang tinang hkum tinang grau chye madat lu na nhten. 

Mungga hte akyu hpyi ai; "Madu e, ngai a manu dan ai lam hpe, ahkyak ai shara kaw mung, makau kaw mung, n-nga ai hpe chye na lu na garum ya rit. Kaning re ai masa hta rai tim, ahkyak ai shara kaw na mi n rai tim, garum ya lu ai hpe kabu lu na myit mada nngai. Nang Madu a mying nsang hta dai chyeju ni hpe hpyi nem nngai law, Amen."

DU SA LADAW HTA LABAN (3) CHYUM LAIKA

December 13, 2015

CHYUM  MUNGGA  DAW  1

ZEHPANI 3: 14-18a.

Ya hti na gaw, myihtoi Zehpani a Laika hta na rai nga ai. 

Ziun shayi sha e, mahkawn mangoi u; Israela e, kabu jahtau u; Yerusalem shayi sha e, na a myit masin mahkra hte kabu gara nga nna, sharawng awng nga u. Madu gaw, nang hpe daw dan ai ga shabai kau nna, na a hpyen wa hpe manga kau nu ai. Israela hkawhkam ngu ai Madu gaw, na a ka-ang e rai nga ai; nang gaw tsinyam tsindam hpe, htawm hpang e hkrit ra ai n rai. Dai shani e, Yerusalem hpe, Ziun e, hkum hkrit et; na a lata hkum shakya et, nga nna tsun na ra ai.

Na a Madu Karai Kasang gaw na a ka-ang e nga nga ai; Shi gaw daru magam rawng nna, hkye hkrang la na ra ai: na a lam hpe Shi kabu gara nna, sharawng awng na ra ai. Shi gaw nang hpe Shi a tsaw ra ai hta shangang ya na ra ai: Poi shani e galaw ai zawn, Shi na a mahkawn mangoi let kabu gara ka manawt nga na ra ai.

Ya hti ai gaw, Karai kasang a mungga rai nga ai.

CHYUM  MUNGGA  DAW  2

HPILIP 4:  4-7

Ya hti na gaw,  Hpilipi masha ni hpang de San Pawlu shagun dat ai Laika hta na rai nga ai.

Hpu nau ni e, Madu hta tut nawng e kabu gara nga mu; ngai bai tsun nngai, Kabu gara nga mu. Masha yawng hte gaw nanhte a sumnung ai myit hpe chye wa mu ga: Madu gaw ni magang wa ra ai.

Hpa baw lam hta rai ti mung, myit hkum ru hkum tsang nga mu: lam shagu hta akyu hpyi nna, chyeju dum let, nanhte hpyi mayu ai lam mahkra hpe Karai Kasang kaw shana ya mu. Shaloi, masha a myit hte n htai ya lu ai Karai Kasang a ngwi pyaw ai gaw, nanhte a myit masin hte myit mang ai hpe, Hkristu Yesu hta e bau sin na ra ai.

Ya hti ai gaw, Karai Kasang a mungga rai nga ai.

KABU  GARA   SHIGA

LUKA  3:  10-18

Ya hti na gaw, Luka a Laika hta na Kabu Gara Shiga rai nga ai.

Dai aten hta e, shawa masha ni gaw, Anhte kaning rai na rai ta? nga nna Yawhan hpe san ma ai. Shi shanhte hpe htan mu ai gaw: Palawng lahkawng lu ai wa gaw palawng n lu ai wa hpe karan u ga; shat lu sha lu ai wa mung dai hte maren jaw u ga, ngu mu ai. Kang hta ai ni mung Kashin kamun hkam la na sa nna, Sara e, anhte kaning rai na rai ta? nga nna shi hpe san ma ai. 13 Shi gaw, Nanhte hta la na, shadang tawn ai made hta grau nna hkum adip la myit, ngu nna shanhte hpe tsun mu ai.

Hpyen masha ni mung, Anhte wa gaw kaning rai na rai ta? nga nna san ma ai. Shi gaw, Kadai hpe mung adip arip hkum rai myit; jahkrit shama sha ai mung hkum rai mu; nanhte a shabrai hte ram dum nga mu, ngu nna shanhte hpe tsun mu ai.

Masha ni chyawm gaw myit mada nga ma ai rai nna, Ndai Yawhan gaw Hkristu wa mi hkoi rai nga ai kun? nga nna yawng mayawng tinang a kraw kata e shi a lam myit sumru shajang nga ma ai.  Shaloi Yawhan gaw, Ngai gaw nanhte hpe hka hta kashin kamun jaw made ai; rai ti mung, ngai hta atsam grau rawng ai wa gaw sa wa ra ai; Shi a kyepdin sumri raw na pyi ngai n ging n dan nngai: Shi gaw Chyoi Pra ai Wenyi hta mung, wan hta mung, nanhte hpe kashin kamun jaw na ra ai: Shi a lata hta Shi hkuwawn lang nna, Shi a mam chyarang hpe yit jasan kau nhtawm, mam gu hpe shi a dum hta shinggyin bang da nna, nsan hpe gaw n sat lu ai wan hte nat kau na ra ai, ngu nna mahkra hpe htan mu ai. Shing rai shi gaw shadum jahprang ai ga kaga law law hte mung, dai masha ni hpe Kabu Gara Shiga hkaw tsun wu ai.

Ya hti ai gaw, Madu a Kabu Gara Shiga rai nga ai.

DU SA LADAW LABAN (2) MUNGGA

San seng tsawm htap ai hpe masha hkum shagu ra sharawng ai rai nga ai. Dai re ai majaw anhte nga ai nta, yup gawk, bu hpun palawng hte hkum hkrang ni hpe aten ahkying la let jasan jaseng chye nga ai. Dai hta n-ga san seng ai makau grup yin kaw nga yang myit hta asan sha rai nna simsa ai hpe lu la mai nga ai.

Du sa ai ladaw hta e anhte hpe shadum jahprang ya ai lam langai mi gaw Karai Kasang du sa na aten hpe shajin shachyip le ala ai lam rai nga ai. Madu Yesu gaw hpung shingkang hte bai du sa na re ngu ai hpe ala nga ai ni anhte gaw shi madu du sa na aten ahkying hpe tup hkrak nchye ga ai majaw shani shagu shajin shachyip ra nga ai.

Anhte a dum nta hta ahkyak ai manam ni du sa jang jasan jaseng nna ra ai hpe shajin shachyip ai zawn shi Madu du sa na hpe a la nga ai anhte ni gaw Karai Kasang a hting nu rai nga ai anhte a hkrum hkrang hpe jasan jaseng nna shajin shachyip ai lam hpe galaw sa lu yang she Shi Madu hpe gin dan ai hte hkap tau la lu na rai nga.

Madu Yesu du sa na hpe ala dingda nga ai ndai du sa ai ladaw hta tinang a hkum hkrang myit masin yawng hpe jasan jaseng shajin shachyip let shi Madu hpe gin dan ai hte hkap tau la lu u ga.

MADU, NANG HPE MUNG SAW SHAGA GA AI

Mungga hti ai: Yawhan Baptista hte Shi a Sasana lam shachyen ya ai. Shi gaw, myit malai ai kashin kamun hkam la na matu ndau shana ya ai. Dai mungga gaw; Madu du sa wa na n’htoi hte seng nna, myihtoi Esaia htawn shana ai mungga hpe bai myit dum shangun ai.

Mungga Sumru yu ai; Karai Kasang a mungga gaw, anhte hpang de, kalang lang, grai n htuk ai ten ni hta mung du chye nga ai. Yawhan Baptista hta yu yang mung, shi hkum shi, nam mali hta nga let, mungkan uhpung uhpawng hte tsan gang ai aten hta, Mungga du pru ai hpe mu lu ai. Ya, Karai Kasang gaw Shi hpe shaga la nna, Mungga htawn tsun na Sasana magam hpe atsam dat galaw na hte, Yawhan a prat hta mung, yak hkak, jam jau ai hpe hkrum sha na byin wa sai. Tim, Yawhan gaw, dai magam lit hpe gun hpai na tsawm ra yak dum nga ai. Shi a Madu, du sa wa na lam hpe tau nau lajang ya ra ai. Karai Kasang a yaw sing ai amu magam hta ahkyak ai wa shi rai nga ai rai tim, madung hkrang shala ai wa gaw shi n rai nga ai. 

Yawhan Baptista mung, du ja, bawja, arawng aya lu ai masha ni a prat hpe achyaw hkra ya sai. Dai aten kaw nna prat gaw yak hkak hpang wa sai. Tim, dai lam ni gaw, Yawhan zawn re ai masha wa hpe pat shingdan da lu ai n rai. N kau mi gaw hkawm pru mat ai, nkau mi gaw n kam la ai rai tim, hkrit ai majaw galaw ma ai. Bai n kau mi gaw, shanhte a ban dung shadaw rai sai ngu myit la let, myiman muk muk hte galaw ma ai. 

Yawhan chyawm gaw shakut lai wa sai. Karai Kasang a mungga hpe chye madat lu na matu aten law law wa azim sha nga let myit aru yu lai wa sai. 

Mungga hpe htan ai: Madu gaw Shi a uhpung hta shang lawm na matu anhte hpe mung saw shaga nga ai. Prat hta e, ngai myit ai hpe sha hkan galaw mayu nna, grai mai kaja ai hpe galaw na saw shaga ai hpe n dum shai kau sai kun? lama, ngai mung, zaibru jang/nam mali hta, zawn rai, nsen law la ai mungkan kaw nna pru hkawm let, tinang hkum shazim kau let, Karai Kasang a shaga la ai n sen hpe na lu na matu galaw yu ra na nhten.

Akyu hpyi ga; “Madu e, ndai mungkan ga na nam mali hta wam dam hkawm nga ai, ngai hpe jasu la rit law. Nang Madu hpe grau chye na matu, grau na lu na matu hte grau tsawra lu na matu, akyu hpyi chye na ngai hpe sharin ya rit. Ngai a n’htoi ni gaw, Nang Madu Karai Kasang kade daram tsawm htap nga ai hpe bai sawk sagawn la lu na hte Madu hta ap nawng lu u ga! Nang Madu hta chyu sha ngai manoi nga na law, Amen.”

DU SA LADAW HTA LABAN (2) CHYUM LAIKA

December 6, 2015

CHYUM MUNGGA DAW 1                 

Baruk 5: 1-9

Ya hti na gaw, myihtoi Baruk a Laika hta na rai nga ai;

Yerusalem e, sharung shayawt ai hte ru tsang ai a palawng raw kau nna, Karai Kasang kaw na lu la ai, n htum n wai hpung shingkang hte seng ai, tsawm htap ai palawng lawai nna, n htum n mat ai arawng sadang ngu ai janmau hpe, na a baw hta gup nga u. Kaning rai nme law, Karai Kasang gaw masha amyu baw shagu hpe  na a hpung shingkang madun dan na ra ai: Karai Kasang nang hpe amying jaw nna, Ding Hpring ai Ngwi Pyaw Lam hte, Shakut Sharang ai a Arawng Sadang, nga nna nang hpe shamying ya na ra ai.

Yerusalem e, tsaw la ai shara de rawt tsap nga nna, sinpraw maga de na a myiman yawng dat u; Chyoi pra ai Wa hkang da ai majaw, na a nsha ni sinpraw sinna maga de nna bai wa hpawng nga ma ai hpe mada yu u. Karai Kasang shanhte hpe myit dum ai majaw, shanhte kabu gara let nang hpang de sa du hpawng ma ai. Yerusalem mare kaw nna shanhte pru sa ai shaloi, hpyen ni shanhte hpe woi la nna, lagaw hku hkawm sa wa ma ai; ya, hkawhkam kasha ni hpe hpung shingkang hte hpai hkawm ai zawn, Karai Kasang shanhte hpe Nang hpang de bai woi wa ra ai.

Tsaw la ai bum shagu hte, htani htana nga nga ai kawng ni hpe daw kau na ra ai; lamu ga hpe shara shatsawm na matu, hkaraw ni hpe kaput jahpring ya na ra ai, nga nna Karai Kasang daw dan nu ai. Israela gaw Karai Wa a hpung shingkang npu e ngwi pyaw ai hte hkawm sa lu na ra ai.

Dai hta n-ga, maling ni hte manam pyaw hpun mahkra gaw, Karai Kasang a amying ahkang hte Israela hpe shingnip ka-up na ra ai; kaning rai nme law, Karai Kasang Shi a hpung shingkang a nhtoi hte, Israela hpe woi awn nna, Shi a matsan dum ai hte ding hpring ai chyeju hte, shanhte hpe makawp maga la na ra ai.

Ya hti ai gaw, Karai Kasang a mungga rai nga ai.

CHYUM MUNGGA DAW

2 HPILIP  1:  4-6.  8-11

Ya hti na gaw, Hpilipi masha ni hpang de San Pawlu shagun dat ai Laika hta na rai nga ai.

Hpu nau ni e, Nanhte hpe dum shagu e nye a Karai Kasang hpe chyeju dum nga nngai. Kabu Gara Shiga hpe nanhte nnan hkap la ai kaw nna ya du hkra, Karai Kasang a magam hta hkan shakut lawm ai majaw, nanhte  mahkra a matu ngai akyu hpyi ai shaloi, galoimung kabu gara ai myit hte akyu hpyi nga nngai. Nanhte hta e mai kaja ai amu galaw hpang ai Wa gaw, Yesu Hkristu du sa ai nhtoi du hkra, dai hpe jahkum shatsup ya na ra ai, ngai kam nga nngai.

Hkristu Yesu a n-gaw n wai ai hta ngai nanhte yawng hpe gade wa tsaw ra la nngai gaw, Karai Kasang nye a sakse rai nga ai. Dai rai nna, nanhte shada da tsaw ra ai myit jat htam wa nna, Karai Kasang a lam hpe grau nna chye chyang wa lu na matu, ngai a hpyi nga nngai. Shing rai, grau htap htuk ai lam hpe nanhte chye ginhka lu nna, Hkristu a nhtoi hta san seng ai hte ra n rawng ai hku tsap lu na myit dai.

Dai nhtoi hta e, Karai Kasang kaw hpung shingkang arawng sadang nga nga u ga matu, Hkristu anhte hta e shapraw ai arawn alai kaja hte, nanhte hpring chyat wa lu na myit dai.

Ya hti ai gaw Karai Kasang a mungga rai nga ai.

KAGU  GARA  SHIGA

LUKA 3: 1-6

Ya hti na gaw, Luka a Laika hta na Kabu Gara Shiga rai nga ai.

Dai aten hta e, Roma hkawhkam Tiberiu gaw hkaw dung ai shi manga ning hta, Punsiu Pilatu gaw Yuda mung e munggyi galaw nna, Herawt gaw Galile mung de, shi a kanau Hpilip gaw Ituri hte Trakuni mung de, Lisaniu gaw Abili mung e du aya hkam la shajang ma ai shaloi, Anna yan Kayahpa gaw hkinjawng agyi galaw ai lakhtak e, Karai Kasang a mungga gaw, nam mali e nga ai Zakari a kasha Yawhan kaw du nga ai.

Dai rai nna, Yawhan gaw Yawdan hka a grup yin na ginwang shagu de du hkawm nna, myit malai lu na kashin kamun lam hpe hkaw tsun dan nga ai: dai gaw,

“Nam mali e tsun jahtau ai wa a nsen gaw: Madu a lam hpe lajang da mu; Shi a lam matsun ni hpe shading mu. Hkaraw shagu hpe kaput jahpring nna, Bum hte kawng shagu hpe daw kau na mara ai; Magaw ai lam ni hpe shading nna, Machyawk marawk re ai lam ni hpe shara lu na rai nga ai: Shaloi masha yawng hte gaw Karai Kasang a hkye hkrang la ai lam mu lu na mara ai,” nga nna myihtoi Esaia a laika hta ka da ai hte maren rai  wa sai.

Ya hti ai gaw, Madu a kabu Gara Shiga rai nga ai.